19 ஆண்டுகளில் முதல் முறையாக கூட்டணி… விஷால், தேவி ஸ்ரீ பிரசாத் நெகிழ்ச்சி…

19 ஆண்டுகளில் முதல் முறையாக தனது படத்திற்கு இசை அமைக்கும் தேவி ஸ்ரீ பிரசாத்துக்கு நடிகர் விஷால் நன்றி தெரிவித்துள்ளார்.

கோலிவுட்டில் தவிர்க்க முடியாத நாயகன் விஷால். செல்லமே படத்தின் மூலம் கோலிவுட் திரையுலகிற்கு அறிமுகமான அவர், சண்டக்கோழி, திமிரு, சத்யம், அவன் இவன், தாமிரபரணி, துப்பறிவாளன், உள்ளிட்ட பல படங்களில் நடித்து முன்னணி நடிகராக உயர்ந்துள்ளார். விஷால் நடிப்பில் இறுதியாக வெளியான மார்க் ஆண்டனி திரைப்படம் பெரும் வெற்றி பெற்றது.

தற்போது விஷால் ஹரி இயக்கத்தில் நடித்து வருகிறார். இப்படத்திற்கு ரத்னம் என தலைப்பு வைக்கப்பட்டுள்ளது. இதில், விஷாலுக்கு ஜோடியாக பிரியா பவானி சங்கர் நடிக்கிறார். மேலும், கௌதம் மேனன், சமுத்திரக்கனி, மற்றும் பலர் முக்கிய கதாபாத்திரங்களில் நடித்து வருகின்றனர். இப்படத்தின் படப்பிடிப்பு நிறைவு பெற்று, படத்தின் பின்னணி வேலைகள் விறுவிறுப்பாக நடைபெற்று வருகின்றன.

இந்நிலையில், இப்படத்தின் முதல் பாடல் அண்மையில் நிகழ்ச்சி ஏற்பாடு செய்து வெளியிடப்பட்டது. அப்போது பேசிய விஷால், தனது சினிமா வாழ்க்கையில் கிட்டத்தட்ட 19 ஆண்டுகள் கழித்து தேவி ஸ்ரீ பிரசாத்துடன் இணைந்துள்ளேன். தற்போது தான் அதற்கான நேரம் வந்துள்ளது. மற்ற நடிகர்களுக்கு மேஜிக் பாடல் கொடுத்தது போல எனக்கும் வேண்டும் என எரிச்சலூட்டிக் கொண்டே இருப்பேன் என நடிகர் விஷால் தெரிவித்துள்ளார்.