லோகேஷ் கனகராஜின் புதிய படத்தில் ‘கூலி’ பட நடிகை நடிக்க உள்ளதாக தகவல் வெளியாகியிருக்கிறது.
தமிழ் சினிமாவில் லோகேஷ் கனகராஜ் கைதி, மாஸ்டர், விக்ரம், லியோ என அடுத்தடுத்த வெற்றி படங்களை கொடுத்து ரசிகர்கள் மனதில் நீங்கா இடம் பிடித்துள்ளார். அடுத்தது இவர் கைதி 2, விக்ரம் 2, ரோலக்ஸ் போன்ற படங்களை இயக்கப் போவதாக சொல்லப்படுகிறது. இதற்கிடையில் ரஜினி நடிப்பில் இவர் இயக்கியிருந்த ‘கூலி’ திரைப்படம் கடந்த ஆகஸ்ட் 14ஆம் தேதி வெளியாகி ரசிகர்கள் மத்தியில் கலவையான விமர்சனங்களை பெற்றது. அடுத்தது இவர், ரஜினி- கமலை வைத்து கேங்ஸ்டர் படம் ஒன்றை இயக்கப் போவதாகவும் பேச்சு அடிபடுகிறது. இது ஒரு பக்கம் இருக்க, மற்றொரு பக்கம் லோகேஷ் கனகராஜ் ஹீரோவாக அறிமுகமாக போகிறார் என்று பல தகவல்கள் வெளியாகி எதிர்பார்ப்பை அதிகப்படுத்தி வருகிறது. அதன்படி லோகேஷ் கனகராஜ் நடிக்க உள்ள புதிய படத்தை அருண் மாதேஸ்வரன் இயக்கப் போவதாகவும் இதனை சன் பிக்சர்ஸ் நிறுவனம் தயாரிக்கப் போவதாகவும் சொல்லப்படுகிறது. இந்த படத்தின் படப்பிடிப்பு 2025 செப்டம்பர் அல்லது அக்டோபர் மாதத்தில் தொடங்கும் எனவும் இது தொடர்பான வேலைகள் நடைபெற்று வருவதாகவும் ஏற்கனவே பல தகவல்கள் வெளிவந்தன.
இது தவிர இந்த படத்தில் லோகேஷ் கனகராஜுடன் இணைந்து மிர்னா மேனன் மற்றும் சுதா ஆகிய இருவரும் கதாநாயகிகளாக நடிக்க உள்ளனர் என சமீபத்திய தகவல்கள் தெரிவிக்கின்றன. தற்போது இதன் கூடுதல் தகவல் என்னவென்றால், ‘கூலி’ படத்தில் வில்லியாக நடித்து அசத்திய ரச்சிதா ராம், லோகேஷ் கனகராஜின் புதிய படத்தில் முக்கிய கதாபாத்திரத்தில் நடிக்க உள்ளார் என சினிமா வட்டாரங்கள் தெரிவிக்கின்றன. இருப்பினும் அதிகாரப்பூர்வ அறிவிப்பு விரைவில் வெளியாகும் என்று எதிர்பார்க்கப்படுகிறது.