ஜீவா நடிப்பில் உருவாகும் தலைவர் தம்பி தலைமையில் படத்தின் டீசர் வெளியாகி உள்ளது.
தமிழ் சினிமாவில் முன்னணி நடிகர்களில் ஒருவராக வலம் வருபவர் ஜீவா. இவர் வித்தியாசமான கதைக்களங்களை தேர்ந்தெடுத்து நடிக்கக் கூடியவர். அந்த வகையில் இவரது நடிப்பில் கடைசியாக ‘அகத்தியா’ திரைப்படம் வெளியாகி நல்ல வரவேற்பை பெற்றது. இதைத்தொடர்ந்து ஜீவா, எம். ராஜேஷ் இயக்கத்தில் புதிய படம் ஒன்றில் நடித்து வருகிறார். இது தவிர இவர், மீண்டும் ‘பிளாக்’ பட இயக்குனர் கே.ஜி. சுப்பிரமணியுடன் கூட்டணி அமைத்துள்ளார். இந்த படம் கடந்த சில மாதங்களுக்கு முன்னர் பூஜையுடன் தொடங்கப்பட்டது. இதற்கிடையில் இவர், தலைவர் தம்பி தலைமையில் என்ற படத்தில் நடித்திருக்கிறார். இதில் தம்பி ராமையா, இளவரசு, பிராத்தனா நாதன் மற்றும் பலர் நடித்துள்ளனர். கண்ணன் ரவி குரூப் நிறுவனம் இந்த படத்தை தயாரிக்க பப்லு அஜு இதன் ஒளிப்பதிவாளராகவும், விஷ்ணு விஜய் இதன் இசையமைப்பாளராகவும் பணியாற்றியுள்ளனர். இந்த படமானது காமெடி கலந்த கதைக்களத்தில் உருவாகி இருக்கிறது. கடந்த சில தினங்களுக்கு முன்னர் இந்த படத்தின் பர்ஸ்ட் லுக் போஸ்டர் வெளியாகி நல்ல வரவேற்பை பெற்றது.
அதைத்தொடர்ந்து தற்போது இந்த படத்தின் டீசரை படக்குழு வெளியிட்டுள்ளது. இந்த டீசர் ரசிகர்களை வெகுவாக கவர்ந்து இணையத்தில் வைரலாகி வருகிறது. மேலும் இந்த படம் விரைவில் திரைக்கு வரும் என எதிர்பார்க்கப்படுகிறது.