ரஜினி நடிக்கும் ‘கூலி’ படத்தில் இணைந்த கன்னட நடிகர்!

நடிகர் ரஜினி ஜெயிலர் படத்திற்குப் பிறகு தனது 170 வது படமான வேட்டையின் திரைப்படத்தில் நடித்து முடித்துள்ளார். ஆக்சன் கலந்த கதைக்களத்தில் உருவாகி இருக்கும் இந்த படமானது வருகின்ற அக்டோபர் 10ஆம் தேதி உலகம் முழுவதும் வெளியாக இருக்கிறது. அதே சமயம் நடிகர் ரஜினி, லோகேஷ் கனகராஜ் இயக்கத்தில் தனது 171-வது திரைப்படத்தில் நடித்து வருகிறார். கூலி என்று தலைப்பு வைக்கப்பட்டுள்ள இந்த படத்தில் ரஜினி நெகட்டிவ் ஷேடட் ரோலில் நடிக்கிறார். இதனை சன் பிக்சர்ஸ் நிறுவனம் தயாரிக்க அனிருத் இதற்கு இசையமைத்து வருகிறார். படத்தில் ரஜினியுடன் இணைந்து ஸ்ருதிஹாசன் முக்கிய கதாபாத்திரத்தில் நடிக்கிறார். மேலும் சத்யராஜ், சௌபின் சாகிர் போன்றோர் நடிப்பதாக சொல்லப்படுகிறது. மிகுந்த எதிர்பார்ப்புகளுடன் உருவாகி வரும் இந்த படத்தின் படப்பிடிப்பு கடந்த சில தினங்களுக்கு முன்பாக ஐதராபாத் பகுதியில் பிரம்மாண்ட செட் அமைக்கப்பட்டு படப்பிடிப்பு நடத்தப்பட்டு வந்தது. அதேசமயம் சென்னையில் கூலி படத்திற்காக மேன்சன் போன்ற செட் அமைக்கப்பட்டுள்ளதாம். அங்கு பாடல் காட்சி ஒன்று படமாக்கப்பட்டுள்ளதாகவும் அந்த பாடலில் பிரபல கன்னட நடிகர் ஒருவர் நடித்துள்ளதாகவும் தற்போதைய தகவல்கள் தெரிவிக்கின்றன. எனவே அந்த கன்னட நடிகர் யாராக இருக்கும் என்பது குறித்த அப்டேட் இனிவரும் நாட்களில் வெளியாகும் என்று எதிர்பார்க்கப்படுகிறது.