சார்பட்டா பரம்பரை 2 படம் குறித்த அப்டேட் வெளியாகி உள்ளது.
கடந்த 2021 ஆம் ஆண்டு ஆர்யா நடிப்பில் பா. ரஞ்சித் இயக்கிய திரைப்படம் ‘சார்பட்டா பரம்பரை’. இந்தப் படத்தில் ஆர்யாவுடன் துஷாரா விஜயன், பசுபதி, முத்துக்குமார், ஜான் கோக்கேன், சந்தோஷ் பிரதாப் உள்ளிட்டோர் நடித்தனர். அமேசான் பிரைமில் வெளியான இத்திரைப்படம் மாபெரும் வெற்றி பெற்றது.
இது தமிழ் சினிமாவிலேயே விளையாட்டை அடிப்படையாக வைத்து எடுக்கப்பட்ட திரைப்படங்களில் மிகவும் முக்கியமானதாக அமைந்தது.
குத்துச்சண்டை போட்டியை மையமாக வைத்து உருவாக்கப்பட்ட இந்த படத்திற்கு இன்றளவும் பெரும் ரசிகர் பட்டாளமே இருக்கிறது. மேலும் நடிகர் ஆர்யாவிற்கு இந்த திரைப்படம் ஒரு திருப்புமுனையாகவும் அமைந்தது.
இந்நிலையில் கடந்த சில மாதங்களுக்கு முன்பாக சார்பட்டா பரம்பரை படத்தின் இரண்டாம் பாகம் குறித்த தகவல் வெளியாகி இருந்தது. ஆர்யா இந்தப் படத்திற்காக வெறித்தனமாக தயாராகி வருகிறார். இந்நிலையில் படம் குறித்த லேட்டஸ்ட் அப்டேட் கிடைத்துள்ளது. சார்பட்டா பரம்பரை இரண்டாம் பாகத்தின் படப்பிடிப்பு இந்த ஆண்டு இறுதியில் தொடங்கும் என சினிமா வட்டாரங்கள் தெரிவிக்கின்றன.
இதற்கிடையில் ஆர்யா தற்போது ‘காதர் பாட்ஷா என்ற முத்துராமலிங்கம்’ மற்றும் ‘மிஸ்டர் எக்ஸ்’ உள்ளிட்ட படங்களில் நடித்து முடித்துள்ளார் என்பது குறிப்பிடத்தக்கது.