தனுஷின் D54 படம் குறித்த புதிய தகவல் வெளியாகியுள்ளது.
தமிழ் சினிமாவின் தவிர்க்க முடியாத நடிகர்களில் ஒருவரான தனுஷ் கடைசியாக ‘இட்லி கடை’ திரைப்படத்தில் நடித்திருந்தார். இந்தப் படம் ரசிகர்கள் மத்தியில் பாசிட்டிவ்வான விமர்சனங்களை பெற்று வெற்றி நடைபோட்டு வருகிறது. இதைத் தொடர்ந்து அடுத்த மாதம் 28ஆம் தேதி தனுஷ் நடிப்பில் உருவாகி இருக்கும் ‘தேரே இஷ்க் மெய்ன்’ திரைப்படம் திரைக்கு வர இருக்கிறது. இதற்கிடையில் தனுஷ் ஏகப்பட்ட படங்களில் கமிட்டாகி வரும் நிலையில் ‘போர் தொழில்’ படத்தின் இயக்குனர் விக்னேஷ் ராஜா இயக்கத்தில் விறுவிறுப்பான திரில்லர் கதையில் நடித்து வருகிறார். 
இந்த படத்தின் மீதான எதிர்பார்ப்பு மிகப்பெரிய அளவில் இருந்து வரும் நிலையில் படப்பிடிப்புகள் கடந்த சில மாதங்களுக்கு முன்னரே தொடங்கப்பட்டு பரபரப்பாக நடைபெற்று வருகிறது. அதன்படி ஏறத்தாழ இந்த படத்தின் படப்பிடிப்புகள் நிறைவடைந்ததாக சொல்லப்படுகிறது. இருப்பினும் தற்போது கிடைத்த தகவல் என்னவென்றால், சில காட்சிகள் மட்டும் படமாக்கப்பட இருப்பதாகவும், இன்னும் இரண்டு வாரங்களில் இதன் ஒட்டுமொத்த படப்பிடிப்பும் நிறைவடைந்து விடும் எனவும் சினிமா வட்டாரங்கள் தெரிவிக்கின்றன. விரைவில் மற்ற தகவல்கள் வெளியாகும் என்று நம்பப்படுகிறது.
D54 என்று தற்காலிகமாக தலைப்பு வைக்கப்பட்டுள்ள இந்த படத்தை ஐசரி கணேஷ் தயாரிக்க ஜி.வி. பிரகாஷ் இதற்கு இசையமைக்கிறார். மமிதா பைஜு, ஜெயராம், சுராஜ் வெஞ்சரமூடு மற்றும் பலர் இப்படத்தில் நடித்து வருகிறார்கள் என்பது குறிப்பிடத்தக்கது.