“என்னை வெற்றி பெற வைத்த ரசிகர்களின் கனவுகளும் நிறைவேற வேண்டும். நிச்சயம் நிறைவேறும்” என்று ‘விஸ்வநாத் அண்ட் சன்ஸ்’ திரைப்படத்தின் பாடல் வெளியீட்டு விழாவில் நடிகர் சூர்யா மிகவும் உருக்கமாகப் பேசினார்.
‘கருப்பு’ திரைப்படத்தின் பிரம்மாண்ட வெற்றியைத் தொடர்ந்து, சூர்யா நடிப்பில் அடுத்து வெளிவர இருக்கும் திரைப்படம் ‘விஸ்வநாத் அண்ட் சன்ஸ்’. இப்படத்தின் இசை வெளியீட்டு விழா ஞாயிற்றுக்கிழமை கோயம்புத்தூரில் மிக பிரம்மாண்டமாக நடைபெற்றது.
“சொந்த ஊருக்காரங்க… என் செல்லங்களா!”:
விழாவில் ரசிகர்களுக்கும் தனக்குமான உறவை நினைவுகூர்ந்து பேசிய நடிகர் சூர்யா:
“என் படத்தின் வசனம் ஒன்றுதான் ஞாபகத்துக்கு வருகிறது. அதை சொல்லி ஆரம்பிக்கிறேன். சொந்த ஊருக்காரங்க… இங்கே இருக்கிறதெல்லாம் என்னோட தம்பி, தங்கச்சி, அண்ணன், அக்கா, அத்தை, மாமா… என் சொந்தங்கள். சொந்தங்களே எப்படி இருக்கீங்க!
என் செல்லங்களா… கண்ணுங்களா… என் சாமிகளா… இந்த இசை வெளியீட்டு விழாவை திருவிழா மாதிரி ஆக்கி வைச்சிருக்கீங்க. மிகப் பெரிய அன்பு இது. எவ்வளவு நன்றி சொன்னாலும் போதாது.” என்றார்.
ரசிகர்களின் நற்பணிகளுக்கு நன்றி:
“சில காரணங்களுக்காக என் பிறந்தநாளை நான் கொண்டாடவில்லை. ஆனாலும் தமிழகம் முழுவதும் நீங்கள் செய்த விஷயங்களை பார்த்துக் கொண்டுதான் இருக்கிறேன். 5,000 பேருக்கும் அதிகமான பேர் ரத்ததானம் பண்ணி இருக்கீங்க. 40 ஆயிரத்துக்கும் அதிகமான மக்கள் உங்களால பயனடைஞ்சுருக்காங்க. இந்த அன்புக்கு ரொம்ப நன்றி.” என நெகிழ்ந்தார்.
கோவை நினைவுகளும் குடும்பத்திற்கான நேரமும்:
“கோயம்புத்தூர் வந்திருப்பதால் ஒரு குட்டி ஃப்ளாஷ் பேக்கிலிருந்து ஆரம்பிக்கலாம். 12-ம் வகுப்பு படிக்கும் வரைக்கும் ஒவ்வொரு விடுமுறையும் கோவையில்தான். கவுண்டம்பாளையத்தில் உள்ள கிராமத்தில்தான் கழியும். போன வருஷம் என் குழந்தைகளை அழைத்து வந்து நான் ஏறி விளையாடிய புளியமரம், குளித்து விளையாடிய கிணறு, குலதெய்வம் கோயில் எல்லாவற்றையும் காட்டினேன்.
இதை எதற்காக சொல்கிறேன் என்றால், நாம் அனைவரும் திரைக்கு (செல்போன்) செலவு செய்யும் நேரத்தை குடும்பத்துக்காக செலவு செய்வதில்லை. இனிமேல் அப்படி இருக்க வேண்டாம். நல்ல நினைவுகளை உருவாக்குவோம்.” என்று அறிவுறுத்தினார்.
‘கருப்பு’ வெற்றி மற்றும் நண்பர்கள் தின வாழ்த்து:
“‘கருப்பு’ படத்துக்கு பிறகு இப்போதுதான் நான் உங்களை பார்க்கிறேன். அதை இவ்வளவு பெரிய வெற்றிப் படமாக்கிய குட்டீஸுக்கும், பெரியவங்களுக்கும் கட்டிப்பிடித்து நன்றி சொல்கிறேன். அந்தப் படத்துக்கு ஒரு பிரச்சினை வந்தபோது உடன் நின்று உதவிய அத்தனை பேருக்கும் நன்றி. படத்தின் நூறாவது நாள் வரப்போகிறது, அதிலும் சந்திப்போம்.
இன்னைக்கு ஃப்ரெண்ஷிப் டே… என் அன்பான ரசிகர்களுக்கு ஹாப்பி ஃப்ரெண்ஷிப் டே. 28 வருஷம் என்னை விட்டுவிடாமல் இந்த இடத்துல நிற்க வைச்சு அழகு பார்க்குறீங்க. உங்களால் மட்டும்தான் நான் இங்க நிற்கிறேன். இதெல்லாம் பண்ண முடியுது.” என்றார்.
ரசிகர்களுக்கான பிரார்த்தனை:
“நான் வந்து நிற்கும் இடம் எனக்கு புரிகிறது. எனக்கு கிடைத்த வெற்றி மாதிரியே பல பல மடங்கு வெற்றி உங்களுக்கு கிடைக்க வேண்டும். நம்பிக்கை மட்டும் இருந்தால் போதும் வாழ்க்கையில் எல்லாம் கிடைக்கும். என்னை இங்கே நிற்க வைச்சு அழகு பார்க்கிற உங்கள் வாழ்க்கையிலும் அதே அளவு வெற்றி கிடைக்க வேண்டும். உங்கள் கனவுகள் எல்லாம் நிறைவேற வேண்டும். அதற்காக நான் வேண்டிக்கொள்கிறேன். இந்த அன்புக்கு ரொம்ப நன்றி” என்று உருக்கமாக உரையை முடித்தார்.
படம் பற்றிய விவரங்கள்:
‘விஸ்வநாத் அண்ட் சன்ஸ்’ படக்குழுவினர், இயக்குநர், தயாரிப்பாளர் என அனைவருக்கும் நன்றி கூறிய சூர்யா, இந்தப் படம் தனக்கு ஓர் அடையாளமாக இருக்கும் என்று கூறினார்.
தனுஷ் நடித்த ‘வாத்தி’, துல்கர் சல்மான் நடித்த ‘லக்கி பாஸ்கர்’ படங்களை இயக்கிய வெங்கி அட்லூரி இப்படத்தை இயக்கியுள்ளார். இந்தப் படத்தில் மமிதா பைஜு, ராதிகா சரத்குமார், ரவீனா டாண்டன் உள்ளிட்ட பலர் முக்கியக் கதாபாத்திரங்களில் நடித்துள்ளனர்.
இந்திய அணியின் ஃபீல்டிங் பயிற்சியாளர் டி. திலீப் விடுவிப்பு: நெகிழ்ச்சியுடன் விடைபெற்றார்!