நடிகர் விஷ்ணு விஷால் தமிழ் சினிமாவின் முன்னணி நடிகர்களில் ஒருவராக வலம் வருபவர். இவர் நடிப்பில் வெளியான ராட்சசன் திரைப்படம் மாபெரும் பிளாக்பஸ்டர் ஹிட் படமாக அமைந்தது. அதைத்தொடர்ந்து பல படங்களில் பிசியாக நடித்து வரும் விஷ்ணு விஷால் ரஜினிகாந்தின் மூத்த மகள் ஐஸ்வர்யா ரஜினிகாந்த் இயக்கத்தில் உருவாகியுள்ள லால் சலாம் திரைப்படத்திலும் நடித்துள்ளார். இப்படம் வருகின்ற பிப்ரவரி 9ம் தேதி வெளியாக இருக்கிறது. இதற்கிடையில் மோகன்தாஸ் ஆர்யன் உள்ளிட்ட படங்கள் விஷ்ணு விஷால் நடிப்பில் உருவாகி வருகின்றன. அதே சமயம் இயக்குனர் கோகுல், இயக்குனர் செல்லா அய்யாவு ஆகியோரின் இயக்கத்தில் அடுத்தடுத்த படங்களில் நடிக்க இருக்கிறார் விஷ்ணு விஷால்.
இந்நிலையில் சமீபத்தில் நடிகர் விஷ்ணு விஷால் தனது சமூக வலைதள பக்கத்தில் பிரபல இயக்குனரும் பாடல் ஆசிரியருமான அருண்ராஜா காமராஜ் இயக்கத்தில் புதிய படம் ஒன்றில் நடிக்க இருப்பதாக அறிவித்திருந்தார். தற்போது இயக்குனர் அருண் ராஜா காமராஜ், இந்த படம் தொடர்பான சில தகவல்களை பகிர்ந்துள்ளார். அதன்படி அவர் கூறியதாவது, “இந்த படம் மிகப்பெரிய பட்ஜெட்டில் உருவாகும் குடும்ப ஆக்சன் படம். ஜூன் அல்லது ஜூலையில் படப்பிடிப்பு தொடங்கும். ஏற்கனவே ஸ்கிரிப்ட் வேலைகள் முடிந்து விட்டது. நடிகர்கள் மற்றும் தொழில்நுட்ப கலைஞர்கள் பற்றிய அறிவிப்பு இந்த மாத இறுதியில் வெளிவரும். என்னுடைய முதல் படமான கனா படத்திற்கு முன்பே விஷ்ணு விஷால் படம் கதையை சொல்லி இருந்தேன். இப்போதுதான் சரியான நேரம் அமைந்துள்ளது” என்று கூறியுள்ளார்.