நகைச்சுவை நடிகரான யோகி பாபு, ரஜினி, சிவகார்த்திகேயன், விஜய் உள்ளிட்ட முன்னணி நடிகர்களுடன் இணைந்து நடித்து வரும் நிலையில் கதாநாயகனாகவும் பல படங்களில் கமிட்டாகி தொடர்ந்து பிசியாக நடித்து வருகிறார். போட், வானவன், பூமர் அங்கிள், மேகி என பல்வேறு படங்களில் நடித்து வருகிறார். நயன்தாராவுடன் இணைந்து மண்ணாங்கட்டி எனும் திரைப்படத்திலும் நடித்து வருகிறார்.
இதற்கிடையில் யோகி பாபு, டென்னிஸ் மஞ்சுநாத் இயக்கத்தில் உருவாகியுள்ள தூக்குதுரை திரைப்படத்தில் நடித்துள்ளார். இந்த படத்தில் யோகி பாபு உடன் இணைந்து நடிகை இனியா, மொட்ட ராஜேந்திரன், சென்ட்ராயன், பால சரவணன் மற்றும் பலர் நடித்துள்ளனர். ஓபன் கேட் என்டர்டெயின்மெண்ட் நிறுவனம் இந்த படத்தை தயாரிக்க ரவி வர்மா ஒளிப்பதிவு செய்துள்ளார். கே எஸ் மனோஜ் இதற்கு இசையமைத்துள்ளார்.
காமெடி கலந்த கதை களத்தில் உருவாகியுள்ள தூக்குதுரை படத்தின் டீசர் சில மாதங்களுக்கு முன்பாக வெளியாகி நல்ல வரவேற்பை பெற்றது. மேலும் சமீபத்தில் இப்படம் வருகின்ற ஜனவரி 25ஆம் தேதி வெளியாக இருப்பதாக பட குழுவினர் அதிகாரப்பூர்வமாக அறிவித்திருந்தனர். இந்நிலையில் இந்த படத்தின் டிரைலர் (ஜனவரி 17) நாளை மாலை 5 மணி அளவில் வெளியாகும் என பட குழுவினரின் சார்பில் புதிய போஸ்டர் ஒன்று வெளியிடப்பட்டு அறிவிக்கப்பட்டுள்ளது.