கேரள மாநிலம் கொச்சியில் மருத்துவர் ஒருவரைத் தாக்கி, அவரிடமிருந்து ரூ.3.25 லட்சம் மதிப்பிலான பொருட்களைப் பறித்ததாக எழுந்த புகாரில் நடிகை அதுல்யா சந்திரா உட்பட மூன்று பேர் கைது செய்யப்பட்டுள்ளனர். இச்சம்பவம் மலையாள திரையுலகில் பரபரப்பை ஏற்படுத்தியுள்ளது.
மருத்துவரை வீட்டிற்கு வரவழைத்ததாக புகார்
கொச்சி வைட்டிலா பகுதியில் உள்ள அடுக்குமாடி குடியிருப்புக்கு, உடல்நலம் பாதிக்கப்பட்ட உறவினருக்கு மருத்துவ உதவி தேவைப்படுவதாகக் கூறி, கடந்த நவம்பர் 2-ஆம் தேதி 41 வயதான மருத்துவர் ஒருவர் வரவழைக்கப்பட்டதாகக் கூறப்படுகிறது.
அங்கு சென்றபோது நடிகை அதுல்யா சந்திரா உள்ளிட்ட சுமார் 12 பேர் இருந்ததாகவும், அவர்கள் மருத்துவரைத் தாக்கி அறையில் அடைத்து வைத்ததாகவும் புகாரில் தெரிவிக்கப்பட்டுள்ளது.
ரூ.3.25 லட்சம் மதிப்பிலான பொருட்கள் பறிப்பு
தாக்குதலின்போது தனது இரண்டு செல்போன்கள், ஸ்மார்ட்வாட்ச் மற்றும் வயர்லெஸ் இயர்போன்கள் ஆகியவற்றைப் பறித்துச் சென்றதாக மருத்துவர் புகார் அளித்துள்ளார். இவற்றின் மொத்த மதிப்பு சுமார் ரூ.3.25 லட்சம் எனக் கூறப்படுகிறது.
மேலும், உறவினருக்கு போதைப்பொருள் கொடுத்து பாலியல் வன்கொடுமை செய்ததாகக் குற்றம்சாட்டி தன்னைத் தாக்கியதாகவும், நடிகை அதுல்யா சந்திரா தகாத வார்த்தைகளால் பேசியதுடன் கொலை மிரட்டல் விடுத்ததாகவும் மருத்துவர் தனது புகாரில் தெரிவித்துள்ளார்.
மூன்று பேர் கைது – போலீசார் விசாரணை
மருத்துவர் அளித்த புகாரின் அடிப்படையில், சட்டவிரோதமாக அடைத்து வைத்தல், தாக்குதல், மிரட்டல் உள்ளிட்ட பிரிவுகளின் கீழ் போலீசார் வழக்குப்பதிவு செய்தனர். இதையடுத்து நடிகை அதுல்யா சந்திரா, நடிகர் மற்றும் தயாரிப்பாளர் பிபின் பெரும்பள்ளி, கே.பி. விஷ்ணு ஆகிய மூன்று பேரை போலீசார் கைது செய்துள்ளனர்.
இந்த வழக்கில் மொத்தம் 12 பேர் தொடர்புடையதாக முதல் தகவல் அறிக்கையில் குறிப்பிடப்பட்டுள்ள நிலையில், மற்றவர்களின் தொடர்பு குறித்தும் போலீசார் விசாரணை நடத்தி வருகின்றனர்.
விசாரணையில் புதிய திருப்பம்
இதற்கிடையே, நடிகையின் உறவினர் ஒருவர் மருத்துவர் மீது பாலியல் வன்கொடுமை புகார் அளித்துள்ளதாகவும் தகவல் வெளியாகியுள்ளது. இதன் அடிப்படையில் மருத்துவர் மீதும் போலீசார் தனியாக வழக்குப்பதிவு செய்து விசாரணை மேற்கொண்டு வருகின்றனர்.
இரு தரப்பினரும் முன்வைத்துள்ள குற்றச்சாட்டுகள் குறித்து போலீசார் தொடர்ந்து விசாரித்து வருகின்றனர். இந்த வழக்கில் குற்றச்சாட்டுகள் நீதிமன்றத்தில் நிரூபிக்கப்பட வேண்டியவை என்பது குறிப்பிடத்தக்கது.
ஞானேஷ் குமாரை பதவி நீக்க வலியுறுத்தி நவம்பர் 7-ல் கொச்சியில் CJP போராட்டம்!