கேரள மாநிலம் வைக்கத்திற்கு அருகே உள்ள அருவிகுத்தி பகுதியில் தமிழ்நாடு அரசு சார்பில் கட்டப்பட்டு வந்த தந்தை பெரியார் நினைவு மண்டபத்தின் கட்டுமானப் பணிகள் திடீரென நிறுத்தப்பட்டுள்ளதாகக் குற்றச்சாட்டு எழுந்துள்ளது.
வரலாற்றுச் சிறப்புமிக்க அருவிகுத்தி சிறை
வைக்கம் போராட்டத்தின் போது தந்தை பெரியார் கைது செய்யப்பட்டு அருவிகுத்தி பகுதியில் உள்ள சிறையில் அடைக்கப்பட்டார். வரலாற்றுச் சிறப்புமிக்க அந்த இடத்தில் அவருக்குப் பெருமை சேர்க்கும் வகையில் நினைவு மண்டபம் அமைக்க முடிவெடுக்கப்பட்டது. இதற்காக, தமிழ்நாடு அரசு சார்பில் வைக்கம் அடுத்த அருவிகுத்தியில் ரூ.4 கோடி மதிப்பீட்டில் பெரியார் நினைவு மண்டபம் அமைப்பதற்கான பணிகள் தொடங்கப்பட்டன. கடந்த 2025-ஆம் ஆண்டு செப்டம்பர் மாதம் இதற்கான அடிக்கல் நாட்டப்பட்டுத் தீவிரமாகப் பணிகள் நடைபெற்று வந்தன.
ஆட்சி மாற்றமும் நிறுத்தப்பட்ட பணிகளும்
இந்நிலையில், தமிழ்நாடு மற்றும் கேரளா ஆகிய இரு மாநிலங்களிலும் ஏற்பட்ட ஆட்சி மாற்றத்தைத் தொடர்ந்து, இந்த நினைவு மண்டபக் கட்டுமானப் பணிகள் பாதியிலேயே நிறுத்தப்பட்டுள்ளன. குறிப்பாக, தமிழக வெற்றிக் கழகம் (தவெக) ஆட்சிக்கு வந்த பிறகு அருவிகுத்தியில் நடைபெற்று வந்த பெரியார் நினைவு மண்டபப் பணிகள் முற்றிலும் முடங்கியுள்ளதாகக் குற்றச்சாட்டு முன்வைக்கப்படுகிறது.
சமூக ஆர்வலர்கள் கவலை
ரூ.4 கோடி செலவில் வரலாற்றுச் சின்னத்தைப் பாதுகாக்கும் நோக்கில் தொடங்கப்பட்ட இத்திட்டம், ஆட்சி மாற்றத்தினால் நிறுத்தப்பட்டிருப்பது பெரியாரிய உணர்வாளர்கள் மற்றும் சமூக ஆர்வலர்கள் மத்தியில் பெரும் அதிர்ச்சியை ஏற்படுத்தியுள்ளது. கைவிடப்பட்ட பணிகளை மீண்டும் தொடங்கி விரைந்து முடிக்க வேண்டும் என்பதே அனைவரின் எதிர்பார்ப்பாக உள்ளது.
நிலநடுக்கத்தால் பாதிக்கப்பட்ட கொலம்பியாவுக்கு 20 டன் நிவாரணப் பொருட்களை அனுப்பி உதவியது இந்தியா!