தீபாவளி பண்டிகை என்றாலே விளக்குகள், இனிப்புகள் மற்றும் உறவினர்கள், நண்பர்களுடன் இணைந்து விளையாடும் பாரம்பரிய விளையாட்டுகளான ரம்மி (Rummy), டீன் பட்டி (Teen Patti) ஆகியவை நினைவுக்கு வரும். ஆனால், இந்த ஆண்டு தலைநகர் டெல்லியின் தீபாவளி விருந்துகளில் புதிய விளையாட்டு ஒன்று கவனம் ஈர்த்து வருகிறது. சீனாவின் பாரம்பரிய பலகை விளையாட்டான ‘மாஜாங்’ (Mahjong), தீபாவளிக் கொண்டாட்டங்களில் புதுவரவாக இடம்பிடித்துள்ளது.
ரம்மிக்கு மாற்றாக மாஜாங்!
பொதுவாக தீபாவளி காலங்களில் குடும்பத்தினரும் நண்பர்களும் ஒன்றுகூடி ரம்மி, டீன் பட்டி போன்ற சீட்டு விளையாட்டுகளை விளையாடுவது வழக்கம். இந்த நிலையில், கட்டைகள் அல்லது சில்லுகளைப் பயன்படுத்தி விளையாடப்படும் மாஜாங், டெல்லிவாசிகளின் கவனத்தை ஈர்த்துள்ளது.
நான்கு பேர் இணைந்து விளையாடும் இந்த விளையாட்டில், ஒரே மாதிரியான கட்டைகளைச் சேகரித்து குறிப்பிட்ட சேர்க்கைகளை உருவாக்க வேண்டும். ரம்மியைப் போலவே உத்தி, கவனம் மற்றும் வேகமாக முடிவெடுக்கும் திறன் ஆகியவை இதில் முக்கியப் பங்கு வகிக்கின்றன. இதனால், பாரம்பரிய சீட்டு விளையாட்டுகளுக்கு மாற்றாகப் புதிய அனுபவத்தை விரும்புவோர் மாஜாங் விளையாட்டில் ஆர்வம் காட்டி வருகின்றனர்.
தீபாவளி விருந்துகளில் புதிய காட்சி
டெல்லியில் நடைபெறும் சில சொகுசு வீட்டு விருந்துகள் மற்றும் தீபாவளிக் கூடுகைகளில், வழக்கமான சீட்டுக்கட்டுகளுக்குப் பதிலாக வண்ணமயமான மாஜாங் கட்டைகள் இடம்பெறுவதாகக் கூறப்படுகிறது. பாரம்பரிய பண்டிகைக் கொண்டாட்டங்களுடன் சர்வதேச விளையாட்டு கலாசாரத்தையும் இணைக்கும் இந்தப் புதிய போக்கு, விருந்தினர்களுக்கு வித்தியாசமான அனுபவத்தை அளிக்கிறது.
ரம்மி, டீன் பட்டி போன்ற விளையாட்டுகளுக்கு மத்தியில் சீனாவின் பாரம்பரிய மாஜாங் விளையாட்டு டெல்லி தீபாவளி விருந்துகளில் பேசுபொருளாக மாறியுள்ளது. இந்தப் புதிய வரவு, பண்டிகைக் கொண்டாட்டங்களில் விளையாட்டு கலாசாரம் எவ்வாறு மாறி வருகிறது என்பதையும் வெளிப்படுத்துகிறது.