ஆப்பிரிக்காவின் உயரமான மலைச் சிகரமான கிளிமஞ்சாரோவில் உள்ள உஹுரு சிகரத்தை 12 மணி நேரம் 46 நிமிடங்களில் அடைந்து இந்திய மலையேற்ற வீராங்கனை கவிதா சந்த் புதிய சாதனை படைத்துள்ளார்.
மேலும், மலையேற்றத்தைத் தொடங்கிய இடத்திற்குத் திரும்புவது உட்பட மொத்தம் 22 மணி நேரம் 36 நிமிடங்களில் பயணத்தை நிறைவு செய்துள்ளார். இதன் மூலம் கிளிமஞ்சாரோ மலையின் முழுப் பயணத்தையும் 24 மணி நேரத்திற்குள் நிறைவு செய்த முதல் இந்தியர் என்ற பெருமையைப் பெற்றுள்ளார்.
5,895 மீட்டர் உயரத்தில் சாதனை
தான்சானியாவில் அமைந்துள்ள கிளிமஞ்சாரோ மலையின் உஹுரு சிகரம் கடல் மட்டத்திலிருந்து 5,895 மீட்டர் உயரத்தில் உள்ளது. கவிதா சந்த், ம்வேகா கேட் முதல் உஹுரு சிகரம் வரை சென்று மீண்டும் ம்வேகா கேட் திரும்பும் பாதையில் இந்தச் சாதனையை நிகழ்த்தியுள்ளார்.
பொதுவாக கிளிமஞ்சாரோ மலையில் ஏறி இறங்குவதற்கு உடல் உயரத்திற்குப் பழகுவதற்காக 5 முதல் 9 நாட்கள் வரை எடுத்துக்கொள்ளப்படும். ஆனால், கவிதா சந்த் 22 மணி நேரம் 36 நிமிடங்களில் முழுப் பயணத்தையும் முடித்துள்ளார்.
கடுமையான பயிற்சிக்குப் பிறகு சாதனை
இந்தச் சாதனைக்காக அவர் தீவிரமான உடற்பயிற்சிகளை மேற்கொண்டுள்ளார். அக்டோபர் 11-ஆம் தேதி நடைபெற்ற சிகாகோ மாரத்தானுக்காக மூன்று மாதங்கள் பயிற்சி எடுத்துள்ளார். வாரந்தோறும் சுமார் 70 முதல் 90 கிலோமீட்டர் வரை ஓடியதுடன், வாரத்திற்கு மூன்று முறை வலிமைப் பயிற்சிகளையும் செய்துள்ளார். அந்த மாரத்தானில் இந்தியப் பெண்களில் மூன்றாவது வேகமான வீராங்கனையாகவும் அவர் திகழ்ந்தார்.
இதனைத் தொடர்ந்து நேபாளத்தில் உள்ள 7,126 மீட்டர் உயரம் கொண்ட ஹிம்லுங் ஹிமால் மலையேற்றத்திலும் பங்கேற்றார். அந்த மலையின் உச்சியை அடைய முடியாவிட்டாலும், சுமார் 6,600 மீட்டர் உயரம் வரை சென்று உயரமான மலைப்பகுதியில் ஏறுவதற்கான அனுபவத்தைப் பெற்றார்.
ஏழு உச்சிமலைகள் பயணம்
ஏழு கண்டங்களிலும் உள்ள உயரமான மலைச் சிகரங்களை அடைவதை இலக்காகக் கொண்ட தனது ‘Seven Summits’ பயணத்தில் கிளிமஞ்சாரோ கவிதா சந்த் ஏறிய ஐந்தாவது மலையாகும்.
இதற்கு முன்பு எல்ப்ரஸ், டெனாலி, வின்சன், அகான்காகுவா ஆகிய மலைகளிலும் அவர் ஏறியுள்ளார். மேலும், ஆறு முக்கிய உலக மாரத்தான்களில் ஐந்தையும் நிறைவு செய்துள்ளார்.
இந்த மலையேற்றத்திற்கான வழித்தடத் திட்டமிடல், பாதுகாப்பு ஏற்பாடுகள் உள்ளிட்ட பணிகளை ‘Boots & Crampons’ குழுவினர் ஒருங்கிணைத்தனர். கவிதா சந்தின் இந்தச் சாதனை இந்திய மலையேற்றத் துறையில் முக்கியமான மைல்கல்லாகப் பார்க்கப்படுகிறது.