மத்திய அரசின் E20 எரிபொருள் கொள்கை மற்றும் கரும்பு சாறு எத்தனால் உற்பத்திக்குத் திசைதிருப்பப்பட்டதன் காரணமாகவே நாட்டில் சர்க்கரை விலை கிடுகிடுவென உயர்ந்துள்ளதாக ஆம் ஆத்மி கட்சியின் தேசிய ஒருங்கிணைப்பாளர் அரவிந்த் கெஜ்ரிவால் குற்றம் சாட்டியுள்ளார். மேலும், இந்த E20 கலப்பு எரிபொருளால் வாகனங்களின் இன்ஜின்கள் பாதிக்கப்படுவதாகவும், பொதுமக்கள் கடும் அவதிக்குள்ளாகி இருப்பதாகவும் அவர் கடுமையாக விமர்சித்துள்ளார்.
கோவாவில் செய்தியாளர்களைச் சந்தித்துப் பேசிய முன்னாள் டெல்லி முதல்வருமான அரவிந்த் கெஜ்ரிவால், மத்திய அரசின் இந்த வரிசைப்படுத்தப்பட்ட எரிபொருள் கொள்கைக்கு எதிராகக் கண்டனம் தெரிவித்தார். அப்போது அவர் பேசிய முக்கிய விவரங்கள்:
சர்க்கரை விலையில் கடும் உயர்வு:
எத்தனால் உற்பதிக்காக சுமார் 25 லட்சம் டன் கரும்பு திசைதிருப்பப்பட்டுள்ளதாகக் குறிப்பிட்ட கெஜ்ரிவால், இதன் விளைவாகச் சர்க்கரை தட்டுப்பாடு ஏற்பட்டு விலை அதிரடியாக உயர்ந்துள்ளதாகத் தெரிவித்தார். நாட்டின் பல பகுதிகளில் சர்க்கரை விலை கணிசமாக அதிகரித்துள்ளதால் பொதுமக்களின் மாதாந்திர பட்ஜெட் கடுமையாகப் பாதிக்கப்பட்டுள்ளதாக அவர் சுட்டிக்காட்டினார்.
பெட்ரோல் இறக்குமதியைக் குறைக்க எத்தனால் கலப்பு உதவக்கூடும் எனக் கூறப்பட்டாலும், வெளிநாட்டுச் செலாவணியை மிச்சப்படுத்தியதாகக் கூறிவிட்டு, அதே செலவைக் கொண்டு வெளிநாடுகளில் இருந்து சர்க்கரையை இறக்குமதி செய்ய வேண்டிய சூழல் ஏற்பட்டுள்ளதாக அவர் குற்றம் சாட்டினார். இதனால் வெளிநாட்டுச் செலாவணி சேமிப்பு என்ற பெயரில் எந்தப் பயனும் ஏற்படவில்லை என்றார்.
வாகனப் பாதுகாப்பு மற்றும் E20 எரிபொருள் குறித்த கவலைகள்:
E20 எனப்படும் 20 சதவீத எத்தனால் கலந்த பெட்ரோல் பயன்பாட்டினால் வாகனங்களின் என்ஜின்கள் பழுதடைவதாகவும், வாகனங்களின் மைலேஜ் (Mileage) வெகுவாகக் குறைந்துள்ளதாகவும் பொதுமக்களிடமிருந்து தங்களுக்குப் பெரும் அளவில் புகார்கள் வந்துள்ளதாக கெஜ்ரிவால் தெரிவித்தார். வாகன உரிமையாளர்களைப் பெரிதும் சிரமப்படுத்தும் இந்தத் தரமற்ற அல்லது கலப்படமான எரிபொருள் கொள்கையை மத்திய அரசு அவசரமாக அமல்படுத்தியுள்ளதாக அவர் சாடினார்.
மேலும், இது தொடர்பான விவாதங்களை முன்னெடுக்கவும், பொதுமக்களின் கருத்துகளைக் கேட்கவும் ஆம் ஆத்மி கட்சி சார்பில் சிறப்பு ‘டவுன் ஹால்’ (Town hall) கூட்டம் நடத்தப்பட உள்ளதாகவும், பொதுமக்கள் தங்களது குறைகளைப் பகிர்ந்து கொள்ள பிரத்யேக வாட்ஸ்அப் (WhatsApp) எண் வெளியிடப்பட்டுள்ளதாகவும் அவர் அறிவித்தார்.
மத்திய அரசின் இந்தக் கொள்கை மாற்றங்கள் குறித்து வாகன உற்பத்தியாளர்களும் பொதுமக்களும் எழுப்பும் நியாயமான கேள்விகளுக்கு அரசு பதிலளிக்க வேண்டும் என்றும் கெஜ்ரிவால் வலியுறுத்தியுள்ளார்.