இடதுசாரி அமைப்பைச் சேர்ந்த மாணவர் இயக்குநர் மீதான தாக்குதலைக் கண்டித்தும், சர்ச்சைக்குரிய சுற்றறிக்கையை வெளியிட்ட தமிழகத் தலைமைச் செயலாளர் மீது உடனடி நடவடிக்கை எடுக்க வலியுறுத்தியும், மதுரை முனிச்சாலை சந்திப்பில் மார்க்சிஸ்ட் கம்யூனிஸ்ட் கட்சி (சிபிஎம்) சார்பில் மாபெரும் கண்டன ஆர்ப்பாட்டம் நடைபெற்றது.
ஆர்ப்பாட்டத்தில் சு.வெங்கடேசன் எம்.பி பேசிய முக்கிய அம்சங்கள்:
டெல்லி உத்தரவின் தொடர்ச்சி: டெல்லியில் மாணவர்களின் தொடர் போராட்டங்களால் மத்திய அரசு ஸ்தம்பித்ததன் தொடர்ச்சியாகவே, பல்கலைக்கழக மாணவர் போராட்டங்களைக் கட்டுப்படுத்தும் நோக்கில் இந்த உத்தரவுகள் பிறப்பிக்கப்பட்டுள்ளன. தமிழகத் தலைமைச் செயலாளரின் ஆலோசனைக் கூட்டத்திற்குப் பின்னரே இது அனைத்துக் கல்லூரிகளுக்கும் சுற்றறிக்கையாக அனுப்பப்பட்டுள்ளது.
ஆர்.எஸ்.எஸ் பின்னணி: டெல்லியில் உள்ள ஆர்.எஸ்.எஸ் அமைப்பின் தூண்டுதலின் பேரிலேயே இந்த ஒடுக்குமுறை உத்தரவுகள் தமிழ்நாட்டிலும் கொண்டுவரப்பட்டு நடைமுறைப்படுத்தப்படுகின்றன.
அதிர்ச்சி அளிக்கும் சுற்றறிக்கை: தலைமைச் செயலாளர் வெளியிட்டுள்ள உத்தரவில் இடதுசாரி மற்றும் மாணவர் அமைப்புகளின் பெயர்கள் குறிப்பாகக் குறிப்பிடப்பட்டுள்ளன. “கம்யூனிஸ்ட் இயக்கம் என்ன தடை செய்யப்பட்ட இயக்கமா? எங்களது போராட்டத்தில் மாணவர்கள் பங்கேற்கக் கூடாது எனச் சொல்ல இவர்கள் யார்?” என அவர் காட்டமாகக் கேள்வி எழுப்பினார்.
அமைச்சரின் முரண்பட்ட விளக்கம்: சட்டமன்றத்தில் உயர்கல்வித்துறை அமைச்சர் பேசுையில், சுற்றறிக்கையில் சில வார்த்தைகள் தவறுதலாக இடம்பெற்றுவிட்டதாகக் கூறினார். ஆனால், அது தவறுதலான வார்த்தை அல்ல; ஒட்டுமொத்த சுற்றறிக்கையே தவறானது. இதுகுறித்துத் தலைமைச் செயலாளரிடம்தான் விளக்கம் கேட்கப்பட வேண்டும்.
ராகுல் காந்தியின் முன்னுதாரணம்: டெல்லி பல்கலைக்கழகத்தின் அடக்குமுறை உத்தரவுகளை எதிர்த்து ராகுல் காந்தி போன்ற தலைவர்கள் களத்தில் நின்று போராடும் நிலையில், தமிழகத்தில் தவறான சுற்றறிக்கையைத் தடுத்து நிறுத்த வேண்டிய அமைச்சகம் அதை நியாயப்படுத்த முயல்வது கடும் கண்டனத்திற்குரியது.
தமிழகத்தில் உண்மையான ‘கருப்பு ஆடு’ யார் என்பது மக்களுக்கு விரைவில் தெரியவரும் என்றும், மாநிலத்தின் கல்வித் துறையைக் காவிமயமாக்கும் மத்திய அரசின் இத்தகைய முயற்சிகளுக்குத் தமிழக அரசு ஒருபோதும் உடந்தையாக இருக்கக் கூடாது என்றும் போராட்டத்தில் பங்கேற்றவர்கள் வலியுறுத்தினர்.
ஆளும் த.வெ.க அரசு மீது சிபிஎம் பாய்ச்சல்: தலைமைச் செயலாளரை தூக்கக் கோரி பெ.சண்முகம் ஆவேசம்!