முதல்வர் விஜய் உடன் இடதுசாரி தலைவர்கள் சந்திப்பு: காவிரி, தொழிலாளர் நலன் குறித்து 30 நிமிடம் தீவிர ஆலோசனை!
தொழிலாளர்கள் போராடாத சூழ்நிலையை நமது அரசு உருவாக்கும் என முதலமைச்சர் உறுதி; நீர்வளத்துறை அமைச்சர் என். ஆனந்த், பொதுப்பணித்துறை அமைச்சர் ஆதவ் அர்ஜுனா பங்கேற்பு.
இந்தியக் கம்யூனிஸ்டு கட்சி (சிபிஐ) மற்றும் இந்தியக் கம்யூனிஸ்டு கட்சி (மார்க்சிஸ்டு) ஆகிய இரு இடதுசாரி கட்சிகளின் தமிழ்நாடு மாநிலத் தலைவர்கள், முதலமைச்சர் திரு. ச. ஜோசப் விஜய் அவர்களை இன்று புதன்கிழமை காலை தலைமைச் செயலகத்தில் நேரில் சந்தித்தனர். சுமார் 30 நிமிடங்கள் நீடித்த இந்தச் சந்திப்பில், தமிழகத்தின் வாழ்வாதாரப் பிரச்சினைகள் மற்றும் தொழிலாளர் நலன்கள் குறித்து விரிவாக விவாதிக்கப்பட்டது.
இது தொடர்பாக இந்தியக் கம்யூனிஸ்ட் கட்சி மாநிலச் செயலாளர் மு. வீரபாண்டியன் விடுத்துள்ள செய்தி அறிக்கையில் கூறப்பட்டிருப்பதாவது:
தொழிலாளர் பாதுகாப்பு மற்றும் விபி ஜி ராம்ஜி திட்டம்
ஒன்றிய அரசு கொண்டுவந்துள்ள நான்கு சட்டத் தொகுப்புகளால் தொழிலாளர்களுக்கு ஏற்படும் பாதிப்புகள் குறித்து முதலமைச்சரின் கவனத்திற்கு கொண்டு செல்லப்பட்டது. ஒப்பந்த மற்றும் அவுட்சோர்சிங் முறையில் பணிப்பாதுகாப்பற்ற நிலையில் உள்ள தொழிலாளர்களைப் பணி நிரந்தரம் செய்ய வேண்டும் என்றும், புலம்பெயர் தொழிலாளர்களின் துயரங்களுக்குத் தீர்வு காண வேண்டும் என்றும் வலியுறுத்தப்பட்டது.
மேலும், ஒன்றிய அரசின் விபி ஜி ராம்ஜி திட்டத்தால் மாநில அரசுக்கு ஏற்படும் கூடுதல் நிதிச்சுமை மற்றும் தொழிலாளர்களின் சட்டப்பூர்வ வேலை உரிமைகள் பாதிக்கப்படுவது குறித்தும் எடுத்துரைக்கப்பட்டது.
மேகதாது விவகாரம்: அனைத்துக் கட்சிக் கூட்டத்திற்கு கோரிக்கை
காவிரி நதிநீர் பங்கீட்டில் மேகதாது அணை கட்டும் விவகாரம் தற்போது தீவிரமடைந்துள்ளது. இது தொடர்பாக அண்மையில் சட்டப்பேரவையில் நிறைவேற்றப்பட்ட தீர்மானத்தில் “நடுவர் மன்றம்“ அமைக்க வேண்டும் என்ற திருத்தம் சேர்க்கப்பட்டதால் பல்வேறு சந்தேகங்கள் எழுந்துள்ளன.
எனவே, இந்த விவகாரத்தில் அரசு உடனடியாக அனைத்து அரசியல் கட்சிகள் மற்றும் விவசாயிகள் சங்கப் பிரதிநிதிகளின் கூட்டத்தைக் கூட்டி, ஒருமித்த கருத்தை உருவாக்க வேண்டும் என இடதுசாரி தலைவர்கள் கேட்டுக்கொண்டனர்.
பெண்கள் பாதுகாப்பு மற்றும் சுற்றுலா மேம்பாடு
பெண்கள் மற்றும் குழந்தைகள் மீதான தாக்குதல்களைத் தடுக்க ‘சிங்கப் பெண்’ சிறப்புப் படைக்கு பிரத்யேக பயிற்சி அளிக்க வேண்டியதன் அவசியம் குறித்து வலியுறுத்தப்பட்டது. அத்துடன், தமிழகம் முழுவதும் உள்ள சுற்றுலா மையங்களை மேம்படுத்துவதன் மூலம் புதிய வேலைவாய்ப்புகளை உருவாக்குவதற்கான சாத்தியக்கூறுகளும் முதலமைச்சரிடம் விவரிக்கப்பட்டன.
மேலும், தங்களின் வாழ்வாதாரக் கோரிக்கைகளுக்காகத் தொழிலாளர்கள் போராடும் போது, காவல்துறையின் அணுகுமுறை அவர்களுக்குப் பாதுகாப்பு அளிப்பதாக இருக்க வேண்டும் என்றும் கேட்டுக்கொள்ளப்பட்டது.
“நமது ஆட்சியில் போராட்டங்கள் இல்லாத சூழல் ஏற்படும்” – முதலமைச்சர் விஜய் உறுதி
இடதுசாரி தலைவர்களின் கருத்துக்களைக் கவனமுடன் கேட்டறிந்த முதலமைச்சர் திரு. ச. ஜோசப் விஜய், “கோரிக்கைகளுக்காக முந்தைய காலங்களில் போராடியதை இங்கு குறிப்பிட்டீர்கள், நமது ஆட்சியில் போராட்டங்கள் நடைபெறாத சூழல் ஏற்படும்” என உறுதியளித்தார். மேலும், மக்கள் நலன் சார்ந்த கோரிக்கைகளைத் தனது கவனத்திற்குக் கொண்டு வர எப்போது வேண்டுமானாலும் வரலாம் எனக் குறிப்பிட்ட அவர், முன்வைக்கப்பட்ட கருத்துக்கள் மீது உரிய நடவடிக்கை எடுக்கப்படும் எனத் தெரிவித்தார்.
பங்கேற்ற அமைச்சர்கள் மற்றும் தலைவர்கள்
இந்த உயர்மட்டச் சந்திப்பின் போது, தமிழ்நாடு அரசின் ஊரக வளர்ச்சி மற்றும் நீர்வளத்துறை அமைச்சர் திரு. என். ஆனந்த், பொதுப்பணி மற்றும் விளையாட்டு மேம்பாட்டுத் துறை அமைச்சர் திரு. ஆதவ் அர்ஜுனா ஆகியோர் உடனிருந்தனர்.
இடதுசாரிகள் தரப்பில், சிபிஐ(எம்) சார்பில் மாநிலச் செயலாளர் பெ. சண்முகம், அரசியல் தலைமைக் குழு உறுப்பினர்கள் கே. பாலகிருஷ்ணன், உ. வாசுகி, என். குணசேகரன், கே. கனகராஜ் ஆகியோரும், சிபிஐ சார்பில் மாநிலச் செயலாளர் மு. வீரபாண்டியன், தேசிய நிர்வாகக் குழு உறுப்பினர் டி. எம். மூர்த்தி, மாநிலத் துணைச் செயலாளர்கள் நா. பெரியசாமி, எம். ரவி மற்றும் தேசியக் குழு உறுப்பினர் எம். செல்வராஜ் ஆகியோரும் கலந்துகொண்டனர்.