சென்னை பெசன்ட் நகர் கடற்கரையில் நடைபெறவிருந்த நீட் எதிர்ப்புப் போராளி மாணவி அனிதாவின் 9-ஆம் ஆண்டு நினைவேந்தல் நிகழ்வுக்குத் த.வெ.க அரசு அனுமதி மறுத்துள்ளது பெரும் கொந்தளிப்பை ஏற்படுத்தியுள்ளது. அரசின் இந்த நடவடிக்கைக்குத் தமிழ்நாடு மாணவர் இளைஞர் கூட்டமைப்பு தனது பலத்த கண்டனத்தைப் பதிவு செய்துள்ளது.
கடைசி நேரத்தில் தடுத்து நிறுத்திய காவல்துறை
மருத்துவப் படிப்புக்கான நீட் தேர்வுக்கு எதிராகப் போராடி உயிர்த்தியாகம் செய்த அரியலூர் மாணவி அனிதாவின் 9-ஆம் ஆண்டு நினைவேந்தல் நிகழ்வைச் சென்னை பெசன்ட் நகர் கடற்கரையில் நடத்த அமைப்பாளர்கள் திட்டமிட்டிருந்தனர். ஆனால், இந்நிகழ்வுக்குக் காவல்துறை திடீரென அனுமதி மறுத்துத் தடுத்து நிறுத்தியுள்ளது. மாற்று இடத்தை ஏற்பாடு செய்வதற்குக்கூட போதிய கால அவகாசம் வழங்காமல், வரலாற்றுச் சிறப்புமிக்க ஒரு நினைவேந்தல் நிகழ்வைக் கடைசி நேரத்தில் ரத்து செய்ய வைத்தது ஜனநாயகத்திற்கு எதிரானது எனச் சமூக ஆர்வலர்கள் சுட்டிக்காட்டுகின்றனர்.
மாணவர் இளைஞர் கூட்டமைப்பு கொந்தளிப்பு
இதுகுறித்துத் தமிழ்நாடு மாணவர் இளைஞர் கூட்டமைப்பு வெளியிட்டுள்ள அறிக்கையில், “நீட் தேர்வுக்கு எதிரான போராட்டத்தின் முகமாகத் திகழும் தங்கை அனிதாவின் நினைவேந்தலைத் தடுக்க நினைப்பது எந்த வகையில் நியாயமான நடைமுறையாகும்? மாற்று இடம் தேர்வு செய்யக்கூட அவகாசம் தராமல் காவல்துறையை வைத்து அதிகாரத்தை துஷ்பிரயோகம் செய்வது ஏற்றுக்கொள்ள முடியாதது” எனத் தெரிவிக்கப்பட்டுள்ளது. மேலும், கல்வி உரிமைக்காக உயிரைக் கொடுத்த ஒரு மாணவியின் நினைவைப் போற்றும் நிகழ்வுக்கு அனுமதி மறுத்த த.வெ.க அரசின் இந்த நடைமுறைக்கு அமைப்பின் சார்பில் கடுமையான கண்டனங்கள் தெரிவிக்கப்பட்டுள்ளன.
சேலத்தில் உற்சாக வரவேற்பு: மேட்டூர் அணையைத் திறந்து வைத்த முதலமைச்சர் விஜய்