தமிழ்நாடு சட்டமன்றப் பேரவையில் நடைபெற்ற விவாதத்தின் போது, நெய்வேலி பழுப்பு நிலக்கரி நிறுவனமான என்.எல்.சி (NLC) தமிழ்நாட்டிற்கு இனி தேவையில்லை என்றும், மேலதிக நிலக் கையகப்படுத்துதலை மாநில அரசு அனுமதிக்கக் கூடாது என்றும் பாமக சட்டமன்ற உறுப்பினர் சௌமியா அன்புமணி வலியுறுத்திப் பேசினார்.
“மின்மிகை மாநிலமான தமிழ்நாட்டிற்கு என்.எல்.சி தேவையில்லை”
சட்டப்பேரவையில் உரையாற்றிய பாமக எம்.எல்.ஏ சௌமியா அன்புமணி, “என்.எல்.சி நிறுவனத்தில் இருந்து தமிழ்நாட்டிற்கு வெறும் 2,000 மெகாவாட் மின்சாரம் மட்டுமே கிடைக்கிறது. தற்போது தமிழ்நாடு மின்மிகை மாநிலமாக உருவெடுத்துள்ள நிலையில், இனி இத்தகைய ஒரு நிறுவனத்தின் தேவை தமிழ்நாட்டிற்கு முற்றிலும் இல்லை” என்று குறிப்பிட்டார்.
60 ஆயிரம் ஏக்கர் நிலக் கையகப்படுத்துதலுக்கு எதிர்ப்பு
தொடர்ந்து பேசிய அவர், என்.எல்.சி நிறுவனத்தால் ஏற்கனவே 40 ஆயிரம் ஏக்கர் விவசாய நிலங்கள் அழிக்கப்பட்டுப் பாழாகியுள்ளன என்றும், தற்போது மேலும் 60 ஆயிரம் ஏக்கர் நிலத்தைக் கையகப்படுத்த தீவிர முயற்சிகள் மேற்கொள்ளப்பட்டு வருகின்றன என்றும் சுட்டிக்காட்டினார். மக்களின் வாழ்வாதாரத்தையும் விவசாய நிலங்களையும் அளிக்கும் இந்த நிலக் கையகப்படுத்தும் நடவடிக்கைக்குத் தமிழ்நாடு அரசு எக்காரணம் கொண்டும் அனுமதி வழங்கக் கூடாது என அவர் கேட்டுக் கொண்டார்.
சி.எஸ்.ஆர் நிதி பயன்பாடு குறித்த கோரிக்கை
மேலும், என்.எல்.சி நிறுவனம் தனது சமூகப் பொறுப்புணர்வு நிதி (CSR Fund) மூலம் தமிழ்நாட்டின் உள்கட்டமைப்பை மேம்படுத்த வேண்டும் என வலியுறுத்திய அவர், அந்த நிதியைப் பயன்படுத்தி மாநிலத்தின் பல்வேறு பகுதிகளில் தடுப்பணைகள் மற்றும் நெல் சேமிப்புக் கிடங்குகளைக் கட்டித் தருமாறு என்.எல்.சி நிர்வாகத்திடம் அரசு வலியுறுத்த வேண்டும் என்ற கோரிக்கையையும் முன்வைத்தார்.