சமீபத்தில் தாக்கல் செய்யப்பட்ட புதிய அரசின் நிதிநிலை அறிக்கை (பட்ஜெட்) மீது எதிர்க்கட்சிகள் மற்றும் அரசியல் தலைவர்கள் மத்தியில் கடும் விமர்சனங்கள் எழுந்துள்ளன. இதுகுறித்து முன்னாள் அமைச்சர் தங்கம் தென்னரசு செய்தியாளர்களைச் சந்தித்துப் பேசுகையில், தற்போதைய அரசின் பட்ஜெட் மற்றும் நிதி நிர்வாகத் திறமை குறித்துக் கடுமையான கேள்விகளை எழுப்பினார்.
கடன் சுமை குறித்த வாதமும் எதிர்கால அச்சமும்
முந்தைய திமுக ஆட்சியின் மீது அதிக கடன் சுமை உள்ளதாகத் தற்போதைய அரசு குற்றஞ்சாட்டுவது குறித்துப் பேசிய தங்கம் தென்னரசு, “10 லட்சம் கோடி ரூபாய் கடனை முழுமையாகக் கட்டிவிட்டு, அதன் பிறகு வருமானத்தைப் பெருக்கிச் செயல்படுவோம் என்று கூறுவது நிதி நிர்வாகத்தின் அடிப்படைக்கூடப் புரிந்து கொள்ளாமல் பேசுவதாகும்” எனக் சாடினார். மேலும், ஐந்து வருட முடிவில் இந்த அரசின் கடன் சுமை இருமடங்காகி 20 லட்சம் கோடி ரூபாயாக உயரும் என்பதே யதார்த்த நிலை என அவர் எச்சரித்தார்.
பள்ளிக்கல்வித்துறை நிதி ஒதுக்கீடு சர்ச்சை
பள்ளிக்கல்வித்துறைக்கு ஒதுக்கப்பட்ட நிதி மற்றும் உள்கட்டமைப்புத் திட்டங்கள் குறித்துப் புதிய அரசு எழுப்பிய குற்றச்சாட்டுகளுக்குப் பதிலளித்த அவர், ‘சூப்பர் சேஃப்டி, சூப்பர் இன்ஃப்ராஸ்ட்ரக்சர்’ என்ற பெயரில் முதல்கட்டமாக 10,000 பள்ளிகளுக்கு ரூ.132 கோடி மட்டுமே ஒதுக்கப்பட்டுள்ளது என்றார். இதன்படி பார்த்தால் ஒரு பள்ளிக்குச் சராசரியாக ஒன்றரை லட்சம் ரூபாய்க்கும் குறைவான தொகையே கிடைக்கிறது. இவ்வளவு சிறிய தொகையைக் கொண்டு பள்ளிகளில் தூய்மை, பாதுகாப்பு மற்றும் அடிப்படை உள்கட்டமைப்புப் பணிகளை எவ்வாறு முழுமையாகச் செய்ய முடியும் என்றும் அவர் கேள்வி எழுப்பினார்.
தொடர்ந்து பேசிய அவர், முந்தைய திமுக ஆட்சியில் ‘பேராசிரியர் அன்பழகன் கல்வி மேம்பாட்டுத் திட்டத்தின்’ கீழ் கோடிக்கணக்கான ரூபாய் நிதி ஒதுக்கீடு செய்யப்பட்டு, பள்ளிகளில் வகுப்பறைகள், ஆய்வகங்கள் மற்றும் கழிப்பறை வசதிகள் போன்ற பெருமளவிலான உள்கட்டமைப்புப் பணிகள் வெற்றிகரமாகச் செயல்படுத்தப்பட்டு அன்றைய முதல்வரால் திறந்து வைக்கப்பட்டதைச் சுட்டிக்காட்டினார்.
முந்தைய திட்டங்களின் தொடர்ச்சியும் தவறான குற்றச்சாட்டுகளும்
தற்போதைய பட்ஜெட்டிலேயே முந்தைய அரசுகளின் திட்டங்களாலும், சமூகநீதித் திட்டங்களாலும் ஏற்பட்ட நன்மைகளைத் தொடர்வதாக இந்த அரசு ஒப்புக்கொண்டுள்ளது. மக்கள் நலனுக்காக வாங்கப்பட்ட கடன்களால்தான் இந்த வளர்ச்சி ஏற்பட்டுள்ளது என்பதற்கு இந்தச் சேர்க்கையே சான்றாக உள்ளது என்று அவர் குறிப்பிட்டார். மேலும், நிதி பற்றாக்குறை மற்றும் கணக்கீடுகள் குறித்துத் தற்போதைய நிதி அமைச்சர் வைக்கும் குற்றச்சாட்டுகள், தங்களது இயலாமையை மறைப்பதற்காக உருவாக்கப்படும் ஒரு தவறான பிரசாரப் போக்கே (Narrative) ஆகும் என்றும் அவர் சாடினார்.
சட்டமன்றத்தில் காரசார விவாதம் நடைபெறும் என எச்சரிக்கை
மீனவர் நல உதவித்தொகை குறைப்பு மற்றும் பெண்கள் பாதுகாப்புத் திட்டங்கள் குறித்த நிதி ஒதுக்கீடுகள் இந்த பட்ஜெட்டில் விடுபட்டுள்ளதாகக் சுட்டிக்காட்டிய தங்கம் தென்னரசு, பொதுமக்கள் மற்றும் அனைத்துத் தரப்பினரின் எதிர்பார்ப்புகளையும் பூர்த்தி செய்யத் தவறிய இந்த பட்ஜெட் குறித்து வரவிருக்கும் சட்டமன்ற விவாதங்களில் விரிவாகப் பேசப்படும் எனத் தெரிவித்தார்.
“முடிஞ்சா என் மேல வழக்கு போடுங்க!” – முதல்வர் விஜய்யை கடுமையாகச் சாடிய ஆலிம் அல் புகாரி!