சென்னை மீனம்பாக்கம் விமான நிலையத்தை எதிர்காலத்தில் மேலும் விரிவாக்கம் செய்ய முடியாது என்றும், பரந்தூர் புதிய பசுமைப் பூங்கா விமான நிலையம் அமைக்கப்படுவதன் மூலம் ஒவ்வொரு பயணத்தின் போதும் தமிழ்நாடு அரசுக்கு கணிசமான வருவாய் கிடைக்கும் என்றும் தொழில்துறை முன்னாள் அமைச்சர் டி.ஆர்.பி. ராஜா தெரிவித்துள்ளார்.
மீனம்பாக்கம் விரிவாக்கம் சாத்தியமில்லை
சென்னை விமான நிலைய நிலவரம் குறித்துப் பேசிய டி.ஆர்.பி. ராஜா, “மீனம்பாக்கம் விமான நிலையம் அமைந்துள்ள நிலப்பரப்பு மற்றும் அதனைச் சுற்றியுள்ள நகர்ப்புறக் குடியிருப்புகள் காரணமாக, அதனை எந்தக் காலத்திலும் மேலும் விரிவாக்கம் செய்ய இயலாது. தவிர, அது தமிழ்நாடு அரசின் முழுமையான கட்டுப்பாட்டில் உள்ள விமான நிலையமும் அல்ல” என்று சுட்டிக்காட்டினார்.
மாநில அரசுக்குக் கிடைக்கும் வருவாய்
பரந்தூர் திட்டத்தின் முக்கியத்துவத்தை விளக்கிய அவர், “பரந்தூரில் கட்டப்படவுள்ள புதிய பன்னாட்டு விமான நிலையம் மாநிலத்தின் எதிர்காலத் தொழில் வளர்ச்சிக்கு மிக முக்கியமானது.
பரந்தூர் விமான நிலையத்தில் பயணம் செய்யும் ஒவ்வொரு பயணியின் பயணத்தின் மூலமாகவும் தமிழ்நாடு அரசுக்கு நேரடியாகவும் மறைமுகமாகவும் கணிசமான வருவாய் கிடைக்கும் என்று குறிப்பிட்டார்.
மாநிலத்தின் பொருளாதார இலக்குகளை அடைவதற்கும் புதிய வேலைவாய்ப்புகளை உருவாக்குவதற்கும் பரந்தூர் விமான நிலையத் திட்டம் மிக அவசியமானது என்றும் அவர் மேலும் வலியுறுத்தினார்.