“இன்றைக்கு மக்களுக்கான களப் போராளிகளைக் கொண்டாடுவதைவிட, இன்ஸ்டாகிராமில் ரீல்ஸ் எடுக்கும் போராளிகளைத்தான் இந்தச் சமூகம் அதிகமாகக் கொண்டாடி வருகிறது” என்று சட்டமன்ற எதிர்க்கட்சித் தலைவர் உதயநிதி ஸ்டாலின் வேதனைத் தெரிவித்துள்ளார்.
சென்னை பழைய வண்ணாரப்பேட்டையில், ‘உதவும் கைகள்’ அறக்கட்டளை மற்றும் திணை நிலவாசிகள் இணைந்து நடத்திய தகைசால் தமிழர் தோழர் இரா.நல்லகண்ணு உருவச்சிலை திறப்பு விழா நடைபெற்றது. இந்நிகழ்வில் சட்டமன்ற எதிர்க்கட்சித் தலைவர் உதயநிதி ஸ்டாலின் சிறப்பு விருந்தினராகக் கலந்துகொண்டு நல்லகண்ணுவின் சிலையைத் திறந்து வைத்துப் உரையாற்றினார். இந்திய கம்யூனிஸ்ட் கட்சியின் மாநில செயலாளர் வீரபாண்டியன் உள்ளிட்ட பல முக்கியப் பிரமுகர்களும் இவ்விழாவில் பங்கேற்றனர்.
உதயநிதி ஸ்டாலின் உரையின் முக்கிய அம்சங்கள்:
களப் போராளிகள் vs ரீல்ஸ் போராளிகள்:
நிகழ்ச்சியில் பேசிய அவர், சமூக ஊடகங்களின் தாக்கம் குறித்துக் குறிப்பிடுகையில், உண்மையான மக்கள் பிரச்சினைகளுக்காகத் தங்களது வாழ்நாளை அர்ப்பணித்து களத்தில் நிற்கும் போராளிகளை அடையாளம் கண்டு போற்றுவதை விடுத்து, சமூக வலைதளங்களில், குறிப்பாக இன்ஸ்டாகிராமில் ரீல்ஸ் வெளியிடுபவர்களை மாமன்னர்களாகக் கொண்டாடும் நிலைக்குச் சமூகம் தள்ளப்பட்டிருப்பதாகக் குற்றம் சாட்டினார்.
தோழர் நல்லகண்ணுவின் போராடும் குணம்:
“போராடினால் எதுவும் கிடைக்கும்” என்று அசைக்க முடியாத நம்பிக்கை கொண்டிருந்தவர் நல்லகண்ணு என்று புகழாரம் சூட்டிய அவர், எளிமைக்கும் போராட்டக் குணத்திற்கும் ஒருசேரச் சொந்தக்காரரான நல்லகண்ணுவிற்கு முதல்முறையாகச் சிலை அமைக்கப்பட்டுள்ள இந்நிகழ்வில் கலந்துகொள்வதை எனது வாழ்நாள் பெருமையாகக் கருதுகிறேன் என்றார். 2021-ல் தான் சட்டமன்ற உறுப்பினர் ஆனவுடன் முதல்முறையாக நல்லகண்ணுவை நேரில் சந்தித்து வாழ்த்துப் பெற்றதையும், அவர் தமக்குத் புத்தகங்களைப் பரிசளித்ததையும் நினைவுகூர்ந்தார்.
நீட் தேர்வும் டெல்லி போராட்டமும்:
டெல்லியில் நீட் குளறுபடிக்கு எதிராக நடைபெற்ற மாணவர்கள் போராட்டம் குறித்துப் பேசிய உதயநிதி, அந்தப் போராட்டம் இத்துடன் முடிந்துவிடவில்லை என்றும், நீட்டை முற்றிலும் ஒழிப்பதற்கான தொடக்கமாகவே அதைப் பார்ப்பதாகவும் குறிப்பிட்டார். தமிழகத்தில் நீட் நுழைவுத்தேர்வு வந்த நாளிலிருந்தே திமுக அதை எதிர்த்து வருவதாகவும், கையெழுத்து இயக்கம், ஆர்ப்பாட்டம், உண்ணாவிரதம் எனத் தொடர் முன்னெடுப்புகளைச் செய்துள்ளோம் என்றார். மேலும், நீதிபதி ஏ.கே.ராஜன் குழுவின் பரிந்துரையின் அடிப்படையில் கொண்டுவரப்பட்ட சட்ட முன்வடிவு மற்றும் உச்சநீதிமன்றம் வரை தொடரும் சட்டப்போராட்டங்கள் குறித்தும் அவர் விளக்கினார்.
திராவிட – பொதுவுடைமை இயக்கங்களின் உறவு:
நிகழ்ச்சிக்கு வருவதற்கு முன்பு பல்வேறு தரப்பிலிருந்தும் தொலைபேசி வாயிலாக விசாரித்தவர்கள் “குதிரை பேரம் நடத்துகிறீர்களா?” என்று கேட்டதாகத் தெரிவித்த அவர், உண்மையான குதிரை பேரம் எங்கு நடக்கிறது என்பது மக்களுக்கு நன்றாகவே தெரியும் என்றார். தமிழ், தமிழர் மற்றும் தமிழ்நாட்டு உரிமைக்கு எதிராக எத்தகைய அச்சுறுத்தல்கள் வந்தாலும், திராவிட இயக்கமும் பொதுவுடைமை இயக்கமும் எப்போதும் கைகோர்த்து ஒரே அணியாகக் களத்தில் நிற்கும் என்று உறுதிபடத் தெரிவித்தார்.
கலைஞரின் கம்யூனிஸ்ட் பாசம்:
முன்னாள் முதலமைச்சர் கருணாநிதிக்கு கம்யூனிஸ்ட் தலைவர்கள் மீது இருந்த தனிப்படையான பாசத்தை அவர் சுட்டிக்காட்டினார். 2016 சட்டமன்றத் தேர்தலில் திமுக ஆட்சிக்கு வராதபோதுகூட, “தமிழ்நாட்டின் வரலாற்றில் முதன்முறையாக கம்யூனிஸ்ட்டுகள் இல்லாத ஒரு சட்டமன்றம் அமைந்ததுதான் எனக்கு வருத்தம்” என்று கலைஞர் வெளிப்படையாகக் குறிப்பிட்டதை நினைவு கூர்ந்தார். அதேபோல், நல்லகண்ணுவின் எளிமையைப் போற்றும் வகையில்தான் தமிழக அரசின் மிக உயரிய விருதான ‘தகைசால் தமிழர்’ விருதும் அவருக்கு வழங்கிச் சிறப்பிக்கப்பட்டது என்றார்.
நிகழ்ச்சியின் நிறைவாக, கம்யூனிஸ்டுகளின் தியாகங்களையும், இடதுசாரி இயக்கங்களின் வரலாற்றுச் சிறப்பையும் இளைய தலைமுறையினர் படித்து அறிய வேண்டும் என்றும் உதயநிதி ஸ்டாலின் கேட்டுக்கொண்டார்.