சென்னை கொளத்தூர் சட்டமன்றத் தொகுதியில் கடந்த தேர்தலில் பயன்படுத்தப்பட்ட மின்னணு வாக்குப்பதிவு இயந்திரங்களின் (EVM) செயல்பாடுகள் மற்றும் நம்பகத்தன்மையை ஆய்வு செய்யும் பணி இரண்டாவது நாளாக தீவிரமாக நடைபெற்று வருகிறது. சென்னை சிந்தாதரிப்பேட்டையில் அமைந்துள்ள மின்னணு வாக்குப்பதிவு இயந்திரக் கிடங்கில், அனைத்து வேட்பாளர்களின் முகவர்கள் மற்றும் பிரதிநிதிகள் முன்னிலையில் இப்பரிசோதனைப் பணிகள் முழுவீச்சில் மேற்கொள்ளப்பட்டு வருகின்றன.
வாக்குப்பதிவு இயந்திரங்கள் பரிசோதனை
உச்ச நீதிமன்றத்தின் வழிகாட்டுதல்கள் மற்றும் உத்தரவுகளின்படி, கொளத்தூர் தொகுதிக்கான வாக்குப்பதிவு இயந்திரங்கள் அனைத்தும் முழுமையாகப் பரிசோதிக்கப்பட்டு வருவதாக மாவட்டத் தேர்தல் அதிகாரி சமீரன் தெரிவித்துள்ளார்.
செய்தியாளர்களைச் சந்தித்துப் பேட்டியளித்த அவர் கூறியதாவது, “தேர்தல் ஆணையம் பயன்படுத்தும் மின்னணு வாக்குப்பதிவு இயந்திரங்களின் நம்பகத்தன்மையை மேலும் வலுப்படுத்தி உறுதி செய்வதற்காகவே இந்த ஆய்வு நடத்தப்படுகிறது. இதுவரை நடைபெற்ற தேர்தல்களில் இந்த இயந்திரங்கள் பயன்படுத்தப்பட்டதில் எந்தவிதமான குளறுபடிகளோ அல்லது கோளாறுகளோ நிகழ்ந்ததில்லை. நேற்று நடைபெற்ற முதற்கட்டப் பரிசோதனையில் எந்தவொரு இயந்திரத்திலும் பிரச்சனைகள் கண்டறியப்படவில்லை. இந்தச் சோதனைப் பணிகள் இன்னும் 5 நாட்களுக்குத் தொடர்ந்து நடைபெறும்.
தொழில்நுட்பக் கோளாறு குறித்த விளக்கம்
பரிசோதனையின்போது ஏதேனும் குறைபாடுகள் கண்டறியப்பட்டால், அது தொழில்நுட்பக் கோளாறா (Technical glitch) அல்லது எழுத்துப் பிழையா (Clerical error) என்பது கண்டறியப்படும். அதன்பின், இந்தியத் தேர்தல் ஆணையத்தின் வழிகாட்டு நெறிமுறைகளைப் பின்பற்றி உரிய நடவடிக்கை எடுக்கப்பட்டுத் தலைமைக்குத் தெரிவிக்கப்படும்,” என்றார்.
பலத்த போலீஸ் பாதுகாப்பு
இப்பரிசோதனைப் பணிகளில் தேர்தல் நடத்தும் அலுவலர் மற்றும் மாவட்டத் தேர்தல் அலுவலர் சார்பில் மொத்தம் 25 அதிகாரிகள் தீவிரமாக ஈடுபட்டுள்ளனர். வாக்குப்பதிவு இயந்திரங்கள் வைக்கப்பட்டுள்ள கிடங்கில் எந்தவித அசம்பாவிதமும் ஏற்படாமல் இருக்கக் காவல்துறையினர் சார்பில் பலத்த பாதுகாப்பு ஏற்பாடுகளும் செய்யப்பட்டுள்ளன.