மதுரை எய்ம்ஸ் மருத்துவமனையில் முழுமையான புறநோயாளிகள் பிரிவு (OPD) சேவைகள் 2027 ஜனவரி 1 முதல் தொடங்கப்படும் என மத்திய அரசு சென்னை உயர் நீதிமன்ற மதுரை கிளையில் தெரிவித்துள்ளது. இதற்கான தேவையான ஏற்பாடுகள் மேற்கொள்ளப்பட்டு வருவதாகவும் தெரிவிக்கப்பட்டுள்ளது.
ஜனவரி 1 முதல் OPD சேவை
மதுரை தோப்பூரில் அமைக்கப்பட்டு வரும் எய்ம்ஸ் மருத்துவமனையின் பணிகள் முழுமையாக நிறைவடையாத நிலையில், பொதுமக்களுக்கான புறநோயாளிகள் சேவையை தொடங்க வேண்டும் என கோரி பொதுநல வழக்கு தொடரப்பட்டது.
இந்த வழக்கு விசாரணையின்போது, மதுரை எய்ம்ஸ் துணை இயக்குநர் சார்பில் அறிக்கை தாக்கல் செய்யப்பட்டது. அதில், 2027 ஜனவரி 1 முதல் மதுரை எய்ம்ஸில் முழுமையான புறநோயாளிகள் பிரிவு சேவை தொடங்கப்படும் என தெரிவிக்கப்பட்டுள்ளது.
57 சதவீத கட்டுமானப் பணிகள் நிறைவு
மதுரை எய்ம்ஸ் மருத்துவமனைக்கான ஒட்டுமொத்த கட்டுமானப் பணிகளில் தற்போது 57 சதவீதம் நிறைவடைந்துள்ளதாகவும் நீதிமன்றத்தில் தெரிவிக்கப்பட்டுள்ளது.
மருத்துவமனையின் கட்டுமானப் பணிகள் தொடர்ந்து நடைபெற்று வரும் நிலையில், OPD சேவையை தொடங்குவதற்கான ஏற்பாடுகள் தனியாக மேற்கொள்ளப்பட்டு வருவதாக மத்திய அரசு தெரிவித்துள்ளது.
மதுரை எய்ம்ஸ் குறித்து வழக்கு
மதுரை தோப்பூரில் எய்ம்ஸ் மருத்துவமனை அமைக்க கடந்த 2019-ம் ஆண்டு அடிக்கல் நாட்டப்பட்டது. ஆனால் மருத்துவமனை கட்டுமானப் பணிகள் முழுமையாக நிறைவடையாததால், தற்காலிக வளாகத்தில் புறநோயாளிகள் சேவையை தொடங்க வேண்டும் என கோரிக்கை முன்வைக்கப்பட்டது.
இதுதொடர்பாக மதுரையைச் சேர்ந்த கே. புஷ்பவனம் என்பவர் சென்னை உயர் நீதிமன்ற மதுரை கிளையில் பொதுநல வழக்கு தொடர்ந்திருந்தார்.
மாணவர் சேர்க்கை ஏற்கெனவே தொடக்கம்
மதுரை எய்ம்ஸில் ஏற்கெனவே மாணவர் சேர்க்கை தொடங்கியுள்ள நிலையில், தற்காலிகமாக ராமநாதபுரம் அரசு மருத்துவமனையில் வகுப்புகள் நடைபெற்று வருவதாக நீதிமன்றத்தில் தெரிவிக்கப்பட்டது.
இந்த நிலையில், 2027 ஜனவரி 1 முதல் முழுமையான OPD சேவை தொடங்கும் என்ற மத்திய அரசின் அறிவிப்பு மதுரை மற்றும் தென் மாவட்டங்களைச் சேர்ந்த மக்களுக்கு முக்கிய தகவலாக அமைந்துள்ளது.
தலைமைச் செயலகத்தில் சமூகநீதி உறுதிமொழி ஏற்றார் முதலமைச்சர் சி. ஜோசப் விஜய்!