நெடுஞ்சாலை முதல் மருத்துவமனை வரை இந்தி ஆதிக்கமா? – வேல்முருகன் கேள்வி

தமிழ்நாட்டின் இருமொழிக் கொள்கைக்கு முரணாக, அரசு கட்டுப்பாட்டில் உள்ள பல்வேறு துறைகளில் இந்தி இடம்பெறுவதாக தமிழக வாழ்வுரிமைக் கட்சி தலைவர் வேல்முருகன் குற்றம்சாட்டியுள்ளார். மாநில நெடுஞ்சாலைகள், அரசு மருத்துவமனைகள், கோவில் அறிவிப்புகள் உள்ளிட்ட இடங்களில் இந்தி தொடர்பான சர்ச்சைகள் தொடர்ந்து எழுவது குறித்து அவர் கேள்வி எழுப்பியுள்ளார்.

மருந்து உறைகளில் இந்தி இடம்பெற்றது சர்ச்சை

அரசு மருத்துவமனைகளில் நோயாளிகளுக்கு வழங்கப்பட்ட மருந்து உறைகளில் தமிழ் மற்றும் ஆங்கிலத்துடன் இந்தி மொழியும் அச்சிடப்பட்டிருந்தது சமீபத்தில் சர்ச்சையை ஏற்படுத்தியது. இதனைத் தொடர்ந்து தமிழகத்தில் இந்தி பயன்பாடு தொடர்பான விவாதம் மீண்டும் எழுந்துள்ளது.

நெடுஞ்சாலைப் பலகை குறித்தும் கேள்வி

தூத்துக்குடி மாவட்டம் சாத்தான்குளம் – நாசரேத் மாநில நெடுஞ்சாலையில் தமிழ், ஆங்கிலத்துடன் இந்தி இடம்பெற்றதாகவும், அதனைத் தொடர்ந்து அந்த இந்தி எழுத்துகள் அகற்றப்பட்டதுடன், இரு நெடுஞ்சாலைத் துறை அதிகாரிகள் பணியிடைநீக்கம் செய்யப்பட்டதாகவும் வேல்முருகன் தனது எக்ஸ் பதிவில் குறிப்பிட்டுள்ளார்.

மேலும், மதுரை கள்ளழகர் கோவில் நுழைவாயிலில் தமிழ் எழுத்துகள் அகற்றப்பட்டதாக எழுந்துள்ள சர்ச்சையையும் அவர் சுட்டிக்காட்டியுள்ளார். இதுபோன்ற சம்பவங்கள் வெவ்வேறு அரசு துறைகளில் தொடர்ந்து நடைபெறுவது சாதாரண நிர்வாகத் தவறுகளா அல்லது கொள்கைக்கு முரணான செயல்பாடுகளா எனவும் அவர் கேள்வி எழுப்பியுள்ளார்.

அரசு நிறுவனங்களில் தணிக்கை செய்ய கோரிக்கை

தமிழ்நாட்டின் இருமொழிக் கொள்கையை அரசு மதிக்க வேண்டும் என்றும், அரசு நிறுவனங்களில் பயன்படுத்தப்படும் அறிவிப்புப் பலகைகள், ரசீதுகள், மருந்து உறைகள், விண்ணப்பப் படிவங்கள் உள்ளிட்ட அச்சுப் பொருட்களை உடனடியாக தணிக்கை செய்ய வேண்டும் என்றும் வேல்முருகன் வலியுறுத்தியுள்ளார்.

இருமொழிக் கொள்கைக்கு முரணாக இருக்கும் பொருட்களை அகற்ற வேண்டும் என்றும், இந்தி பயன்பாடு தொடர்பான விதிமீறல்களுக்கு காரணமான அதிகாரிகளை அடையாளம் கண்டு துறைரீதியாக நடவடிக்கை எடுக்க வேண்டும் என்றும் அவர் கோரிக்கை விடுத்துள்ளார்.

தமிழ்நாட்டில் தமிழ் மற்றும் ஆங்கிலம் ஆகிய இரு மொழிகளை மையமாகக் கொண்ட மாநிலத்தின் மொழிக் கொள்கை தொடர்பான விவாதம் தொடர்ந்து நடைபெற்று வரும் நிலையில், அரசு நிர்வாகத்தில் இந்தி பயன்பாடு குறித்த வேல்முருகனின் இந்தக் கருத்துகள் அரசியல் ரீதியாகவும் கவனம் பெற்றுள்ளன.

ஆட்சி, அதிகாரத்தில் 25 ஆண்டுகால மக்கள் சேவை நிறைவு – பிரதமர் மோடிக்கு பிரேமலதா விஜயகாந்த் வாழ்த்து