உலக நாடுகளை அச்சுறுத்தும் வடகொரியா: ஒரே வாரத்தில் மீண்டும் ஏவுகணை சோதனை – போர் மேகம் சூழ்கிறதா?

பியாங்யாங்/சியோல்: சர்வதேச அரசியலில் அமைதிக்கு சவாலாக வடகொரியாவின் தொடர் ஏவுகணை சோதனைகள் நீடித்து வருகின்றன. கடந்த ஒரு வாரத்திற்குள் இரண்டாவது முறையாக வடகொரியா பாலிஸ்டிக் ஏவுகணை சோதனையை மேற்கொண்டுள்ளது, உலக நாடுகள் மத்தியில் பெரும் பரபரப்பை ஏற்படுத்தியுள்ளது.

வடகொரியாவின் கிழக்கு கடற்கரைப் பகுதியில் உள்ள ஓன்சான் நகரிலிருந்து இன்று காலை 6 மணியளவில் இந்த ஏவுகணை ஏவப்பட்டது. சுமார் 700 கிலோமீட்டருக்கும் அதிகமான தூரம் பயணித்த இந்த ஏவுகணை, வடகொரியாவின் ராணுவ பலத்தை மீண்டும் ஒருமுறை பறைசாற்றியுள்ளது. இது குறித்து தகவலறிந்த ஜப்பான், ஏவுகணை தங்களது பிரத்தியேக பொருளாதார மண்டலத்திற்குள் விழவில்லை என்பதை உறுதிப்படுத்தியுள்ளது.

அமெரிக்காவும் தென்கொரியாவும் இணைந்து வரும் ஆகஸ்ட் 17-ஆம் தேதி முதல் ‘உல்சி ஃப்ரீடம் ஷீல்ட்’ (Ulchi Freedom Shield) என்ற பெயரில் பிரம்மாண்டமான கூட்டு ராணுவப் பயிற்சியைத் தொடங்கத் திட்டமிட்டுள்ளன. இந்த ராணுவப் பயிற்சியானது தங்களுக்கு எதிரான போருக்கான ஒத்திகை என்று வடகொரியா குற்றம் சாட்டி வருகிறது. இந்த எதிர்ப்பு மற்றும் அச்சுறுத்தலை வெளிப்படுத்தும் விதமாகவே தற்போதைய ஏவுகணை சோதனை நடத்தப்பட்டதாக சர்வதேச அரசியல் நோக்கர்கள் கருதுகின்றனர்.

ஐக்கிய நாடுகள் பாதுகாப்பு கவுன்சிலின் தீர்மானங்களை மீறி வடகொரியா இத்தகைய ஆத்திரமூட்டும் நடவடிக்கைகளில் ஈடுபடுவதாகத் தென்கொரிய அதிபரின் தேசிய பாதுகாப்பு கவுன்சில் கடும் கண்டனம் தெரிவித்துள்ளது. 2019-ஆம் ஆண்டு அமெரிக்க முன்னாள் அதிபர் டொனால்ட் ட்ரம்ப் உடனான பேச்சுவார்த்தை தோல்வியில் முடிந்த பிறகு, வடகொரியத் தலைவர் கிம் ஜாங் உன் அணு ஆயுத மற்றும் ஏவுகணைத் திறன்களை விரிவுபடுத்துவதில் அதீத முனைப்பு காட்டி வருகிறார்.

தற்போது ரஷ்யாவுடன் ராணுவ ஒத்துழைப்பை வலுப்படுத்தி வரும் வடகொரியா, பாரம்பரிய நட்பு நாடான சீனாவுடனும் உறவை மேம்படுத்தி வருகிறது. ஒரு பக்கம் அமெரிக்கா – தென்கொரியாவின் கூட்டு ராணுவப் பயிற்சி, மறுபக்கம் வடகொரியாவின் தொடர் சோதனைகள் என கொரிய தீபகற்பப் பகுதியில் போர் பதற்றம் மீண்டும் அதிகரித்திருப்பது உலக நாடுகளை அச்சத்தில் ஆழ்த்தியுள்ளது.