சர்வதேச எரிசக்தி நிறுவனம் (IEA) வெளியிட்டுள்ள தகவலின்படி, அமெரிக்காவின் வரிவிதிப்பு மிரட்டல்கள் மற்றும் தடைகள் காரணமாக, நவம்பர் மாதத்தில் ரஷ்யாவின் கச்சா எண்ணெய் ஏற்றுமதி குறிப்பிடத்தக்க வீழ்ச்சியைச் சந்தித்துள்ளது.
உலகின் முன்னணி எண்ணெய் ஏற்றுமதி நாடுகளில் ஒன்றாக ரஷ்யா திகழ்ந்து வந்த நிலையில், மற்ற நாடுகளைக் காட்டிலும் விலை குறைவாக எண்ணெய் வழங்கியதால் உலக நாடுகள் ரஷ்யாவிடம் கொள்முதல் செய்ய ஆர்வம் காட்டின. ஆனால், உக்ரைன் மீதான போர் விவகாரத்தில் மத்தியஸ்தம் செய்யும் அமெரிக்கா, ரஷ்யாவிடம் இருந்து எண்ணெய் வாங்கும் இந்தியா போன்ற நாடுகளுக்கு கூடுதல் வரிகளை விதித்து வருகிறது. மேலும், டிரம்ப் பல்வேறு நடவடிக்கைகளையும் எடுப்பேன் என்று மிரட்டல் விடுத்தது, கொள்முதல் செய்ய விரும்பும் நாடுகளைத் தயக்கமடையச் செய்துள்ளது.
இந்த மிரட்டல்களின் விளைவாக, நவம்பர் மாதத்தில் ரஷ்யாவின் எண்ணெய் ஏற்றுமதி நாளொன்றுக்கு 4 லட்சத்து 20 ஆயிரம் பீப்பாய்கள் குறைந்து, மொத்தமாக 69 லட்சம் பீப்பாய்களாக விற்கப்பட்டுள்ளது. இதன் காரணமாக, ரஷ்யாவின் எண்ணெய் வருவாய் நவம்பர் மாதத்தில் ரூ. 99 ஆயிரம் கோடியாகக் குறைந்துள்ளது.
இது கடந்த ஆண்டு நவம்பர் மாதத்துடன் ஒப்பிடுகையில் ரூ. 32 ஆயிரம் கோடி குறைவாகும். வரிவிதிப்புகள் மற்றும் தடைகள் போன்ற அமெரிக்காவின் மிரட்டல்களால் ரஷ்யா எண்ணெய் கொள்முதலில் பிற நாடுகள் ஆர்வம் காட்டவில்லை என்று சர்வதேச எரிசக்தி நிறுவனம் தெரிவித்துள்ளது.
இந்த வீழ்ச்சியை உறுதிப்படுத்தும் விதமாக, ரஷ்ய நிதியமைச்சகம் ஒரு அறிக்கையை வெளியிட்டுள்ளது. அதில், “இந்த ஆண்டின் முதல் ஒன்பது மாதங்களில் (ஜனவரி முதல் செப்டம்பர் வரை) எண்ணெய் மற்றும் எரிவாயு வருவாய் 22 சதவீதம் குறைந்துள்ளது.
இதன் மொத்த மதிப்பு 88 பில்லியன் டாலர்களாகப் பதிவாகியுள்ளது,” என தெரிவிக்கப்பட்டுள்ளது. உக்ரைனுடனான போர் தொடங்கிய பிறகு, ரஷ்யாவின் எண்ணெய் விற்பனையில் ஏற்பட்டுள்ள மிகப்பெரிய வீழ்ச்சி இதுவே முதல்முறையாகும். இந்தப் பின்னடைவு, ரஷ்யாவின் போர் முயற்சிகளுக்கு நிதியளிக்கும் அதன் முக்கிய வருவாய் ஆதாரத்தைப் பாதிக்கும் என்று எதிர்பார்க்கப்படுகிறது.