ஜனநாயகன் படத்தின் ஃபர்ஸ்ட் சிங்கிள் ரிலீஸ் குறித்த புதிய அப்டேட் வெளிவந்துள்ளது.
விஜயின் 69 ஆவது படமாக உருவாகி வரும் திரைப்படம் தான் ஜனநாயகன். அரசியல் சம்பந்தமான கதைக்களத்தில் உருவாகும் இந்த படத்தில் விஜய் போலீஸ் அதிகாரியாக நடித்துள்ளார். இவருடன் இணைந்து மமிதா பைஜூ, பூஜா ஹெக்டே, பாபி தியோல், பிரகாஷ்ராஜ், கௌதம் மேனன் மற்றும் பலர் நடித்துள்ளனர். கேவிஎன் ப்ரொடக்ஷன்ஸ் நிறுவனத்தின் தயாரிப்பில் உருவாகும் இந்த படத்தை ஹெச். வினோத் இயக்கியுள்ளார். அனிருத் இதற்கு இசையமைக்கிறார். சத்யன் சூர்யன் ஒளிப்பதிவு பணிகளை கவனிக்கிறார். இந்த படத்தின் மீதான எதிர்பார்ப்பு ஆரம்பத்திலிருந்தே அதிகமாக இருந்து வருகிறது. 
அதன்படி படத்திலிருந்து முன்னோட்ட வீடியோவும் வெளியாகி ரசிகர்களை உற்சாகப்படுத்தியது. மேலும் இப்படத்தின் படப்பிடிப்புகள் முழுவதும் நிறைவடைந்து விரைவில் பின் தயாரிப்பு பணிகள் தொடங்க இருப்பதாக சொல்லப்படுகிறது. இதற்கிடையில் இந்த படமானது அடுத்த ஆண்டு ஜனவரி மாதம் 9ஆம் தேதி திரைக்கு வரும் என அறிவிக்கப்பட்டுள்ளது. அதே சமயம் இந்த படத்தின் இசை வெளியீட்டு விழாவை டிசம்பர் மாதத்தில் மலேசியாவில் நடத்த படக்குழு திட்டமிட்டு வருவதாகவும் சொல்லப்படுகிறது. இதற்கிடையில் இப்படத்தின் முதல் பாடல் கடந்த தீபாவளி தினத்தை முன்னிட்டு வெளியாகும் என எதிர்பார்க்கப்பட்டது. ஆனால் ஒரு சில தவிர்க்க முடியாத காரணங்களால் இதன் முதல் பாடல் இதுவரை வெளியாகவில்லை. எனவே வருகின்ற நவம்பர் முதல் வாரத்தில் இதன் முதல் பாடல் வெளியாகும் என்று எதிர்பார்க்கப்படுகிறது.
பிரம்மாண்டமான பாடலாக உருவாகி இருக்கும் இந்த பாடலில் விஜய், பூஜா ஹெக்டே, மமிதா ஆகியோர் இடம் பெறுவார்கள் என்றும் இந்த பாடலுக்கு சேகர் மாஸ்டர் நடனம் அமைத்துள்ளார் என்றும் ஏற்கனவே தகவல் வெளியானது. மேலும் இந்த பாடலானது விஜய் பாடியுள்ள பாடலாக இருக்கும் எனவும் பேச்சு அடிபடுகிறது. இனிவரும் நாட்களில் மற்ற அப்டேட்டுகள் கிடைக்கும் என்று நம்பப்படுகிறது.