அமெரிக்க அதிபர் டொனால்ட் ட்ரம்ப்பின் நிர்வாகக் கொள்கைகளுக்கு எதிராகவும், குறிப்பாக ஈரான் மீதான போர் நடவடிக்கைகளைக் கண்டித்தும் அமெரிக்காவின் பல்வேறு நகரங்களில் லட்சக்கணக்கான மக்கள் திரண்டு மாபெரும் போராட்டங்களை முன்னெடுத்து வருகின்றனர்.
சமீபகாலமாக ஈரான் மீது அமெரிக்கா எடுத்து வரும் போர் நடவடிக்கைகள் காரணமாக, அந்நாட்டின் உள்நாட்டில் அத்தியாவசியப் பொருட்களின் விலை முன்னெப்போதும் இல்லாத வகையில் உயர்ந்துள்ளது. இதனால் நடுத்தர மற்றும் ஏழை மக்கள் கடுமையாகப் பாதிக்கப்பட்டுள்ளனர்.
அமெரிக்காவில் ஈரான் போர் நடவடிக்கைகளால் ஏற்பட்டுள்ள கடும் விலைவாசி உயர்வு மற்றும் அதிபர் ட்ரம்ப்பின் ஆக்ரோஷமான வெளியுறவுக் கொள்கைகளுக்கு எதிராக அந்நாட்டு மக்கள் வீதிகளில் இறங்கியுள்ளனர். வரம்புக்கு மீறிய அதிபர் அதிகாரத்தை ஜனநாயகத்திற்கு எதிரானதாகக் கருதும் போராட்டக்காரர்கள், “No Kings in America” (அமெரிக்காவில் ராஜாக்கள் இல்லை) என்ற முழக்கத்துடன் லட்சக்கணக்கில் திரண்டு தங்கள் எதிர்ப்பை வலிமையாகப் பதிவு செய்து வருகின்றனர்.
நாடெங்கும் பரவும் போராட்டத் தீ
வாஷிங்டன் டி.சி., நியூயார்க், சிகாகோ உள்ளிட்ட முக்கிய நகரங்களில் மக்கள் பெருந்திரளாகக் கூடிப் பேரணிகளை நடத்தி வருகின்றனர். கையில் தேசியக் கொடிகளையும், ட்ரம்ப்பிற்கு எதிரான பதாகைகளையும் ஏந்தியபடி அமைதியான முறையில், ஆனால் அதே சமயம் வலிமையான முறையில் தங்கள் எதிர்ப்பைப் பதிவு செய்து வருகின்றனர்.
கடந்த சில தினங்களாக நீடித்து வரும் இந்தப் போராட்டத்தால் அமெரிக்க அரசியலில் பெரும் பரபரப்பு ஏற்பட்டுள்ளது. மக்கள் சக்தியின் இந்த எழுச்சி, ட்ரம்ப் நிர்வாகத்திற்குப் பெரும் நெருக்கடியை ஏற்படுத்தியுள்ளதாக அரசியல் விமர்சகர்கள் கருதுகின்றனர்.