சமூக வலைத்தளங்களில் போதைப்பொருள் பயன்படுத்தியது போன்ற வீடியோ வெளியாகி சர்ச்சை ஏற்படுத்தியுள்ள நிலையில், தவெக அமைச்சர் சரத்குமாரை உடனடியாகப் பதவியிலிருந்து நீக்க வேண்டும் என வலியுறுத்தி, திமுக மாணவர் அணி சார்பில் தமிழகம் முழுவதும் தொடர் கண்டன ஆர்ப்பாட்டங்கள் நடைபெற்றன.
சென்னையில் ஆர்ப்பாட்டத்தில் ஈடுபட்டுப் போலீசாரால் கைது செய்யப்பட்டு மாலையில் விடுவிக்கப்பட்ட திமுக மாணவர் அணியினர், தேனாம்பேட்டையில் உள்ள அண்ணா அறிவாலயத்தில் திமுக தலைவர் மு.க.ஸ்டாலினை நேரில் சந்தித்து வாழ்த்துப் பெற்றனர். இதனைத் தொடர்ந்து செய்தியாளர்களைச் சந்தித்த திமுக மாணவர் அணிச் செயலாளர் வீரமணி பேசியதன் விரிவான தொகுப்பு பின்வருமாறு,
”அமைச்சர்கள் இளைஞர்களுக்கு முன்மாதிரியாக இருக்க வேண்டும்” செய்தியாளர் சந்திப்பில் தவெக அமைச்சர் சரத்குமாரின் வீடியோ சர்ச்சை குறித்து வீரமணி கடுமையான விமர்சனங்களை முன்வைத்தார். ”கடந்த நான்கு நாட்களாக அமைச்சர் சரத்குமார் தனது சமூக வலைதளப் பக்கத்தில் பதிவு செய்திருந்த வீடியோக்கள் பரவி, பெரும் அதிர்ச்சியை ஏற்படுத்தி வருகின்றன. இளைஞர்களின் வாக்குகளைப் பெற்றுத்தான் தமிழக வெற்றி கழகம் ஆட்சியைப் பிடித்தது என்பதை முதலமைச்சர் விஜய் முதலில் உணர்ந்து கொள்ள வேண்டும். நாட்டின் அமைச்சர்களாக இருப்பவர்கள் பொதுமக்களுக்கும், இளைஞர்களுக்கும் ஒழுக்கத்திற்கு முன் உதாரணமாக இருக்க வேண்டும்.”
“அப்படி இல்லாமல், வீட்டில் போதைப்பொருள் பயன்படுத்துவது போலவும், மது அருந்துவது போலவும் வீடியோ வெளியிட்டால், அதனைப் பார்க்கும் தற்போதைய இளைஞர்கள் தடம் மாறிவிடக்கூடிய ஆபத்து உள்ளது. எனவேதான், மாணவர் அணி சார்பில் மாநிலம் தழுவிய போராட்டத்தை முன்னெடுத்தோம். இந்த விவகாரத்தில் அமைச்சர் சரத்குமார் மீது சிபிஐ (CBI) மூலமாகத் தனி விசாரணை நடத்தப்பட வேண்டும்.”
தவெக அமைச்சர் ஆதவ் அர்ஜுனாவின் அண்மைய விமர்சனத்திற்குப் பதிலடி கொடுக்கும் வகையில் வீரமணி பேசியதாவது, ”முதலமைச்சர் விஜய் அவர்கள் 3 கிலோமீட்டர் ஓடிச் சென்றார் என்று அமைச்சர் ஆதவ் அர்ஜுனா பெருமையாகத் தெரிவித்திருக்கிறார். ஆனால், அதைவிட 300 கிலோமீட்டர் ஓடி கரூரிலிருந்து (அரசியல் களத்திற்கு) வந்தவர்தான் எங்களின் தலைவர் மு.க.ஸ்டாலின். வெறும் ‘ரீல்ஸ்’ (Reels) வீடியோக்களை மட்டுமே காட்டி ஏமாற்றி வாக்குகளைப் பெற்றுவிட்டார்கள். ஆனால் இப்போது, ‘சட்டமன்றத்தில் எங்கே காணோம்?’ என்று பேசும் நிலைக்கு வந்துவிட்டார்கள்” என்று சாடினார்.
தொடர்ந்து பேசிய அவர், “இனிவரும் காலங்களில் இது போன்ற விவகாரங்களில் தமிழ்நாடு அரசு மிகவும் கவனமாகச் செயல்பட வேண்டும். மக்கள் நலனைப் புறந்தள்ளிவிட்டு, தொடர்ந்து இதே பாணியில் தவெக ஆட்சியை நடத்தினால், தமிழ்நாட்டு இளைஞர்களின் எதிர்காலம் முற்றிலும் கேள்விக்குறியாகிவிடும்” என்று தனது பேட்டியில் எச்சரித்துள்ளார்.