தமிழகத்தில் 3 தனியார் மருத்துவக் கல்லூரிகள் நிகர்நிலைப் பல்கலைக்கழகங்களாகத் (Deemed Universities) தரம் உயர்த்தப்படுவதால், மாநில அரசுக்குக் கிடைக்க வேண்டிய 461 மருத்துவ இடங்கள் பறிபோகும் நிலை ஏற்பட்டுள்ளதாக மருத்துவத்துறை அமைச்சர் அருண்ராஜ் தெரிவித்துள்ளார். சமூக நீதியைக் காக்கக் கல்வியும், மருத்துவமும் மீண்டும் மாநிலப் பட்டியலுக்கு வர வேண்டும் என்று வலியுறுத்தியுள்ள அவர், இந்த விவகாரத்தில் சட்டப்பூர்வ நடவடிக்கை எடுக்கப்படும் என்றும் எச்சரித்துள்ளார். செய்தியாளர்கள் சந்திப்பில் அமைச்சர் அருண்ராஜ் அளித்த பேட்டியின் விரிவான விபரம் வருமாறு:
60 நாள் விதியும், பறிபோகும் 461 இடங்களும்:
சென்னையில் இன்று செய்தியாளர்களைச் சந்தித்த மருத்துவத்துறை அமைச்சர் அருண்ராஜ், “தமிழகத்தில் உள்ள 3 தனியார் மருத்துவக் கல்லூரிகள் தங்களை நிகர்நிலைப் பல்கலைக்கழகங்களாகத் தரம் உயர்த்திக் கொள்ள கடந்த 07.06.2023 அன்று விண்ணப்பித்திருந்தன. மத்திய அரசின் விதிகளின்படி, விண்ணப்பித்த 60 நாட்களுக்குள் மாநில அரசிடமிருந்து தடையில்லாச் சான்றிதழ் (NOC) பெறாவிட்டால், அது தானாகவே தரம் உயர்ந்ததாகக் கருதப்படும் என்ற நிலை உள்ளது.
அதன்படி, கடந்த 2023 செப்டம்பர் மாதத்தில் இவற்றுக்குத் தகுதி (NPC) வழங்கப்பட்ட உடனே, அதற்கான தடையில்லாச் சான்றிதழ் (NOC) உடனடியாகத் திரும்பப் பெறப்பட்டது. இருப்பினும், 60 நாட்களுக்குள் எவ்வித தடையில்லாச் சான்றுகளும் வழங்கப்படாத சூழலில், தற்போது இந்த 3 கல்லூரிகளும் நிகர்நிலை பல்கலைக்கழகங்களாகத் தரம் உயர்த்தப்பட்டுள்ளன. இதன் காரணமாக, தமிழக மாணவர்களுக்குக் கிடைக்க வேண்டிய 461 மருத்துவ இடங்கள் பறிபோகும் இக்கட்டான நிலை உருவாகியுள்ளது. இந்த இடங்களை மீட்டெடுக்க அரசு சார்பில் சட்டப்பூர்வமான அனைத்து நடவடிக்கைகளும் மேற்கொள்ளப்படும்,” என்றார்.
திமுக, அதிமுகவுக்குப் பகிரங்க அறிவுறுத்தல்:
தொடர்ந்து பேசிய அமைச்சர், சமூக நீதி குறித்துப் பேசும் திராவிடக் கட்சிகளின் இரட்டை நிலையைச் சாடினார். “வெளிப்படையாகச் சமூக நீதி பற்றிப் பேசும் திமுக மற்றும் அதிமுகவைச் சேர்ந்தவர்களே பின்னணியில் இருந்து இது போன்ற செயல்களில் ஈடுபடுவது முற்றிலும் தவறானது. சம்பந்தப்பட்ட கல்லூரிகளை நடத்தும் நிர்வாகிகளுக்கு உரிய அறிவுறுத்தல்களை வழங்க வேண்டும் என்று திமுக மற்றும் அதிமுக தலைமைகளை நான் கேட்டுக்கொள்கிறேன்,” என்று குறிப்பிட்டார்.
“மாநிலப் பட்டியலுக்கு வர வேண்டும்”:
இந்தியாவிலேயே தமிழகத்தின் சுகாதாரக் கட்டமைப்பு மிகச் சிறந்த விளங்குவதற்குக் காரணம், இங்குப் பின்பற்றப்படும் சமூக நீதி மற்றும் இடஒதுக்கீடு முறைதான் என்று பெருமிதம் தெரிவித்த அமைச்சர் அருண்ராஜ், மாநில உரிமைகளை மீட்க வேண்டியதன் அவசியத்தை வலியுறுத்தினார்.
அமைச்சரின் முக்கிய முழக்கம்:
“ஏழை மற்றும் நடுத்தரக் குடும்பங்களைச் சேர்ந்த மாணவர்களின் மருத்துவக் கனவும், சமூக நீதியும் முழுமையாகக் காப்பாற்றப்பட வேண்டும் என்றால், மத்தியப் பட்டியலில் இருக்கும் ‘கல்வி’ மற்றும் ‘மருத்துவம்’ ஆகிய இரண்டும் மீண்டும் மாநிலப் பட்டியலுக்கு (State List) மாற்றப்பட வேண்டும்.”
நிகர்நிலைப் பல்கலைக்கழகங்களாக மாறுவதன் மூலம் மருத்துவ இடங்கள் மத்திய அரசின் கட்டுப்பாட்டிற்குச் சென்று, கட்டணங்களும் பல மடங்கு உயரும் அபாயம் உள்ள சூழலில், மருத்துவத்துறை அமைச்சர் அருண்ராஜ் வெளியிட்டுள்ள இந்த அதிரடிப் பேட்டி அரசியல் மற்றும் மருத்துவக் கல்வி வட்டாரங்களில் பெரும் பரபரப்பை ஏற்படுத்தியுள்ளது.