சாகித்ய அகாடமி விருது பெற்ற மூத்த தமிழ் எழுத்தாளரும், கரிசல் இலக்கியத்தின் முக்கிய ஆளுமையுமான பூமணி (79) மறைவு ஒட்டுமொத்த தமிழ் சமூகத்திற்கும், எழுத்து உலகத்திற்கும், அறத்தை விரும்பக்கூடியவர்களுக்கும் பேரிழப்பு என்று திரைப்பட இயக்குனர் மாரி செல்வராஜ் தெரிவித்துள்ளார்.
உடல்நலக்குறைவு காரணமாகச் சென்னையில் காலமான எழுத்தாளர் பூமணியின் உடல், இறுதி அஞ்சலிக்காகத் தூத்துக்குடி மாவட்டம் கோவில்பட்டி பாரதி நகர் மேட்டுத் தெருவில் உள்ள அவரது இல்லத்தில் வைக்கப்பட்டுள்ளது. அவரது உடலுக்குக் குடும்பத்தினர், பொதுமக்கள், எழுத்தாளர்கள் மற்றும் சமூக ஆர்வலர்கள் திரளாக வந்து அஞ்சலி செலுத்தி வருகின்றனர். இந்நிலையில், இயக்குனர் மாரி செல்வராஜ் பூமணியின் உடலுக்கு மாலை அணிவித்து அஞ்சலி செலுத்தினார். பின்னர் செய்தியாளர்களிடம் பேசிய அவர், எழுத்தாளர் பூமணி தனக்குள்ளும் தனது படைப்புகளிலும் ஏற்படுத்திய தாக்கம் குறித்து நெகிழ்ச்சியுடன் பகிர்ந்து கொண்டார்.
மாரி செல்வராஜ் செய்தியாளர் சந்திப்பு (முக்கிய அம்சங்கள்)
படைப்பில் விழுந்த விதை: “என்னை போன்ற இளைஞர்கள் பண்படுவதற்கும், வாழ்க்கையின் பாடுகளையும் அதில் இருக்கும் அரசியல், அறம் ஆகியவற்றை விதைத்ததற்கும் பூமணி அய்யாவுக்கு முக்கியப் பங்குண்டு. என்னுடைய இலக்கியம், சினிமா, படைப்புகள் என அனைத்திலும் அவரது எழுத்துக்கள் மிகப்பெரிய ஆதிக்கத்தைச் செலுத்தியுள்ளன.”
தாக்கம் ஏற்படுத்திய பிரளயம்: “நான் இன்றைக்கு ஒரு சிறந்த படைப்பாளியாக இருப்பதற்கும், ஒரு திரைப்படத்தை முக்கியப் படைப்பாகக் கொடுத்திருப்பதற்கும் பூமணியின் தாக்கம் தான் காரணம். அவர் தெற்கத்தி மண்ணில் முளைத்த ஒரு பெரிய பிரளயம். இனி இப்படி ஒரு ஆள் வருவாரா என்று தெரியவில்லை.”
பூமணியின் கதைகள் படமாக்கப்படும்: “என்னுடைய வாழ்க்கையும், அவருடைய வாழ்க்கையும் ஒரே மண் சார்ந்தது. ஒரே மாதிரியான மனிதர்களுடன் தான் புழங்கியிருக்கிறோம். நான் என்னுடைய பாடுகளையும் எழுத்துக்களையும் பேசி முடித்த பிறகு, நிச்சயமாகப் பூமணி அய்யாவின் கதைகளைத் திரைப்படமாக எடுப்பேன்.”
தெற்கத்தி வாழ்வின் நெறிமுறை: “தெற்கத்தி மக்களின் வாழ்க்கையை, மதுரையைச் சுற்றியுள்ள பகுதிகளைப் படமாக்க வேண்டும் என்று நினைப்பவர்கள் பூமணி அய்யாவை வாசிக்காமல் முழுமை பெற முடியாது. சினிமாவைத் தாண்டி யார் வந்தாலும் இந்த மண்ணின் அறத்தைத் தெரிந்துகொள்ள அவரது எழுத்துக்கள் அவசியம்.”
தமிழக அரசுக்கு நன்றி மற்றும் படைப்புகள் குறித்த கருத்து
எழுத்தாளர் பூமணிக்கு அரசு மரியாதை வழங்கப்படும் என்று அறிவித்த தமிழக அரசுக்கும், முதல்வர் ஜோசப் விஜய் அவர்களுக்கும் மாரி செல்வராஜ் தனது நன்றியைத் தெரிவித்துக் கொண்டார். மேலும், பூமணியின் படைப்புகளை அரசுடைமையாக்குவது குறித்த கேள்விக்கு, “பூமணி அய்யா உயிரோடு இருந்தவரை அவரது படைப்புகளில் ஆளுமை செலுத்தினார். இப்போது அவை மக்களிடம் எப்படிச் சென்றடைய வேண்டும் என்பதை முடிவெடுக்கும் அதிகாரம் அவரது குடும்பத்தினருக்கும் நண்பர்களுக்கும் மட்டுமே உள்ளது. நிச்சயமாக அது மக்களுக்கானது தான்,” என்று குறிப்பிட்டார். அஞ்சலிக்குப் பிறகு, எழுத்தாளர் பூமணியின் உடல் அவரது பூர்வீக ஊரான கோவில்பட்டி அருகே உள்ள ஆண்டிப்பட்டிக்குக் கொண்டு செல்லப்பட்டு, அங்கு தமிழக அரசின் முழு அரசு மரியாதையுடன் நல்லடக்கம் செய்யப்படவுள்ளது.