‘ஜீரோ ஹவர்’ எச்சரிக்கை விடுத்த ஈரான்! இஸ்ரேலில் போர்க்கப்பல்கள், விமானங்களைக் குவிக்கும் அமெரிக்கா! மத்திய கிழக்கில் உச்சக்கட்டப் போர் பதற்றம்!

மத்திய கிழக்கு பிராந்தியத்தில் ஈரான் மற்றும் இஸ்ரேல் இடையே எந்நேரமும் நேரடிப் போர் வெடிக்கலாம் என்ற சூழல் நிலவி வரும் நிலையில், அமெரிக்க அதிபர் டொனால்ட் டிரம்ப் ஈரானுக்கு எதிரான ராணுவ நடவடிக்கைகளைத் தீவிரப்படுத்துவது குறித்து அவசர ஆலோசனையில் ஈடுபட்டுள்ளார். அமெரிக்கா மற்றும் இஸ்ரேலிய அதிகாரிகளை மேற்கோள் காட்டி சர்வதேச ஊடகங்கள் வெளியிட்டுள்ள அதிரடிச் செய்திகளின் விவரங்கள் வருமாறு:

இஸ்ரேலில் குவியும் அமெரிக்க எரிபொருள் விமானங்கள்:
​ஈரான் மீதான நீண்டதூர வான்வழித் தாக்குதல்களைத் தீவிரப்படுத்தும் நோக்கில், இஸ்ரேலுக்கு கூடுதலாக டசன் கணக்கில் வான்வழி எரிபொருள் நிரப்பும் (Aerial Refueling) சிறப்பு விமானங்களை அனுப்ப அமெரிக்கா தயாராகி வருகிறது. தற்போது இஸ்ரேலின் டெல் அவிவ் நகருக்கு அருகில் உள்ள ‘பென் கொரியன்’ சர்வதேச விமான நிலையத்திலும், தெற்கு இஸ்ரேலில் உள்ள ‘ரமோன்’ விமான நிலையத்திலும் சுமார் 60 அமெரிக்க எரிபொருள் நிரப்பும் விமானங்கள் ஏற்கனவே குவிக்கப்பட்டுள்ளன.
​

போர்க்களத்தில் நீண்ட தூரம் சென்று தாக்க வேண்டிய போர் விமானங்களுக்கு நடுவானில் எரிபொருள் நிரப்ப இந்த விமானங்கள் அத்தியாவசியமானவை என்பதால், மேலும் பல விமானங்களை நிறுத்த இஸ்ரேல் அரசிடம் அமெரிக்கா கூடுதல் அனுமதி கோரியுள்ளது.
​கோடைக்காலப் பயணங்களின் போது பொதுமக்கள் பயன்படுத்தும் பென் கொரியன் விமான நிலையத்தில் கூடுதல் ராணுவ விமானங்கள் குவிக்கப்படுவது, பொதுமக்களின் விமானச் சேவைகளைப் பாதிக்கும் என்பதால் இது இஸ்ரேல் அரசியல் மற்றும் நிர்வாக வட்டாரத்திலும் பெரும் விவாதத்தைக் கிளப்பியுள்ளது.
​

ஈரானின் அணுசக்தி மையங்களை அழிக்க டிரம்ப் திட்டம்?
​ஈரானின் அணுசக்தி தொடர்பான முக்கிய கட்டமைப்புகள், மின் உற்பத்தி நிலையங்கள் மற்றும் நிலத்தடியில் அமைந்துள்ளதாகக் கூறப்படும் ‘பிக் ஆக்ஸ் மவுண்டைன்’ (Big Axe Mountain) போன்ற மிக முக்கிய இலக்குகள் மீது குறிவைத்துத் தாக்குதல் நடத்துவது குறித்து அதிபர் டொனால்ட் டிரம்ப் தீவிரமாக ஆலோசித்து வருகிறார். இதுகுறித்த இறுதி முடிவு இன்னும் சில நாட்களில் வெளியாகலாம் என எதிர்பார்க்கப்படுகிறது.

​ஹார்மோஸ் நீரிணையில் தொடரும் தாக்குதல் – ஜோர்டான், கத்தார் தளங்கள் மீது ஈரான் பதிலடி:
​சர்வதேச எரிசக்திப் போக்குவரத்துக்கு முக்கியத்துவமிக்க ஹார்மோஸ் நீரிணை (Strait of Hormuz) பகுதியில் அமெரிக்கப் படைகள் தொடர்ந்து 7-வது நாளாகக் கடுமையான தாக்குதலை முன்னெடுத்து வருகின்றன. குறிப்பாக, ஈரான் எல்லைக்குட்பட்ட பந்தர் அப்பாஸ் (Bandar Abbas) பகுதியில் உள்ள 7 முக்கிய பாலங்கள் மீது அமெரிக்கா தாக்குதல் நடத்தியுள்ளது.
​

இதற்குப் பதிலடியாக ஈரான் ராணுவம் ஜோர்டான், கத்தார், பஹரைன், ஈராக் மற்றும் குவைத் ஆகிய நாடுகளில் நிலைநிறுத்தப்பட்டுள்ள அமெரிக்க ராணுவத் தளங்களைக் குறிவைத்து ஏவுகணைத் தாக்குதல்களைத் தொடுத்து வருகிறது.
​

ஈரானின் ‘ஜீரோ ஹவர்’ எச்சரிக்கையும், நெதன்யாகுவின் சவாலும்:
​மத்திய கிழக்கில் அமெரிக்கப் படைகளின் நகர்வுகள் குறித்து எச்சரித்துள்ள ஈரானின் புரட்சிகர காவல் படையான ஐ.ஆர்.ஜி.சி (IRGC), “அமெரிக்கப் படைகள் தங்களின் இறுதி அழிவுப் புள்ளியான ‘ஜீரோ ஹவர்’ (Zero Hour) கட்டத்தை நெருங்கி வருகின்றன; என்ன நடக்கப் போகிறது என்பதைப் பொறுத்திருந்து பாருங்கள்” என பகிரங்க எச்சரிக்கை விடுத்துள்ளது.

​மறுபுறம், இஸ்ரேல் பிரதமர் பெஞ்சமின் நெதன்யாகு விடுத்துள்ள எச்சரிக்கையில், “ஈரான் நேரடியாக எங்கள் மீது தாக்குதல் நடத்தத் துணிந்தால், இதற்கு முன் எப்போதும் பார்த்திராத அளவிற்குக் கடுமையான மற்றும் மோசமான பதிலடியைச் சந்திக்க நேரிடும்” என்று சவால் விடுத்துள்ளார். இருதரப்பிலும் நிலவும் இந்த கடுமையான அச்சுறுத்தல்களால் மத்திய கிழக்கு பிராந்தியம் எந்நேரமும் போர்க்களமாக மாறும் அபாயத்தில் உள்ளது.