நீட் தேர்வு குளறுபடிகளை எதிர்த்து டெல்லியில் நடைபெற்ற போராட்டத்தின் போது மக்களவை எதிர்க்கட்சித் தலைவர் ராகுல் காந்தி உள்ளிட்ட தலைவர்கள் கைது செய்யப்பட்டதற்குத் தமிழக வெற்றிக் கழகத் தலைவர் விஜய் கடும் கண்டனம் தெரிவித்துள்ளார். மேலும், நீட் தேர்வுக்கு நிரந்தரத் தீர்வு காண்பதற்கான த.வெ.க-வின் நிலைப்பாட்டையும் அவர் தனது அறிக்கையில் தெளிவுபடுத்தியுள்ளார்.
தலைவர்கள் கைது: ஜனநாயகத்திற்கு எதிரானது!
இது குறித்து அவர் வெளியிட்டுள்ள அறிக்கையில் கூறியிருப்பதாவது:
“நீட் தேர்வு குளறுபடிகளை எதிர்த்து டெல்லியில் இளைஞர்கள் நடத்திய போராட்டத்திற்கு ஆதரவாகக் களமிறங்கிய மக்களவை எதிர்க்கட்சித் தலைவர் திரு. ராகுல் காந்தி அவர்கள் உள்ளிட்ட தலைவர்கள் பலர் கைது செய்யப்பட்டது, ஜனநாயகத்திற்கு எதிரானது. ஒன்றிய அரசின் இச்செயல்பாடுகள் கடும் கண்டனத்திற்குரியவை.”
டெல்லி சம்பவத்திற்கு எதிராகவும், நீட் தேர்வுக்கு எதிராகவும் நாடாளுமன்ற வளாகத்தில் எதிர்க்கட்சிகள் நடத்தும் போராட்டத்திற்குத் தமிழக வெற்றிக் கழகம் தனது முழு ஆதரவைத் தெரிவித்துக் கொள்கிறது.
“வாக்கு அரசியலுக்காக பொய் வாக்குறுதி அளிக்க மாட்டோம்!”
நீட் தேர்வு முறையைப் பொறுத்தவரை அது அறவே அகற்றப்பட வேண்டும் என்பதே த.வெ.க-வின் சமரசமற்ற நிலைப்பாடு. மாணவர்களை மட்டுமல்லாது அவர்களது குடும்பங்களையும் வெகுவாகப் பாதிக்கும் இந்த நீட் தேர்வு முறையை வைத்து, வாக்கு அரசியல் செய்வதற்காகத் தவெக ஒருபோதும் பொய்யான வாக்குறுதிகளை அளிக்காது என்றும் அவர் உறுதியளித்துள்ளார்.
நீட் தேர்வுக்குத் த.வெ.க சுட்டிக்காட்டும் 2 முக்கிய தீர்வுகள்:
நீட் தேர்வு போன்ற பாதிப்புகளை முழுமையாக ஒழிப்பதற்குத் தமிழக வெற்றிக் கழகம் சார்பில் இருகட்டத் தீர்வுகள் முன்வைக்கப்பட்டுள்ளன:
நிரந்தரத் தீர்வு (கல்வியை மாநிலப் பட்டியலுக்கு மாற்றுவது):
நீட் போன்ற தேர்வுகள் ஒழிக்கப்பட வேண்டுமெனில், முதலில் கல்வியை மீண்டும் மாநிலப் பட்டியலுக்கு (State List) மாற்ற வேண்டும். அது மட்டுமே ஒரே நிரந்தரத் தீர்வாக இருக்க முடியும்.
இடைக்காலத் தீர்வு (Special Concurrent List):
கல்வியை மாநிலப் பட்டியலுக்கு மாற்றுவதில் சட்ட நடைமுறைச் சிக்கல்கள் இருக்குமாயின், அதைச் சரிசெய்யும் வரை இடைக்காலத் தீர்வாக ‘Special Concurrent List’ உருவாக்கப்பட்டு, மாநில அரசுகளுக்குக் கூடுதல் அதிகாரம் வழங்கப்பட வேண்டும். இதன் வாயிலாகக் கல்வி மற்றும் மருத்துவக் கல்வி விஷயங்களில் மாநிலங்களுக்கு முழு அதிகாரம் கிடைக்க வழிவகை செய்யப்பட வேண்டும்.
ஒன்றிய அரசுக்குக் கோரிக்கை!
நமது மக்களின் உணர்வுகளையும், மாணவர்களின் எதிர்காலத்தையும் கருத்தில் கொண்டு ஒன்றிய அரசு நீட் தேர்வை அறவே அகற்றுவதற்கான நடவடிக்கைகளை உடனடியாக எடுக்க வேண்டும் என்றும், இதுவே இப் பிரச்சினைக்கான ஒரே தீர்வு என்றும் தனது அறிக்கையில் விஜய் வலியுறுத்தியுள்ளார்.