நடிகர் ‘ஜோசப்’ விஜய் நடிப்பில் வெளியாகவுள்ள ‘ஜன நாயகன்’ திரைப்படத்தில் இடம்பெற்றுள்ள முஸ்லிம் சமூகத்திற்கு எதிரான காட்சிகளை உடனடியாக நீக்க வேண்டும் என்றும், இல்லையெனில் மாபெரும் போராட்டம் நடத்தப்படும் என்றும் இந்திய தேசிய லீக் கட்சி கடும் எச்சரிக்கை விடுத்துள்ளது.
இதுதொடர்பாக இந்திய தேசிய லீக் கட்சியின் மாநிலத் தலைவர் தடா ஜெ. ரஹிம் வெளியிட்டுள்ள கண்டன அறிக்கையில் கூறியிருப்பதாவது,
கண்டன அறிக்கையின் முக்கிய அம்சங்கள்:
வெறுப்புப் பிரச்சாரத்திற்கு எதிர்ப்பு
நடிகர் ஜோசப் விஜய் நடிப்பில் வெளியாகவுள்ள ‘ஜன நாயகன்’ திரைப்படத்தில், முஸ்லிம் சமூகத்தைத் தீவிரவாதிகளாகச் சித்தரிக்கும் வகையில் காட்சிகள் அமைக்கப்பட்டுள்ளதற்கு இந்திய தேசிய லீக் கட்சி தனது வன்மையான கண்டனத்தைப் பதிவு செய்கிறது.ஏற்கனவே விஜய் நடிப்பில் வெளியான ‘துப்பாக்கி’, ‘பீஸ்ட்’ ஆகிய திரைப்படங்களிலும் முஸ்லிம்களைத் தீவிரவாதிகளாகச் சித்தரித்து வெறுப்பை விதைக்கும் காட்சிகள் இடம்பெற்றிருந்தன. அதற்கு எதிராக இந்திய தேசிய லீக் சார்பில் நடிகர் விஜய்யின் இல்ல முற்றுகைப் போராட்டமும், நீதிமன்ற வழக்கும் முன்னெடுக்கப்பட்டது.
மனதைப் புண்படுத்தும் காட்சி
கடந்த கால அனுபவங்களுக்குப் பிறகும், தற்போது ‘ஜன நாயகன்’ படத்தில் கோயில் ஊர்வலத்தில் முஸ்லிம் ஒருவர் குண்டு வைப்பது போன்ற காட்சிகள் இடம்பெற்றிருப்பது மிகுந்த வேதனையளிக்கிறது. இது ஒட்டுமொத்த முஸ்லிம் சமூகத்தின் மனதையும் புண்படுத்தும் செயலாகும்.
தயாரிப்பு தரப்பு அலட்சியம்
அப்படத்தில் உள்ள சர்ச்சைக்குரிய காட்சிகளை நீக்க வேண்டும் என்று கடந்த பல மாதங்களாகக் கோரிக்கை விடுக்கப்பட்டு வந்தபோதிலும், தயாரிப்புத் தரப்பு இதுவரை அதற்கான எந்த நடவடிக்கையும் எடுக்கவில்லை.
இந்திய தேசிய லீக் கட்சியின் கோரிக்கைகள்
’ஜன நாயகன்’ திரைப்படத்தில் முஸ்லிம் சமூகத்தைத் தீவிரவாதிகளாகச் சித்தரிக்கும் அனைத்துக் காட்சிகளையும் உடனடியாக நீக்க வேண்டும்.இனிவரும் காலங்களில் எந்தவொரு திரைப்படத்திலும் குறிப்பிட்ட ஒரு சமூகத்தைக் குறிவைத்து வெறுப்பைப் பரப்பும் காட்சிகளுக்கு அனுமதி அளிக்கக் கூடாது.
போராட்ட எச்சரிக்கை
இக்கோரிக்கைகள் உடனடியாக நிறைவேற்றப்படாவிட்டால், இந்திய தேசிய லீக் கட்சியும் பாபாவின் மாணவர்களும் இணைந்து ஆலோசனை நடத்தி, ‘ஜன நாயகன்’ திரைப்படத்திற்கு எதிராக மாபெரும் ஜனநாயகப் போராட்டத்தை முன்னெடுப்போம் என மாநிலத் தலைவர் தடா ஜெ. ரஹிம் தனது அறிக்கையில் எச்சரித்துள்ளார்.
கொந்தளிப்பில் மாணவர்கள்!: நாளை தமிழகம் தழுவிய வகுப்புப் புறக்கணிப்புப் போராட்டம் அறிவிப்பு!