நீலம் மாணவர் இயக்கம் நடத்திய நீட் எதிர்ப்பு கண்டனப் ஆர்ப்பாட்டத்தில் பங்கேற்பு; நீட் தேர்வை முற்றிலும் தடை செய்யக் கோரிக்கை.
ஒரு நாட்டில் மாணவர்கள் தங்கள் படிப்பு மற்றும் எதிர்காலத்தை விட்டுவிட்டுப் போராட்டக் களத்திற்கு வீதிக்கு வருகிறார்கள் என்றால், அந்த நாட்டின் அரசு மற்றும் இதர அமைப்புகள் சரியாகச் செயல்படவில்லை மற்றும் அவை முற்றிலும் தோற்றுவிட்டன என்றே அர்த்தம் என்று பிரபல திரைப்பட இயக்குனர் வெற்றிமாறன் காரசாரமாகத் தெரிவித்துள்ளார். நீலம் பண்பாட்டு மையத்தின் ‘நீலம் மாணவர் இயக்கம்’ சார்பில் சென்னையில் நடைபெற்ற நீட் தேர்வு எதிர்ப்பு கண்டனப் ஆர்ப்பாட்டத்தில் கலந்துகொண்டு உரையாற்றியபோதே அவர் இவ்வாறு குறிப்பிட்டார்.
அரசின் தோல்வியையே மாணவர் போராட்டம் காட்டுகிறது
நிகழ்ச்சியில் பேசிய இயக்குனர் வெற்றிமாறன், “ஒரு நாட்டில் மாணவர்கள் போராட்டக் களத்திற்கு இறங்குகிறார்கள் என்றால், அங்கிருக்கும் அமைப்புகள் எதுவும் சரியாகச் செயல்படவில்லை என்று பொருள். அந்த வகையில், நீட் தேர்வுக்கு எதிராக மாணவர்கள் நடத்தி வரும் இந்தப் போராட்டம் ஒன்றிய பாஜக அரசின் தோல்வியையே வெளிச்சம்போட்டுக் காட்டுகிறது” என்றார். மேலும், “மாணவர்கள் கேட்பது நியாயமான நீட் தேர்வு (Fair NEET) அல்ல; நீட் தேர்வை முற்றிலும் ஒழித்துத் தடை செய்ய வேண்டும் (Ban NEET) என்பதே அவர்களின் பிரதான கோரிக்கையாக இருக்க வேண்டும். அதற்கான முன்னெடுப்புகளை நாம் ஒருங்கிணைந்து முன்னெடுக்க வேண்டும்” என்று வலியுறுத்தினார்.
கண்கூடாகப் பார்க்கும் சமூக அநீதி
நீட் தேர்வினால் மாணவர்கள் சந்திக்கும் மன உளைச்சல் மற்றும் பாதிப்புகள் குறித்துத் தனது சொந்த அனுபவங்களைப் பகிர்ந்த வெற்றிமாறன், ”என் நண்பரின் மகன் பிளஸ் 2 தேர்வில் 1176 மதிப்பெண்கள் பெற்றும், முதல் முறை நீட் தேர்வை எதிர்கொள்ள முடிவில்லை. மீண்டும் ஒரு ஆண்டு படித்து தேர்வு எழுதியும், அவனது தந்தையால் கட்டணம் செலுத்தக்கூடிய சாதாரணக் கல்லூரியில் இடம் கிடைக்கவில்லை. அவன் திறமையற்ற மாணவன் அல்ல; மிகச் சிறப்பாகவும் புரிதலோடும் படிக்கக்கூடிய மாணவன். அதேபோல மற்றொரு நண்பரின் மகளும் பள்ளிப் படிப்பை முடித்துவிட்டு ஓராண்டு காலம் வீட்டிலேயே அமர்ந்து நீட் தேர்வுக்குப் படித்து வருகிறார்.”
”நம்மிடம் இருந்து மருத்துவக் கல்வியையும், மருத்துவ அறிவையும் முற்றிலுமாகப் பறிப்பதுதான் இந்த நீட் தேர்வின் பின்னணியில் இருக்கும் முக்கியச் செயல்பாடு. மீண்டும் நம்மை அவர்களிடம் கைகட்டி நிற்க வைப்பதற்கான முயற்சியே இது” என்று அவர் குற்றம்சாட்டினார்.
தொடர் போராட்டத்திற்கு அழைப்பு
”எங்களைப் போன்றவர்கள் இது போன்ற மேடைகளுக்கு வருகிறோம், பேசுகிறோம், பின்னர் அடுத்தடுத்த வேலைகளுக்குச் சென்றுவிடுகிறோம். ஆனால், களத்தில் நிற்கும் செயல்பாட்டாளர்கள் தொடர்ந்து போராடும்போது, நாங்களும் அவர்களோடு உறுதுணையாக நிற்க வேண்டும். நீட் தேர்வை முழுமையாகத் தடை செய்யும் வரை நமது குரல் தொடர்ந்து ஒலித்துக்கொண்டே இருக்க வேண்டும்” என்று கூறினார். இறுதியாக, நீட் தேர்வுக்கு எதிராக இந்த ஆர்ப்பாட்டத்தை வெற்றிகரமாக முன்னெடுத்த நீலம் மாணவர் இயக்கத்திற்குத் தனது மனமார்ந்த வாழ்த்துகளையும் ஆதரவையும் தெரிவித்துக்கொண்டார்.
அதிகாரக் கர்வத்திற்கு விழுந்த ‘நீதிச் சவுக்கடி’: விமர்சனம் குற்றமல்ல… ஜனநாயகத்தின் உயிர்மூச்சு!