ஆண்ட்ராய்டு ஸ்மார்ட்போன் பயனர்களுக்குப் பேரிடியாக, கூகுள் நிறுவனம் (Google) தனது சேமிப்பகக் கொள்கையில் (Storage Policy) மிக முக்கியமான மாற்றத்தை அறிவித்துள்ளது. இதுவரை ஜிமெயில் (Gmail), கூகுள் டிரைவ் (Google Drive) மற்றும் கூகுள் போட்டோஸ் (Google Photos) ஆகியவற்றிற்கு மட்டுமே 15 ஜிபி (15GB) இலவச சேமிப்பளவு கணக்கிடப்பட்டு வந்த நிலையில், இனி ஸ்மார்ட்போன் பேக்-அப் தரவுகளுக்கும் இந்த வரம்பு பொருந்தும் என அறிவிக்கப்பட்டுள்ளது.
“என்ன கொடுமை சரவணன் இது!” — கொந்தளிக்கும் பயனர்கள்
ஸ்மார்ட்போன் பயனர்கள் அனைவரும் தங்கள் மொபைல் டேட்டாவை இழக்காமல் இருக்க ‘Google One’ அல்லது ‘Google Account Backup’ வசதியைப் பயன்படுத்தி வருகிறார்கள். இதில் எஸ்.எம்.எஸ் (SMS), அழைப்பு விவரங்கள் (Call History), செயலிகளின் தரவுகள் (App Data) மற்றும் போன் அமைப்புகள் (Settings) போன்றவை தானாகவே கூகுள் மேகக்கணி (Cloud) சேமிப்பகத்தில் பேக்-அப் செய்யப்படும்.
இதுவரை இந்த ஸ்மார்ட்போன் பேக்-அப் தரவுகளுக்கு இலவச 15GB வரம்பில் இருந்து விலக்கு அளிக்கப்பட்டிருந்தது. ஆனால், புதிய அறிவிப்பின்படி இந்த பேக்-அப் தரவுகளும் இனி 15GB கணக்கீட்டிற்குள்ளேயே கொண்டுவரப்படுகின்றன. இதனால் இலவசமாக வழங்கப்படும் 15GB சேமிப்பளவு மிக விரைவாகவே தீர்ந்துவிடும் அபாயம் ஏற்பட்டுள்ளதாகப் பயனர்கள் கவலையும் வருத்தமும் தெரிவித்து வருகின்றனர்.
கூகுளின் இந்த முடிவுக்குக் காரணம் என்ன?
உலகளவில் ஸ்மார்ட்போன் பயனர்களின் எண்ணிக்கை மற்றும் அவர்கள் பயன்படுத்தும் தரவுகளின் அளவு நாளுக்கு நாள் அதிகரித்துக்கொண்டே செல்கிறது. கூகுள் நிறுவனத்தின் கூற்றுப்படி, தங்கள் கிளவுட் சேவையகங்களின் (Cloud Servers) பராமரிப்புச் செலவு மற்றும் தரவு நிர்வாகத்தைச் சீரமைக்கும் நோக்கிலேயே இந்த மாற்றம் கொண்டுவரப்படுவதாகத் தெரிவிக்கப்பட்டுள்ளது. முன்னதாக, கூகுள் போட்டோஸில் வரம்பற்ற முறையில் இலவசமாகப் புகைப்படங்களைப் பதிவேற்றும் வசதியை கூகுள் நிறுத்தியது நினைவுகூரத்தக்கது.
பயனர்கள் என்ன செய்ய வேண்டும்?
இலவச 15GB ஸ்டோரேஜ் விரைவில் நிறைவடையும் பட்சத்தில், பயனர்கள் சந்திக்கும் சவால்களைத் தவிர்க்கச் சில வழிமுறைகளைப் பின்பற்றலாம்,
- தேவையற்ற பேக்-அப்களைத் தவிர்த்தல்: போன் செட்டிங்ஸில் சென்று தேவையில்லாத செயலிகளின் (App Data) பேக்-அப் வசதியை முடக்கி வைக்கலாம்.
- ஸ்டோரேஜ் மேனேஜ்மென்ட் (Storage Management): கூகுள் கணக்கில் உள்ள தேவையில்லாத பெரிய கோப்புகள், பழைய வீடியோக்கள் மற்றும் தேவையற்ற மின்னஞ்சல்களைத் தவறாமல் நீக்கலாம்.
- கூகுள் ஒன் சந்தா (Google One Subscription): 15GB-க்கும் அதிகமான சேமிப்பகம் தேவைப்படும் பயனர்கள், கட்டணம் செலுத்தி கூடுதல் ஸ்டோரேஜ் பெறும் கூகுள் ஒன் திட்டங்களை (Google One Plans) தேர்வு செய்ய வேண்டிய சூழல் உருவாகும். கூகுளின் இந்த திடீர் கெடுபிடியால், சாதாரண ஆண்ட்ராய்டு பயனர்கள் கூடுதல் கட்டணம் செலுத்தி ஸ்டோரேஜ் வாங்கும் நிலைக்குத் தள்ளப்பட்டுள்ளனர்.
ட்ராஃபிக்கை வெல்ல ‘ராஜ கம்பீரம்’: சென்னை ECR சாலையில் குதிரையில் சென்று உணவு டெலிவரி செய்த ஊழியர்!