தென் மாநிலங்களில் நிலவும் சட்டம்-ஒழுங்கு பிரச்சினைகள், உட்கட்டமைப்பு வசதிகள், சுகாதாரம், மாநில எல்லை விவகாரங்கள் மற்றும் நதிநீர் பங்கீடு உள்ளிட்ட முக்கியப் பிரச்சினைகள் குறித்து விவாதிக்க அமைக்கப்பட்டுள்ள தென்மண்டல கவுன்சிலின் உறுப்பினர்களாகத் தமிழக அமைச்சர்கள் சி.டி.ஆர். நிர்மல் குமார் மற்றும் ராஜ்மோகன் ஆகியோர் நியமிக்கப்பட்டுள்ளனர்.
மத்திய உள்துறை அமைச்சர் தலைமையில் இயங்கும் இந்தக் குழுவில், தென் மாநிலங்களின் முதலமைச்சர்கள், அமைச்சர்கள் மற்றும் உயர் அதிகாரிகள் உறுப்பினர்களாக இடம்பெறுகின்றனர்.
தற்போது தமிழகத்தில் தமிழக வெற்றிக் கழக அரசு பொறுப்பேற்றுள்ள நிலையில், அதன் சார்பில் இரண்டு முக்கிய அமைச்சர்கள் இந்தக் கவுன்சிலில் அதிகாரப்பூர்வமாக நியமிக்கப்பட்டுள்ளனர்.
புதிய பொறுப்பாளர்கள் விவரம்:
சி.டி.ஆர். நிர்மல் குமார்: எரிசக்தி மற்றும் சட்டத்துறை அமைச்சர் (கவுன்சில் உறுப்பினர்)
ராஜ்மோகன்: பள்ளிக்கல்வித்துறை அமைச்சர் (கவுன்சில் உறுப்பினர்)
மணிவாசகன்: உள்துறை செயலாளர் (மூத்த ஆலோசகர்)
மாநிலங்களுக்கிடையிலான பாதுகாப்பு, நதிநீர் பங்கீடு மற்றும் உட்கட்டமைப்பு மேம்பாடு சார்ந்த விவகாரங்களில் தமிழகத்தின் உரிமைகளையும் தேவைகளையும் இந்தக் கூட்டமைப்பில் இவர்கள் தீவிரமாக முன்னெடுப்பார்கள் என்று எதிர்பார்க்கப்படுகிறது.