தமிழகத்தில் அண்ணா பல்கலைக்கழகத்தின் கீழ் இயங்கும் பொறியியல் கல்லூரிகளுக்கான நடப்பாண்டு பொதுப்பிரிவு முதல் சுற்று கலந்தாய்வு வெற்றிகரமாக நிறைவடைந்துள்ளது. இதில் ஒட்டுமொத்தமாக 28,979 மாணவர்கள் தங்களுக்கு விருப்பமான கல்லூரிகளில் சேர்ந்துள்ளதாகத் தொழில்நுட்பக் கல்வி இயக்ககம் அறிவித்துள்ளது. இதனைத் தொடர்ந்து, 2-வது சுற்று கலந்தாய்வுக்கான பணிகள் இன்று (ஆகஸ்ட் 3) காலை 10 மணி முதல் அதிகாரப்பூர்வமாகத் தொடங்குகின்றன.
முதல் சுற்று கலந்தாய்வு நிலவரம்:
கடந்த ஜூலை 20-ம் தேதி தொடங்கிய முதல் சுற்று கலந்தாய்வில், 200 முதல் 171.33 வரை கட்-ஆஃப் மதிப்பெண் பெற்ற 37,976 பொதுப்பிரிவு மாணவர்கள் அனுமதிக்கப்பட்டனர். இவர்களுடன் அரசுப் பள்ளி மாணவர்களுக்கான 7.5 சதவிகித இட ஒதுக்கீட்டின் கீழ் 2,570 பேரும், தொழிற்கல்வி பிரிவினர் மற்றும் இதரப் பிரிவினர் என மொத்தம் 43,275 மாணவர்கள் கலந்துகொள்ளத் தகுதி பெற்றிருந்தனர்.
கட்டமைப்பு மற்றும் தேதிகள்:
ஜூலை 20 முதல் 22 வரை விருப்பக் கல்லூரித் தேர்வு (Choice Filling) நடைபெற்றது. ஜூலை 26-ல் இறுதி ஒதுக்கீட்டு ஆணை வெளியிடப்பட்டு, ஜூலை 26 முதல் 30 வரை மாணவர்கள் கல்லூரிகளில் சேர அவகாசம் வழங்கப்பட்டது.
அப்வேர்ட் (Upward) மாணவர்களுக்குக் கவனத்திற்கு:
சாய்ஸ் ஃபில்லிங்கில் ‘Upward’ விருப்பத்தைத் தேர்ந்தெடுத்த மாணவர்களுக்கான மேல்முறையீட்டு ஒதுக்கீட்டு ஆணை இன்று வழங்கப்பட்டுள்ளது. இந்த மாணவர்கள் அனைவரும் வரும் ஆகஸ்ட் 14-ம் தேதிக்குள் சம்பந்தப்பட்ட கல்லூரிகளில் கட்டாயம் சேர்ந்துவிட வேண்டும் என அறிவுறுத்தப்பட்டுள்ளது.
இன்று முதல் 2-வது சுற்று கலந்தாய்வு தொடக்கம்!
முதல் சுற்று நிறைவடைந்ததை அடுத்து, 2-வது சுற்று கலந்தாய்வுக்கான ஆன்லைன் பணிகள் இன்று காலை 10 மணிக்குத் தொடங்குகின்றன.
யார் பங்கேற்கலாம்?:
தரவரிசைப் பட்டியலில் 37,977 முதல் 1,31,093 வரை இடம் பெற்றுள்ள, 171 முதல் 135.75 வரை கட்-ஆஃப் மதிப்பெண் பெற்ற பொதுப்பிரிவு மாணவர்கள் இதில் கலந்துகொள்ளலாம்.
அரசுப் பள்ளி இட ஒதுக்கீடு:
7.5 சதவிகித இட ஒதுக்கீட்டின் கீழ் தரவரிசையில் 2,571 முதல் 18,036 வரை உள்ள (171 முதல் 135.75 கட்-ஆஃப் வரை) மாணவர்களும் இசுற்றில் பங்கேற்கின்றனர்.
மொத்த பங்கேற்பாளர்கள்:
பொதுப்பிரிவு மற்றும் அரசுப் பள்ளி மாணவர்கள் என மொத்தம் 93,116 மாணவர்கள் இந்த 2-வது சுற்றில் கலந்துகொள்ள உள்ளனர்.
சாய்ஸ் ஃபில்லிங் காலக்கெடு:
2-வது சுற்றுக்குத் தகுதிபெற்ற மாணவர்கள் இன்று காலை 10 மணி முதல் வரும் 5-ம் தேதி மாலை 5 மணி வரை தங்களின் விருப்பக் கல்லூரிகளை இணைய வழியில் தேர்வு செய்து (Choice Filling) பதிவு செய்யலாம்.
காவிரி நதிநீர் விவகாரம்: தமிழக அரசின் மௌனமும் ஆளும் தரப்பின் செயலிழப்பும் – ஒரு சிறப்புப் பார்வை!