விவசாயிகளுக்காக மக்கள் மன்றத்திலும் சட்டமன்றத்திலும் என்றும் குரல் கொடுப்பேன்: திமுக இளைஞரணி செயலாளர், எதிர்க்கட்சித் தலைவர் உதயநிதி ஸ்டாலின் உறுதி!

விவசாயப் பெருங்குடி மக்களின் வாழ்வாதாரக் கோரிக்கைகளை வலியுறுத்திப் போராட்டம் நடத்திய திமுக இளைஞரணி செயலாளரும், தமிழ்நாடு சட்டமன்ற எதிர்க்கட்சித் தலைவருமான உதயநிதி ஸ்டாலினை, பல்வேறு விவசாய சங்கங்களின் நிர்வாகிகள் நேரில் சந்தித்துத் தங்கள் நெஞ்சார்ந்த நன்றியைத் தெரிவித்துக் கொண்டனர்.

சென்னை பசுமைவழிச் சாலையில் உள்ள எதிர்க்கட்சியின் தலைவர் இல்லமான ‘குறிஞ்சி இல்லத்தில்’, தமிழ்நாடு அனைத்து விவசாய சங்கங்களின் கூட்டியக்கத் தலைவர் பி.கே. தெய்வசிகாமணி தலைமையில் இந்தச் சந்திப்பு நடைபெற்றது.

வேளாண் மக்களின் கோரிக்கைகளுக்குத் தோள் கொடுத்துப் போராடிய திமுகவிற்கும், எதிர்க்கட்சித் தலைவர் உதயநிதி ஸ்டாலினுக்கும் விவசாய சங்கப் பிரதிநிதிகள் தங்களது நன்றிகளைப் பொழிந்தனர். மேலும், விவசாயப் போராட்டத்தில் ஈடுபட்டதற்காக எதிர்க்கட்சித் தலைவர் உதயநிதி ஸ்டாலின் கைது செய்யப்பட்ட நடவடிக்கைக்குத் தங்களது கடுமையான கண்டனத்தையும் வருத்தத்தையும் கூட்டத்தில் பதிவு செய்தனர்.

விவசாய கூட்டுறவு பயிர் கடன்களை முழுமையாகத் தள்ளுபடி செய்யக் கோரி, கடந்த ஜூன் மாதத்திலிருந்து தமிழ்நாடு அனைத்து விவசாய சங்கங்களின் கூட்டு இயக்கம் உள்ளிட்ட பல்வேறு அமைப்புகள் தொடர் போராட்டத்தில் ஈடுபட்டு வருகின்றன. விவசாயிகளின் கோரிக்கைகள் முழுமையாக நிறைவேறும் வரை போராட்டம் தொடரும் என்றும், முத்தமிழறிஞர் கலைஞர் அவர்களின் காலத்திலிருந்து திமுக எப்போதுமே விவசாயிகளின் போராட்டங்களுக்குப் பக்கபலமாக இருந்துள்ளது போலத் தற்போதும் உடன் இருக்க வேண்டும் என்றும் விவசாய சங்கப் பிரதிநிதிகள் கோரிக்கை விடுத்தனர்.

விவசாய சங்கங்களின் கோரிக்கைகளைக் கேட்டறிந்த எதிர்க்கட்சித் தலைவர் உதயநிதி ஸ்டாலின், பயிர் கடன் தள்ளுபடி உள்ளிட்ட வேளாண் பெருங்குடி மக்களின் அனைத்து நியாயமான கோரிக்கைகளுக்கும் திமுக எப்போதுமே அரணாக நிற்கும் என்று உறுதியளித்தார். மேலும், “மக்கள் மன்றத்திலும் சட்டமன்றத்திலும் விவசாயிகளுக்காக நான் எப்போதும் குரல் கொடுப்பேன்” என்றும் அவர் தெரிவித்தார்.

இந்த ஆலோசனைக் கூட்டத்தில், தமிழ்நாடு காவிரி விவசாய சங்கத்தின் மாநில கௌரவத் தலைவர் நாகை எஸ்.ராமதாஸ், தமிழ்நாடு வேளாண் வணிக சங்கத் தலைவர் கே. எழிலன், கூட்டு இயக்கத்தின் துணைப் பொதுச்செயலாளர் ராஜா, இணைப் பொதுச்செயலாளர் நரேஷ், திருவள்ளூர் மாவட்ட விவசாய சங்கத் தலைவர் பாபு ராஜா உள்ளிட்ட ஏராளமான விவசாய சங்கப் பிரதிநிதிகள் பங்கேற்றுத் தங்களது கருத்துகளைப் பகிர்ந்து கொண்டனர்.