கரூரில் நடைபெற்ற அரசியல் பொதுக்கூட்ட நெரிசலில் உயிரிழந்தவர்களின் குடும்பங்களுக்கு, தமிழக அரசு சார்பில் கருணை அடிப்படையில் அரசு வேலை வழங்கப்பட்ட விவகாரத்தில் சென்னை உயர்நீதிமன்ற மதுரை கிளை தடை விதித்துள்ளது பெரும் சர்ச்சையை ஏற்படுத்தியுள்ளது. இந்நிலையில், இச்சம்பவம் குறித்து மூத்த பத்திரிகையாளர் ‘தராசு’ ஷியாம் தனது கடுமையான விமர்சனங்களை முன்வைத்துள்ளார்.
நீதிமன்றம் ஏன் தடை விதித்தது?
பாதிக்கப்பட்ட குடும்பங்களுக்கு அரசு வேலை வழங்கப்பட்ட உத்தரவை நீதிமன்றம் நிறுத்தி வைத்துள்ளது குறித்துப் பேசிய ‘தராசு’ ஷியாம், “அரசு வேலை என்பது அரசியலமைப்புச் சட்டத்திற்கு உட்பட்டது. கருணை அடிப்படையில் அரசு வேலை வழங்குவதற்கு உச்சநீதிமன்றம் ஏற்கனவே தெளிவான வழிகாட்டுதல்களை வழங்கியுள்ளது. கரூரில் நடந்தது ஒரு அரசியல் கட்சியின் கூட்டம். அங்கு ஏற்பட்ட மரணத்திற்கு அரசைப் பொறுப்பாக்கி, அரசு வேலை வழங்குவது தவறான முன்னுதாரணமாகும். இது விஜய் அரசுக்கு ஏற்பட்ட முதல் பெரிய நீதிமன்றத் தோல்வி,” என்று தெரிவித்தார். மேலும், அரசு தரப்பில் உச்சநீதிமன்றத்தில் மேல்முறையீடு செய்தாலும், சாதகமான தீர்ப்பு கிடைக்க வாய்ப்பில்லை என்றும் அவர் குறிப்பிட்டார்.
ஸ்டெர்லைட் சம்பவத்துடன் ஒப்பிட முடியாது: முரண்படும் வாதங்கள்!
அரசு தரப்பில் ஸ்டெர்லைட் துப்பாக்கிச் சூடு மற்றும் லீலாவதி படுகொலை சம்பவங்களை முன்னுதாரணமாகக் காட்டியதை மறுத்த ஷியாம், “ஸ்டெர்லைட் துப்பாக்கிச் சூடு என்பது அரசின் கவனக்குறைவு மற்றும் காவல்துறையின் செயல்பாட்டால் விளைந்தது. ஆனால், ஒரு தனியார் அரசியல் கூட்டத்தில் ஏற்பட்ட நெரிசலை அதனுடன் ஒப்பிட முடியாது” என்றார்.
ஏற்கனவே பாதிக்கப்பட்ட குடும்பங்களுக்கு அரசு மற்றும் சம்பந்தப்பட்ட அரசியல் கட்சி சார்பில் சராசரியாக ₹35 லட்சம் முதல் ₹40 லட்சம் வரை இழப்பீடு வழங்கப்பட்டுள்ளதை சுட்டிக்காட்டிய அவர், “இந்த நிலையில் மீண்டும் கருணை அடிப்படையில் வேலை வழங்குவது, வேலைவாய்ப்புக்காக நீண்டகாலமாகக் காத்திருக்கும் ஆயிரக்கணக்கான தகுதியுள்ள இளைஞர்களின் உரிமையைப் பறிக்கும் செயலாகும்” என்றும் சுட்டிக்காட்டினார்.
“அரசு வேலை முதலமைச்சரின் வீட்டுச் சொத்து அல்ல” – கடும் சாடல்
முதலமைச்சர் விஜய்யின் இந்த முடிவை ‘தன்னிச்சையானது’ என்று வர்ணித்த ‘தராசு’ ஷியாம், “அரசு வேலை என்பது முதலமைச்சரின் சொந்த வீட்டுச் சொத்து அல்ல. வரி செலுத்தும் மக்களின் பணத்தில் இயங்கும் அரசு, சட்டத்திற்கு உட்பட்டே செயல்பட வேண்டும். ஒரு ராஜாவைப் போல தன்னிச்சையாகப் பரிசு வழங்குவது போல் அரசு வேலையை அள்ளிக் கொடுக்க முடியாது,”எனக் கடுமையாகச் சாடினார். அரசியலமைப்புச் சட்ட விதிகளையும், வேலைவாய்ப்புக்காகக் காத்திருக்கும் இளைஞர்களின் நலனையும் கருத்தில் கொள்ளாமல் எடுக்கப்பட்ட இந்த முடிவு, தற்போதைய அரசுக்கு ஏற்பட்ட மிகப்பெரிய சட்டச் சிக்கலாகவே பார்க்கப்படுகிறது.