முதலமைச்சரின் அலுவலகம் மாற்றப்படுவது அவருடைய சொந்த வசதிக்காகவோ அல்லது தேவைக்காகவோ அல்ல; மாறாக அவருடன் இரவு பகலாகப் பணியாற்றும் அதிகாரிகளுக்கு போதிய வசதியான சூழலை ஏற்படுத்தித் தருவதற்காகவே என்று செய்தித்துறை அமைச்சர் ஆதவ் அர்ஜுனா விளக்கமளித்துள்ளார்.
அதிகரிக்கும் பணிச்சுமை மற்றும் பணியாளர்கள்
சென்னையில் செய்தியாளர்களைச் சந்தித்த அமைச்சர் ஆதவ் அர்ஜுனா கூறுகையில், “தமிழக அரசு தினமும் பல்வேறு புதிய மக்கள் நலத்திட்டங்களைத் தீட்டிச் செயல்படுத்தி வருகிறது. முதலமைச்சருக்கு ஏற்பட்டுள்ள அதிகப்படியான பணிச்சுமை மற்றும் புதிய திட்டங்களின் சிறப்பான செயலாக்கம் காரணமாக, அவரைச் சுற்றித் தொடர்ச்சியாகக் கிட்டத்தட்ட 200-க்கும் மேற்பட்ட அதிகாரிகள் மற்றும் பணியாளர்கள் சுழன்று பணியாற்றி வருகின்றனர்” என்று குறிப்பிட்டார்.
பரந்த உள்ளத்துடன் முதலமைச்சர் எடுத்த முடிவு
தொடர்ந்து பேசிய அவர், “தற்போதுள்ள இடவசதி அதிகாரிகளுக்குப் போதியதாக இல்லை என்பதைக் கருத்தில் கொண்டு, முதலமைச்சர் தனது பரந்த உள்ளத்தால் இந்த முடிவை எடுத்துள்ளார். தன்னுடன் களத்தில் நிற்கும் அனைத்து அதிகாரிகளுக்கும், ஊழியர்களுக்கும் நல்ல காற்றோட்டமான மற்றும் வசதியான பணிச்சூழல் கிடைக்க வேண்டும் என்ற ஒரே உணர்வோடுதான் முதலமைச்சரின் அலுவலகம் மாற்றியமைக்கப்படுகிறது.
மாறாக, இது முதலமைச்சரின் தனிப்பட்ட தேவைக்காகவோ அல்லது அவரது வசதிக்காகவோ செய்யப்பட்ட மாற்றம் அல்ல” என்று அமைச்சர் ஆதவ் அர்ஜுனா திட்டவட்டமாகத் தெரிவித்தார். அமைச்சரின் இந்த விளக்கம், தலைமைச் செயலக அலுவலக மாற்றங்கள் குறித்து எழுப்பப்பட்டு வந்த பல்வேறு விவாதங்களுக்கு முற்றுப்புள்ளி வைப்பதாக அமைந்துள்ளது.