சாலை விபத்தில் பரிதாபமாக உயிரிழந்த மதுரையைச் சேர்ந்த காவலரின் குடும்பத்திற்கு, அவருடன் பணியாற்றிய 6,971 தோழர்கள் இணைந்து ரூ.22 லட்சம் நிதி திரட்டி வழங்கிய சம்பவம் பெரும் நெகிழ்ச்சியை ஏற்படுத்தியுள்ளது.
பரிதாபமாக பிரிந்த உயிர்
மதுரை மாவட்டம் வாடிப்பட்டியைச் சேர்ந்தவர் தமிழ்ச்செல்வன். இவர் காவல் துறையில் 2017-ஆம் ஆண்டு பேட்ச் (Batch) காவலராகப் பணியில் இணைந்து பணியாற்றி வந்தார். கடந்த இரண்டு மாதங்களுக்கு முன்பு எதிர்பாராத விதமாக ஏற்பட்ட சாலை விபத்து ஒன்றில் சிக்கி அவர் பரிதாபமாக உயிரிழந்தார்.
6,971 காவலர்கள் இணைந்த நிதித் திரட்டு
தமிழ்ச்செல்வனின் திடீர் மறைவால் அவரது குடும்பம் பெரும் சோகத்திலும் பொருளாதாரச் சிரமத்திலும் ஆழ்ந்தது. இதையறிந்த அவரது 2017-ஆம் ஆண்டு பேட்சை சேர்ந்த 6,971 சக காவலர்கள் உடனடியாக ஒன்று திரண்டனர். தங்கள் நண்பனின் குடும்பத்திற்கு உதவ வேண்டும் என்ற நோக்கில் அனைவரும் இணைந்து நிதி திரட்டத் தொடங்கினர். குறுகிய காலத்தில் மொத்தம் ரூ.22 லட்சம் நிதி திரட்டப்பட்டது.
குடும்பத்தினர் பெயரில் டெபாசிட்
திரட்டப்பட்ட இந்த உதவித்தொகையானது தமிழ்ச்செல்வனின் மனைவி, மகன் மற்றும் பெற்றோர் என அனைவரது எதிர்காலத்தையும் கருத்தில் கொண்டு அவர்களின் வங்கிக் கணக்குகளில் தனித்தனியாகப் பிரித்து டெபாசிட் செய்யப்பட்டது.
இதற்கான வங்கி ஆவணங்களை, சமயநல்லூர் துணைக்காவல் கண்காணிப்பாளர் (DSP) முன்னிலையில் தமிழ்ச்செல்வனின் குடும்பத்தினரிடம் 2017-பேட்ச் காவலர்கள் கண்ணீர்மல்க ஒப்படைத்தனர். ஆபத்து காலத்தில் தோள் கொடுத்த சக காவலர்களின் இந்த மனிதநேய செயல் பொதுமக்கள் மற்றும் காவல் துறை அதிகாரிகள் இடையே பெரும் பாராட்டையும் நெகிழ்ச்சியையும் பெற்றுள்ளது.