உள் ஒதுக்கீடு மற்றும் சமூக நீதிக்குத் தாம் என்றும் ஆதரவாக நிற்பேன் எனத் தெரிவித்துள்ள கர்நாடக முன்னாள் முதலமைச்சர் சித்தராமையா, ஒடுக்கப்பட்ட சமூகத்தினர் தங்களுக்கு ஆதரவாக இருப்பவர்கள் யார், எதிர்ப்பாளர்கள் யார் என்பதை தெளிவாகப் புரிந்துகொள்ள வேண்டும் என்று வலியுறுத்தியுள்ளார்.
பெங்களூருவில் ‘சமூக நீதி மற்றும் உள் ஒதுக்கீடு போராட்டக் குழு’ சார்பில் ஏற்பாடு செய்யப்பட்ட கருத்தரங்கைத் தொடங்கி வைத்துப் பேசிய சித்தராமையா, சமூக நீதி தொடர்பான தனது கருத்துகளைப் பகிர்ந்து கொண்டார்:
“துணை முதல்வர் பதவிக்கு ஆதரவு அளித்தேன்”
தற்போதைய கர்நாடக அரசில் ஜி. பரமேஷ்வரா துணை முதலமைச்சராகப் பதவியேற்ற நிகழ்வை நினைவுகூர்ந்த சித்தராமையா, “அவருக்கு அந்தப் பொறுப்பு கிடைப்பதில் நான் முக்கியப் பங்காற்றினேன். 4 அல்லது 5 பேரை துணை முதலமைச்சர்களாக்க யோசித்துக்கொண்டிருந்த போது, ஒருவருக்கு மட்டுமே அந்த வாய்ப்பை வழங்க வேண்டும் என்று உறுதியாக வலியுறுத்தினேன்” என்றார்.
பதவி உயர்வில் இடஒதுக்கீடு: கர்நாடகா மட்டுமே முன்னோடி
அரசுப் பணியில் பதவி உயர்வில் இடஒதுக்கீடு முறையைக் கொண்டு வந்தது தனது தலைமையிலான அரசு தான் என்று சுட்டிக்காட்டிய அவர்:
“இந்தியாவிலேயே பதவி உயர்வில் இடஒதுக்கீடு வழங்கிய ஒரே மாநிலம் கர்நாடகா மட்டுமே. ரத்னபிரபா தலைமைச் செயலாளராக இருந்தபோது அமைக்கப்பட்ட குழுவின் அறிக்கையைப் பெற்று அதைச் சட்டமாக்கினோம்.
நீதிமன்றத்தில் வழக்குப் தொடரப்பட்ட போதிலும், தீர்ப்பு நமக்கு சாதகமாகவே வந்தது. இதெல்லாம் எவ்வாறு சாத்தியமானது என்பதைச் சிந்தித்துப் பார்க்க வேண்டும்” எனக் குறிப்பிட்டார.
நன்மை செய்தும் எதிர்ப்பு: மனவேதனை
சமூக நீதிக்காக இவ்வளவு முயற்சிகள் மேற்கொண்ட போதிலும், உள் ஒதுக்கீடு அமல்படுத்தப்படும் முன்பே இதே கூட்டத்தில் உள்ள பலர் தமக்கு எதிராக முழக்கமிட்டதை அவர் சுட்டிக்காட்டினார்.
“நான் சமூக நீதிக்காகப் பாடுபட்ட போதிலும் எனக்கு எதிராகவும் முழக்கங்கள் எழுப்பப்பட்டன. அதனால்தான் நான் அடிக்கடி கூறுகிறேன் – உங்களுடன் உண்மையிலேயே நிற்பது யார், உங்களுக்கு எதிராகச் செயல்படும் எதிரிகள் யார் என்பதை நீங்கள் சரியாக அடையாளம் காண வேண்டும்,” என்று அவர் கேட்டுக் கொண்டார்.
“அதிகாரம் இல்லாவிட்டாலும் சமூக நீதிக்காகப் போராடுவேன்”
தற்போது தாம் அரசில் எந்தவொரு பதவியிலும் இல்லை என்பதைச் சுட்டிக்காட்டிய சித்தராமையா, “நான் இப்போது அரசாங்கத்தின் தலைவரோ, கையில் அதிகாரத்தைக் கொண்டவரோ இல்லை. ஆனால், உள் ஒதுக்கீடு, இடஒதுக்கீட்டு முறை மற்றும் சமூக நீதியின் பக்கம் நிற்கும் ஒரு மனிதனாகத் தொடர்ந்து இருப்பேன். இந்த விஷயத்தில் நான் எப்போதும் சமரசம் செய்துகொண்டதில்லை; இனிமேலும் செய்ய மாட்டேன்” என உறுதியளித்தார்.
சாதி அமைப்பினால் சுரண்டப்பட்டு வாய்ப்புகள் மறுக்கப்பட்டவர்களுக்கு மட்டுமே இடஒதுக்கீடு வழங்கப்பட வேண்டும் என்றும், ஒடுக்கப்பட்ட மக்கள் தங்களின் திறமையை நிரூபிக்க இடஒதுக்கீடே ஒரே காரணியாக உள்ளது என்றும் அவர் தனது உரையில் வலியுறுத்தினார்.
‘வந்தே மாதரம்’ முதல் 2 பத்திகள் மட்டுமே பாடப்படும்: கர்நாடக முதல்வர் டி.கே.சிவகுமார் அறிவிப்பு!