டிஆர்டிஓ (DRDO) தொழில்நுட்பத்தைப் பயன்படுத்தி மரபுசார் ஏவுகணைகளைத் தயாரிக்கத் தனியார் துறை நிறுவனங்களுக்கு மத்திய அரசு அனுமதி அளித்துள்ளது. பிரதமர் நரேந்திர மோடி தலைமையிலான அரசின் இந்த நடவடிக்கை, பாதுகாப்புத் துறையில் ‘சுயசார்பு இந்தியா’ திட்டத்திற்குப் மிகப்பெரிய பலமாகப் பார்க்கப்படுகிறது.
நீண்டதூர ஏவுகணைகள் தயாரிப்பு
1,000 முதல் 1,500 கி.மீ. வரையிலான இலக்கைத் தாக்கும் நீண்டதூரத் தரைவழித் தாக்குதல் க்ரூஸ் ஏவுகணை (LRLACM) தயாரிக்கும் பணிகள் தொடங்கப்பட உள்ளன.
150 முதல் 500 கி.மீ. இலக்கைத் தாக்கும் ‘பிரளய்’ ஏவுகணைகளைத் தயாரிப்பதற்காக முன்னணித் தனியார் நிறுவனங்களை அடையாளம் காணும் பணியில் அரசு தீவிரமாக ஈடுபட்டுள்ளது.
முன்னதாக 110 கி.மீ. இலக்கைத் தாக்கும் அஸ்ட்ரா மார்க் மற்றும் 150 கி.மீ. இலக்கைத் தாக்கும் அஸ்ட்ரா மார்க் II ரக வான்வழி ஏவுகணைகளைத் தயாரிப்பதற்கான முன்மொழிவுக் கோரிக்கைகள் தனியார் நிறுவனங்களுக்கு வழங்கப்பட்டுள்ளன.
பங்கெடுக்கும் முன்னணி நிறுவனங்கள்
ஐகாம், பாரத் போர்ஜ், அதானி டிஃபென்ஸ் சிஸ்டம்ஸ் போன்ற முன்னணித் தனியார் நிறுவனங்களுடன், பாரத் டைனமிக்ஸ் மற்றும் பாரத் எலக்ட்ரானிக்ஸ் ஆகிய பொதுத்துறை நிறுவனங்களும் இணைந்து அதிநவீன ஏவுகணைகள் மற்றும் ஆயுத உற்பத்தியில் ஈடுபடவுள்ளன.
பாதுகாப்புத் துறையில் புதிய விடியல்
தற்போது ஏவுகணை தயாரிப்புக்குத் தேவையான 50-க்கும் மேற்பட்ட துணை அமைப்புகளைத் தனியார் துறை நிறுவனங்களே வழங்கி வருகின்றன. இந்நிலையில், மரபுசார் ஏவுகணைகளைத் தயாரிக்க அனுமதி வழங்கப்பட்டிருப்பது, எதிர்காலத்தில் உத்திசார் (Strategic) ஏவுகணை துறையையும் தனியார் துறைக்குத் திறப்பதற்கான முதல் படியாகப் பார்க்கப்படுகிறது.
இந்த முடிவின் மூலம் ஏவுகணை உற்பத்தியின் அளவு பெருமளவில் அதிகரிப்பதுடன், நாட்டின் ராணுவத் தொழில்முறை கட்டமைப்பும் மேலும் பலம்பெறும் என எதிர்பார்க்கப்படுகிறது.
தேசிய செவிலியர் ஆணையத்தை உடனடியாக அமைக்க வேண்டும்: மத்திய அரசுக்கு டெல்லி உயர் நீதிமன்றம் உத்தரவு!