2026-ஆம் ஆண்டு நடைபெற்ற தமிழகச் சட்டமன்றத் தேர்தல், மாநில அரசியலில் எண்ணற்ற புதிய திருப்பங்களையும் வியப்புகளையும் ஏற்படுத்தியுள்ளது. முன்னணி ஊடகங்கள் மற்றும் கருத்துக்கணிப்பு நிறுவனங்களின் கணிப்புகளைத் தவிடுபொடியாக்கி, தமிழக வெற்றிக் கழகம் (தவெக) தேர்தல் களத்தில் மாபெரும் சக்தியாக உருவெடுத்து ஆட்சியைப் பிடித்துள்ளது.
தேர்தல் களத்தில் கோடிக்கணக்கில் பணம் செலவழித்த பெரும் பணக்காரர்களும், முக்கியப் பிரமுகர்களும் தோல்வியைத் தழுவிய சூழலில், முறையான பண பலமில்லாத பல புதுமுகங்கள் வெற்றி பெற்றுச் சட்டமன்றத்திற்குள் நுழைந்துள்ளது இத்தேர்தலின் முக்கிய அம்சமாகப் பார்க்கப்படுகிறது. இந்த அலைக்கு முதலமைச்சர் திரு. விஜய் அவர்களின் அசைக்க முடியாத மக்கள் செல்வாக்கே முதன்மைக் காரணம் என அரசியல் விமர்சகர்கள் சுட்டிக்காட்டுகின்றனர்.
சட்டமன்ற விவாதங்களும் முதலமைச்சரின் அணுகுமுறையும்
புதிய அரசுப் பொறுப்பேற்று 100 நாட்கள் நிறைவடைந்துள்ள நிலையில், சட்டமன்றத்தில் ஆளுநர் உரை மீதான விவாதங்களின் போது எழுப்பப்பட்ட கேள்விகளும், அமைச்சர்களின் பதில்களும் பல்வேறு விவாதங்களை உருவாக்கியுள்ளன.
குறிப்பாக, கடந்த ஆட்சியின் மூன்று துறைகளில் நடந்த முறைகேடுகள் குறித்த கோப்புகள் தனது மேஜையில் இருப்பதாக முதலமைச்சர் குறிப்பிட்ட விதம் மற்றும் எதிர்க்கட்சிகளின் விமர்சனங்களுக்குப் பதிலளித்த பாணி குறித்து கேள்விகள் எழுந்துள்ளன. தேர்தல் அரசியலையும், ஆளும் தரப்புக்கான பொறுப்புகளையும் தெளிவுபடுத்த வேண்டிய இச்சூழலில், தேவையற்ற வார்த்தைப் போர்களைத் தவிர்ப்பதே நல்லது என அரசியல் நோக்குநர்கள் கருதுகின்றனர். இது குறித்துப் பேசிய அரசியல் விமர்சகர் துக்ளக் ரமேஷ், “ஆட்சிகள் மாறலாம், காட்சிகள் மாறலாம்; எதிர்க்கட்சிகள் பலவீனமடைந்துவிட்டதாகக் கருதுவது வரலாற்றுப் பிழை என்பதை கடந்த கால நிகழ்வுகளிலிருந்து ஆளும் தரப்பு உணர்ந்து கொள்ள வேண்டும்” என்று எச்சரித்துள்ளார்.
சபை நாகரிகமும் நேரலை ஒளிபரப்பும்
அதேவேளையில், தற்போதைய சட்டமன்றத்தின் செயல்பாடுகளில் சில பாராட்டுக்குரிய ஜனநாயக மாற்றங்களும் நிகழ்ந்துள்ளன. சட்டப்பேரவைக் கூட்டங்களின் முழுமையான நேரலை ஒளிபரப்பு மற்றும் பேரவைத் தலைவர் திரு. ஜே.சி.டி. பிரபாகர் அவர்கள் அவையை நடுநிலையோடு நடத்தி வரும் விதம் மக்களிடையே பெரும் வரவேற்பைப் பெற்றுள்ளது. எதிர்க்கட்சி உறுப்பினர்களுக்குப் பேசுவதற்குத் தாராளமான வாய்ப்புகள் வழங்கப்படுவதும், அவைக்குப் பொருத்தமில்லாத வார்த்தைகள் அவைக்குறிப்பில் இருந்து உடனுக்குடன் நீக்கப்படுவதும் ஆரோக்கியமான அரசியல் பண்பாட்டின் வெளிப்பாடாகப் பார்க்கப்படுகிறது.
கீழ்மட்ட ஊழலும் அதிகார மைய சலசலப்பும்
உயர் மட்டத்தில் பெரிய அளவிலான ஊழல் குற்றச்சாட்டுகள் இதுவரை பகிரங்கமாக உருவெடுக்காவிட்டாலும், கீழ்மட்ட நிர்வாக அமைப்புகளான வருவாய்த் துறை, பத்திரப் பதிவு அலுவலகங்கள் போன்ற இடங்களில் லஞ்சக் கோரிக்கைகளும் முறைகேடுகளும் இன்னமும் முழுமையாக ஒழியவில்லை என்ற குற்றச்சாட்டு பரவலாகவே தொடர்கிறது.
மேலும், “நிர்வாகத்தில் வேறு பவர் சென்டர்கள் (Power Centers) கிடையாது” என்று முதலமைச்சர் தரப்பில் திட்டவட்டமாக மறுக்கப்பட்டாலும், அவருக்கு நெருக்கமான வட்டாரங்கள் மற்றும் முக்கிய நியமனங்கள் சார்ந்த விவகாரங்களில் பின்னணியில் சில ‘அதிகார மையங்கள்’ இயங்குவதாக உருவெடுத்துள்ள சலசலப்புகள் இன்னும் ஓயவில்லை.
ஊடக அணுகுமுறையும் நிர்வாக வெளிப்படைத்தன்மையும்
தவெக தலைவரும் முதலமைச்சருமான திரு. விஜய் அவர்கள் ஊடகங்களைச் சந்திப்பதைத் தவிர்த்து வரும் விவகாரம் மீண்டும் விவாதப் பொருளாகியுள்ளது. சில முக்கிய நியமனங்கள் மற்றும் தலைமைச் செயலகப் பணிகள் தொடர்பான டெண்டர் விவகாரங்கள் முழு வெளிப்படைத்தன்மையுடன் கையாளப்பட வேண்டும் என்ற கோரிக்கைகள் வலுத்து வருகின்றன. குறிப்பாக, டெண்டர் இறுதி செய்யப்படுவதற்குக் முன்பாகவே தலைமைச் செயலக அறைகளில் சீரமைப்புப் பணிகள் நடப்பதாக எழுந்துள்ள குற்றச்சாட்டுகளுக்கு அரசு உரிய விளக்கமளிக்க வேண்டும் என்றும் வலியுறுத்தப்படுகிறது.
நிறைவாக, புதிய அரசின் லட்சியங்களும் நோக்கங்களும் வரவேற்கத்தக்கதாக இருக்கலாம்; இருப்பினும் தேர்தல் வாக்குறுதிகளும் கொள்கைகளும் முழுமையான செய வடிவம் பெறுவதற்கு இன்னும் கால அவகாசம் தேவைப்படுகிறது. மக்களின் பேராதரவுடன் ஆட்சிக் கட்டிலில் அமர்ந்துள்ள புதிய அரசு, வெளிப்படையான மற்றும் ஊழலற்ற நிர்வாகத்தை வழங்குவதே அவர்களின் எதிர்கால அரசியலுக்கான உண்மையான சோதனையாக அமையும் என தெரிவித்துள்ளாா்.