சென்னை சேப்பாக்கத்தில் உள்ள புகழ்பெற்ற எம்.ஏ.சிதம்பரம் கிரிக்கெட் மைதானத்தில் நடைபெற்று வரும் துலீப் டிராபி (Duleep Trophy) தொடரின் இறுதிப்போட்டியைக் காண ஆயிரக்கணக்கான கிரிக்கெட் ரசிகர்கள் குவிந்து வருகின்றனர். நட்சத்திர வீரர்கள் பலரும் களமிறங்கியுள்ள இந்த மெகா ஃபைனல் போட்டியைப் பொதுமக்கள் இலவசமாகக் காண தமிழ்நாடு கிரிக்கெட் வாரியம் (TNCA) அனுமதி அளித்துள்ளதால் மைதானத்தில் திருவிழா கோலம் பூண்டுள்ளது.
தெற்கு மண்டலம் vs கிழக்கு மண்டலம் மோதல்
உள்ளூர் ரஞ்சி மற்றும் துலீப் கோப்பை தொடர்கள் உச்சக்கட்டத்தை எட்டியுள்ள நிலையில், நடப்பு துலீப் டிராபி தொடரின் இறுதிப்போட்டியில் தெற்கு மண்டலம் (South Zone) மற்றும் கிழக்கு மண்டலம் (East Zone) அணிகள் பலப்பரீட்சை நடத்துகின்றன. இரு அணிகளிலுமே இந்திய சர்வதேச அணியில் முத்திரை பதித்த முன்னணி நட்சத்திர வீரர்கள் பலரும் இடம்பெற்றுள்ளதால் இந்தப் போட்டி ரசிகர்கள் மத்தியில் மிகப்பெரிய எதிர்பார்ப்பை ஏற்படுத்தியுள்ளது.
நட்சத்திர வீரர்களின் படை அணிவகுப்பு!
தெற்கு மண்டல அணிக்காக அதிரடி பேட்டர் திலக் வர்மா, தேவ்தத் படிக்கல் மற்றும் வேகப்பந்து வீச்சாளர் முகமது சிராஜ் ஆகியோர் களமிறங்கி விளையாடி வருகின்றனர்.
மறுபுறம், வலுவான கிழக்கு மண்டல அணியில் நட்சத்திர விக்கெட் கீப்பர்-பேட்டர் இஷான் கிஷன், அனுபவப் பந்துவீச்சாளர் முகமது ஷமி மற்றும் இளம் புயல் வைபவ் சூர்யவன்சி ஆகியோர் இடம்பெற்றுள்ளனர். குறிப்பாக, ஐபிஎல் மற்றும் சர்வதேசப் போட்டிகளில் கலக்கிய சிராஜ், ஷமி ஆகியோரின் பந்துவீச்சையும், இஷான் கிஷன், திலக் வர்மா, வைபவ் சூர்யவன்சி ஆகியோரின் அதிரடி பேட்டிங்கையும் நேரில் காண ரசிகர்கள் ஆவலுடன் காத்திருக்கின்றனர்.
ரசிகர்களுக்கு ‘ஃப்ரீ என்ட்ரி’ – TNCA அதிரடி அறிவிப்பு!
உள்ளூர் கிரிக்கெட் போட்டிகளை ஊக்குவிக்கும் வகையிலும், ரசிகர்களை உற்சாகப்படுத்தும் வகையிலும், சேப்பாக்கம் மைதானத்தில் நடைபெறும் இந்த இறுதிப்போட்டியைக் காணப் பொதுமக்களுக்குக் கட்டணமில்லா இலவச அனுமதி அளிக்கப்படுவதாகத் தமிழ்நாடு கிரிக்கெட் வாரியம் அறிவித்தது. இந்த அறிவிப்பால் உற்சாகமடைந்த சென்னை கிரிக்கெட் ரசிகர்கள், ஞாயிற்றுக்கிழமையான இன்று காலை முதலே சேப்பாக்கம் மைதானத்தின் மாடங்களில் பெருமளவில் திரளத் தொடங்கினர். நட்சத்திர வீரர்களின் ஒவ்வொரு பவுண்டரி, சிக்சர் மற்றும் விக்கெட்டுகளுக்கு மைதானத்தில் திரண்டுள்ள ரசிகர்கள் எழுப்பும் உற்சாகக் கரவொலி சேப்பாக்கத்தையே அதிர வைத்து வருகிறது.
விநாயகர் சிலை கரைப்பு: பொதுமக்களுக்கு சென்னை மாவட்ட ஆட்சியரின் முக்கிய அறிவிப்பு!