கனடாவில் உள்ள மகன்கள் தொடர்பாகவும் தீவிர விசாரணை – சென்னை, திருவள்ளூரில் 3 இடங்களில் பாய்ந்தது ED!
சட்டவிரோத பணப்பரிமாற்றம் (PMLA) தொடர்பான புகார்களின் அடிப்படையில், சென்னை அண்ணா நகர் மேற்கு பகுதியில் வசிக்கும் இலங்கைத் தமிழ் மூதாட்டி ஒருவரின் வீடு உட்பட தமிழகத்தில் மூன்று முக்கிய இடங்களில் அமலாக்கத்துறை (ED) அதிகாரிகள் இன்று காலை முதல் அதிரடி சோதனையில் ஈடுபட்டு வருகின்றனர்.
ஓய்வுபெற்ற காவல்துறை அதிகாரி வீட்டில் சோதனை
இலங்கையைச் சேர்ந்தவர் கிருஷ்ணகுமாரி (68). இவர் கடந்த 20 ஆண்டுகளுக்கு முன்பு தனது குடும்பத்துடன் தமிழகத்திற்கு அகதியாக வந்து குடியேறினார். இவரது கணவர் கடந்த ஓராண்டிற்கு முன்பு மீண்டும் இலங்கைக்குச் சென்றுவிட்ட நிலையில், கிருஷ்ணகுமாரி மட்டும் சென்னை திருமங்கலம் C-பிளாக், 10-வது தெருவில் உள்ள ஓய்வுபெற்ற காவல்துறை அதிகாரி ஒருவரின் வீட்டில் கடந்த இரண்டு ஆண்டுகளாக வாடகைக்கு வசித்து வருகிறார்.
இவரது இரு மகன்களும் கனடா நாட்டில் வசித்து வரும் நிலையில், கிருஷ்ணகுமாரியை அவரது சகோதரர்கள் மட்டும் அவ்வப்போது வந்து பார்த்துச் சென்றுள்ளனர்.
இந்நிலையில், சட்டவிரோத பணப்பரிமாற்றம் மற்றும் வெளிநாட்டுப் பணப் பரிவர்த்தனைகள் தொடர்பான புகாரின் அடிப்படையில், இன்று காலை 6:45 மணி முதல் மத்திய துணை ராணுவப் படையினரின் பலத்த பாதுகாப்புடன் 8 பேர் கொண்ட அமலாக்கத்துறை அதிகாரிகள் குழு அவரது வீட்டிற்குள் நுழைந்து தீவிர சோதனையில் ஈடுபட்டு வருகிறது.
கனடாவில் உள்ள அவரது மகன்களுக்கு இதில் தொடர்பு உள்ளதா என்றும், அவர்களுக்கு இடையே நடந்த நிதிப் பரிவர்த்தனைகள் குறித்தும் அதிகாரிகள் தீவிரமாக விசாரணை நடத்தி வருகின்றனர்.
திருவள்ளூர் மற்றும் பெரம்பூரிலும் பாய்ந்த சோதனை
அண்ணா நகர் தவிர்த்து, மேலும் இரண்டு இடங்களில் அமலாக்கத்துறை அதிகாரிகள் இணையாகச் சோதனையை மேற்கொண்டு வருகின்றனர்:
திருவள்ளூர் மாவட்டம்: சோழவரம் பகுதியில் உள்ள கண்ணன் என்பவரது வீட்டிலும் அமலாக்கத்துறை அதிகாரிகள் அதிரடி ஆய்வு மேற்கொண்டு வருகின்றனர்.
பெரம்பூர் நெடுஞ்சாலை: போதைப்பொருள் கடத்தல் வழக்கில் தொடர்புடையவர் எனக் கூறப்படும் அக்பர் என்பவரின் வீட்டிலும் அதிகாரிகள் சோதனையில் ஈடுபட்டுள்ளனர்.
ஆவணங்கள் கைப்பற்றப்பட்ட பின் முழு விவரம்
இந்தச் சோதனைகளின் முடிவிலேயே என்னென்ன முக்கிய ஆவணங்கள், ரொக்கப் பணம் அல்லது டிஜிட்டல் ஆதாரங்கள் கைப்பற்றப்பட்டன என்பது குறித்த முழு விவரங்களும், சோதனையில் சிக்கியவர்களின் பின்னணி குறித்தத் தகவல்களும் அதிகாரப்பூர்வமாக வெளியாகும் என அமலாக்கத்துறை வட்டாரங்கள் தெரிவித்துள்ளன.
தலைநகர் சென்னை மற்றும் அதன் புறநகர்ப் பகுதிகளில் ஒரே நேரத்தில் 3 இடங்களில் அமலாக்கத்துறை நடத்திய இந்த அதிரடி சோதனை பெரும் பரபரப்பை ஏற்படுத்தியுள்ளது.
அம்பத்தூரில் அதிரடி சோதனை: BIS ஹால்மார்க் இல்லாத ரூ.1.20 கோடி மதிப்பிலான தங்க நகைகள் பறிமுதல்!