உலகப் புகழ்பெற்ற மதுரை மீனாட்சி சுந்தரேஸ்வரர் கோவில் குடமுழுக்கு விழா வரும் செப்டம்பர் 17-ம் தேதி நடைபெற உள்ள நிலையில், கோவில் முழுவதும் விழாக்கோலம் பூண்டுள்ளது. குறிப்பாக ராஜகோபுரங்கள் பல வண்ண அலங்கார விளக்குகள் மற்றும் லேசர் ஒளியில் ஜொலிப்பது பக்தர்களை வெகுவாக கவர்ந்து வருகிறது.
வண்ண விளக்குகளில் ஜொலிக்கும் ராஜகோபுரங்கள்
குடமுழுக்கை முன்னிட்டு மீனாட்சி அம்மன் கோவிலின் ராஜகோபுரங்கள் ஏற்கனவே பல்வேறு வண்ணங்களில் அலங்கரிக்கப்பட்டு புதுப்பொலிவுடன் காட்சியளிக்கின்றன. வானுயர்ந்து நிற்கும் கோபுரங்களில் உள்ள ஆயிரக்கணக்கான சுதைச் சிற்பங்கள் இரவு நேரங்களில் மின்விளக்கு அலங்காரத்தில் மேலும் அழகாக காட்சியளிக்கின்றன.
மேலும், கோபுரங்களில் இருந்து பொதுமக்களை கவரும் வகையில் லேசர் விளக்குகளும் ஒளிபாய்ச்சப்பட்டு வருகின்றன. இரவு நேரத்தில் மதுரையின் பல பகுதிகளில் இருந்தும் கோபுரங்களை பார்க்கும் வகையில் இந்த ஒளி அலங்காரம் அமைக்கப்பட்டுள்ளது.
கோவில் வளாகமும் புதுப்பொலிவு
கோவில் ராஜகோபுரங்கள் மட்டுமின்றி, கோவில் உள்ளேயும் பல்வேறு பகுதிகளில் மின்விளக்கு அலங்காரங்கள் செய்யப்பட்டுள்ளன. பொற்றாமரைக் குளம், ஆயிரங்கால் மண்டபம், நூற்றுக்கால் மண்டபம், அம்மன் பிரகாரம், சுவாமி பிரகாரம் உள்ளிட்ட பகுதிகளும் விழாவை முன்னிட்டு புதுப்பொலிவுடன் காட்சியளிக்கின்றன.
இதனை காண காலை மற்றும் மாலை நேரங்களில் ஏராளமான பக்தர்கள் கோவிலுக்கு வருகை தருகின்றனர். கடந்த 2 நாட்கள் விடுமுறை என்பதால் மாலை நேரத்தில் வழக்கத்தை விட அதிகமான பக்தர்கள் கூட்டம் காணப்பட்டது.
செப்டம்பர் 17-ல் பிரம்மாண்ட குடமுழுக்கு
மீனாட்சி சுந்தரேஸ்வரர் கோவில் குடமுழுக்கு விழா செப்டம்பர் 17-ம் தேதி காலை 7.40 மணி முதல் 8.10 மணி வரை நடைபெற உள்ளது. இதில் மீனாட்சி அம்மன் மற்றும் சுந்தரேஸ்வரர் சுவாமிகளுக்கு கலசாபிஷேகமும், தங்க விமானங்கள் மற்றும் ராஜகோபுரங்களுக்கு சமகால குடமுழுக்கும் நடைபெற உள்ளது.
இதற்கு முந்தைய நாளான செப்டம்பர் 16-ம் தேதி காலை 5 மணி முதல் 6 மணி வரை கோவிலில் உள்ள பரிவார மூர்த்திகளுக்கான திருக்குடமுழுக்கு நடைபெறுகிறது.
பக்தர்களுக்காக சிறப்பு ஏற்பாடுகள்
குடமுழுக்கு விழாவை முன்னிட்டு கோவில் வளாகம் மற்றும் சுற்றுப்புற பகுதிகளில் பாதுகாப்பு மற்றும் சுகாதார ஏற்பாடுகள் தீவிரப்படுத்தப்பட்டுள்ளன. கட்டுப்பாட்டு அறையும் செயல்பட்டு வருகிறது.
பக்தர்களுக்காக மருத்துவ உதவி மையங்கள் மற்றும் மருத்துவ முகாம்கள் அமைக்கப்பட்டுள்ளன. அவசர சிகிச்சை தேவைப்படும் நிலையில் 108 ஆம்புலன்ஸ் வாகனங்களும் தயார் நிலையில் வைக்கப்பட்டுள்ளன. மேலும், பொதுமக்கள் அதிகம் கூடும் பகுதிகளில் எல்.இ.டி. திரைகள் அமைக்கப்பட்டு குடமுழுக்கு நிகழ்வை காண ஏற்பாடுகள் செய்யப்பட்டுள்ளன.
விழாக்கோலம் பூண்ட மதுரை
17 ஆண்டுகளுக்குப் பிறகு நடைபெறும் இந்த குடமுழுக்கு விழாவை காண சுமார் 7 லட்சம் பக்தர்கள் மதுரைக்கு வருவார்கள் என எதிர்பார்க்கப்படுகிறது. இதனால் மதுரை நகரமே விழாக்கோலம் பூண்டுள்ளது.
குடமுழுக்குக்கு இன்னும் சில நாட்களே உள்ள நிலையில், லேசர் மற்றும் அலங்கார விளக்குகளில் ஜொலிக்கும் மீனாட்சி அம்மன் கோவில் ராஜகோபுரங்கள் மதுரையின் இரவு நேர அழகை மேலும் அதிகரித்துள்ளன.