ஸ்மார்ட்போனை அடிக்கடி பயன்படுத்தும் பழக்கம் நாளுக்கு நாள் அதிகரித்து வரும் நிலையில், கையில் போன் இல்லாமல் எதையும் செய்ய முடியாது என்ற நிலை பலருக்கும் உருவாகி வருவதாக மருத்துவர்கள் எச்சரிக்கின்றனர். தொடர்ந்து ஸ்மார்ட்போனை பயன்படுத்துவதால் ஏற்படும் இந்தப் பிரச்சினையை ‘ஸ்மார்ட்போன் மூளை’ என்று குறிப்பிடுகின்றனர்.
போனை அடிக்கடி நோண்டுவது, தேவையில்லாத நேரங்களிலும் திரையை பார்ப்பது, தூங்கும் நேரத்திலும் ஸ்மார்ட்போனை பயன்படுத்துவது போன்ற பழக்கங்கள் உடல் மற்றும் மனநலத்தில் பல்வேறு பாதிப்புகளை ஏற்படுத்தக்கூடும் என கூறப்படுகிறது.
குறிப்பாக, நீண்ட நேரம் ஸ்மார்ட்போன் பயன்படுத்துவதால் தூக்கமின்மை, கவனச்சிதறல், நினைவாற்றல் மற்றும் கவனம் செலுத்துவதில் சிரமம் போன்ற பிரச்சினைகள் ஏற்படலாம். சிலருக்கு வலிப்பு உள்ளிட்ட பாதிப்புகளும் ஏற்பட வாய்ப்புள்ளதாக மருத்துவர்கள் எச்சரிக்கின்றனர்.
மேலும், ஒருவர் ஸ்மார்ட்போனை பயன்படுத்தும் நேரம் அதிகரிக்கும் போது, அதனால் ஏற்படும் பாதிப்புகளின் தீவிரமும் அதிகரிக்கக்கூடும் என தெரிவிக்கப்படுகிறது. தொடர்ந்து போனை பார்த்துக் கொண்டிருக்கும் பழக்கம், அன்றாட வேலைகள் மற்றும் நேருக்கு நேர் உரையாடல்களிலும் பாதிப்பை ஏற்படுத்தும் நிலைக்கு கொண்டு செல்லலாம்.
எனவே, தேவையில்லாத ஒவ்வொரு விஷயத்திற்கும் உடனடியாக ஸ்மார்ட்போனை எடுக்கும் பழக்கத்தை படிப்படியாக மாற்றுவது சிறந்தது. போன் பயன்படுத்தும் நேரத்தை குறைத்தல், குறிப்பாக தூங்குவதற்கு முன்பு ஸ்மார்ட்போன் பயன்பாட்டை தவிர்த்தல் மற்றும் அவசியமான நேரங்களில் மட்டுமே பயன்படுத்துதல் போன்ற பழக்கங்களை கடைப்பிடிப்பது உதவியாக இருக்கும்.
ஸ்மார்ட்போன் பயன்பாடு அன்றாட வாழ்க்கையின் ஒரு பகுதியாக மாறிவிட்டாலும், அதன் பயன்பாட்டை கட்டுப்படுத்தி சரியான முறையில் பயன்படுத்துவது உடல் மற்றும் மனநலத்தை பாதுகாக்க முக்கியமானதாகும்.
OpenAI-ன் புதிய ‘Dots’ AI ஏஜென்ட் அறிமுகம்! பாதுகாப்பு காரணமாக மற்றொரு AI மாடல் வெளியீடு தாமதம்