மெக்சிகோ தேசிய பாதுகாப்புப் படையில் 7 கிலோ எடை மட்டுமே கொண்ட ‘கமாண்டோ’ என்ற சிஹுவாஹுவா நாய் இணைந்துள்ளது. வெறும் 21 சென்டிமீட்டர் உயரம் கொண்ட இந்த 13 மாத குட்டி நாய், தேசிய பாதுகாப்புப் படையின் மிகவும் சிறிய மற்றும் வித்தியாசமான நாய் உறுப்பினராக கவனம் ஈர்த்து வருகிறது.
குட்டி நாய்க்கு ராணுவ உடை!
கமாண்டோவுக்கு பிரத்யேகமாக வடிவமைக்கப்பட்ட சிறிய பாதுகாப்புக் கண்ணாடிகள், தந்திரோபாய உடுப்பு, ஹெல்மெட் மற்றும் தலையில் பொருத்தக்கூடிய சிறிய கேமரா உள்ளிட்ட உபகரணங்கள் வழங்கப்பட்டுள்ளன.
பொதுவாக ராணுவம் மற்றும் காவல்துறையில் ஜெர்மன் ஷெப்பர்ட், லாப்ரடார் போன்ற பெரிய நாய் இனங்களே பணியில் ஈடுபடுத்தப்படும் நிலையில், கமாண்டோவின் தோற்றம் அனைவரது கவனத்தையும் ஈர்த்துள்ளது.
தேடுதல், மீட்புப் பணிகளுக்கு பயிற்சி
கமாண்டோ வெறும் விழாக்கள் மற்றும் பொதுமக்கள் நிகழ்ச்சிகளில் பங்கேற்கும் செல்லப்பிராணியாக மட்டும் பயன்படுத்தப்படவில்லை. தேடுதல் மற்றும் மீட்புப் பணிகளுக்காகவும் அதற்கு பயிற்சி அளிக்கப்பட்டு வருகிறது.
மெக்சிகோ சிட்டியில் நடைபெற்ற சமீபத்திய பயிற்சியில், படிகளில் ஏறுவது மற்றும் பல்வேறு தடைகளைத் தாண்டுவது உள்ளிட்ட பயிற்சிகளில் கமாண்டோ பங்கேற்றது. அதன் சிறிய உடல் அமைப்பு சில குறுகிய இடங்களுக்குள் சென்று தேடுதல் பணிகளை மேற்கொள்வதற்கு உதவக்கூடும் என தெரிவிக்கப்பட்டுள்ளது.
எப்படி தேசிய பாதுகாப்புப் படையில் சேர்ந்தது?
சுமார் 6 மாதங்களுக்கு முன்பு வடக்கு மெக்சிகோவில் உள்ள சிஹுவாஹுவா மாகாணத்தில் வசித்து வந்த வயதான தம்பதியினரால் கமாண்டோவை தொடர்ந்து பராமரிக்க முடியாத சூழல் ஏற்பட்டது. இதையடுத்து மெக்சிகோ தேசிய பாதுகாப்புப் படை அதனைத் தத்தெடுத்தது.
தற்போது தேசிய பாதுகாப்புப் படையின் சுமார் 350 நாய்கள் கொண்ட பிரிவில், பாரம்பரியமாக பயன்படுத்தப்படும் பெரிய நாய் இனங்களிலிருந்து மாறுபட்ட உறுப்பினராக கமாண்டோ இடம்பெற்றுள்ளது.
சுதந்திர தின அணிவகுப்பிலும் பங்கேற்பு
கமாண்டோ ஏற்கெனவே மெக்சிகோவின் சுதந்திர தின அணிவகுப்பில் பங்கேற்றுள்ளது. மேலும், பள்ளி நிகழ்ச்சிகள் மற்றும் பொதுமக்களுடனான சமூக நிகழ்ச்சிகளிலும் அது இடம்பெற்று வருகிறது.
இதன் காரணமாக சமூக வலைதளங்களில் கமாண்டோவின் புகைப்படங்கள் மற்றும் வீடியோக்கள் கவனம் பெற்றுள்ளதுடன், அதன் உருவத்தை அடிப்படையாகக் கொண்ட கார்ட்டூன் மற்றும் மீம்ஸ்களும் பரவி வருகின்றன.
“பெரிய நாய்கள் மட்டும்தான் பணியாற்ற முடியும் என்ற எண்ணத்தை மாற்றுகிறது”
கமாண்டோ குறித்து பேசிய லெப்டினன்ட் டெபோரா ஹெர்னாண்டஸ், பெரிய நாய்கள் மட்டுமே தேசிய பாதுகாப்புப் படையில் பணியாற்ற முடியும் என்ற பொதுவான எண்ணத்தை இது மாற்றுவதாக தெரிவித்துள்ளார்.
மேலும், கமாண்டோ போன்ற ஒரு சிறிய நாய், பாதுகாப்புப் படையினருக்கும் பொதுமக்களுக்கும் இடையே நெருக்கமான தொடர்பை ஏற்படுத்த உதவுவதாகவும் அதிகாரிகள் தெரிவித்துள்ளனர்.
ரஷிய அணு எரிபொருளுக்கு பாகிஸ்தான் வான்வெளி அனுமதி மறுப்பு – அடுத்து என்ன?